信報 英眼狙擊
中概股預託證券上周五大跌，而以契媽系列為首的美國中小型增長股同樣爆股災。當時能夠從容應對，多得組合分得散，重災區佔比未算太重，另外亦有幸運元素，假如重啟概念也是同一時間崩堤，多數就會方寸大亂。按道理退市不牽涉公司實質運作，悲觀情緒短期推到極致，中概股應該有得博。不過美國中小型股一併下挫，投機者想逆市冒險，有大把其他選擇，加上中港氣氛絕望多時，就算僥幸博到短期底，第一次反攻充其量有限公司，所以只是下了細注，志在參與。
有時評論預測及建議情況相當尷尬，以今次為例，既然筆者身體力行落疊，睇法當然是暫時跌勢已經差不多。可是出手的先決條件，是原本負磅並不重，組合分得散，兼且自知這一次必然是且戰且走，好彩回升會彈性處理，但再跌就肯定嚴守止蝕，無謂增加負擔，影響日後的部署。一般人未必夠紀律，如果純粹聽sound bite，可能買得太大，又或者不肯斬倉坐得太遠。
知識型股票當道，新一代投資者比較短視又情緒化，例如近日掉轉槍頭打契媽，針對ARKK的反向ETF──Short ARKK ETF（SARK）成為熱門選擇，可見一斑。上述條件都會令市場波幅上升，增加操作難度，控制注碼及分散投資，就愈形重要。可惜傳媒訪問大多篇幅有限，風險管理屬老生常談欠缺吸引力，自然欠奉，所以對於急就章的簡短訪問，盡量可免則免，無謂累人。
至於是否跟筆者去博中資科網股，主要視乎原本持倉會否太重，原本成褲都係，就不能百上加斤，否則留放會太過緊張。此外，這一注最好以投機心態處理，輸要肯斬贏要食糊。除非出現突發好消息，升得太急又沽唔切，才值得繼續博落去。況且，人行減存款準備金率是早有預期，不似會有太大力度，所謂有用的催化劑，始終是監管相關的消息，因此短期而言，只是博由太殘變成無咁殘，真正轉好的機會依然不高。
豐盛金融資產管理董事
#信報 #英眼狙擊 #英sir #黃國英
沒有留言:
張貼留言