古天后【盤房來料】世盃效應 港股冷清

 https://www2.hkej.com/instantnews/market/article/3308222/%E3%80%90%E7%9B%A4%E6%88%BF%E4%BE%86%E6%96%99%E3%80%91%E4%B8%96%E7%9B%83%E6%95%88%E6%87%89+%E6%B8%AF%E8%82%A1%E5%86%B7%E6%B8%85

隔晚美聯儲局公布11月議息會議紀錄，大部分委員認為息口快要見頂，喺通脹同時見頂下，加息步伐有望放緩，市場見息口有機會見頂，美股三大指數即彈，不過可能係世界盃效應，少咗市場資金參與，美股上升動力唔算勁，加上標指喺4100點阻力唔細，一旦升得穿兼企穩，美股就有機會由熊入牛，呢一點正正係阿Man對整體市場後市唔會睇得太淡嘅原因。

至於港股除咗美股向好之外，反映中國概念股表現嘅金龍中國指數反彈2.27%，港股噚日終止五連跌，反彈99點，今早一度升逾200點，但仍受制10天線(現處17780)。恒指高開160點，一度升235點見17759半日高位，其後曾倒跌6點，見17517半日低位。中午恒指升90點，收報17614；國指升30點，報5975；恒科指升23點，收3579。半日成交額縮到500.47億元，預咗世界盃效應下，成交會縮水。

藍籌股個別發展，ATMJ中，騰訊(00700)跟阿里(09988)分別升0.4及0.9%，京東(09618)半日跌1.6%，暫時喺200元水平爭持，至於明日公布季績嘅美團(03690)半日跌0.7%。由於騰訊大股東南非基金，講明收到美團嘅股份實物分派後打算有秩序地喺市場沽貨，令到呢期美團走勢較弱，但派送係明年3月底嘅事，啲人就有理冇理沽定先。金融股繼續造好，滙控(00005)升1.3%，中銀香港(02388)升2%，平保(02318)升近1%，友邦(01299)升0.2%明顯跑輸。

國常會指出要適時適度運用降準等貨幣政策工具，保持流動性合理充裕。另外，據報國有銀行向房企提供約2200億元人民幣授信額度，民企內房料可受惠，今日內房股跟物管回升。不過內房要解決問題嘅根本，係要靠銷售，要內房真正擺脫目前困局，始終要內地嘅房產市場回暖，但喺目前嘅防疫政策下，呢方面未見有起色。

話咗炒國企改革呢啲比較短癮，早兩日升嘅中字股，今日見回吐，最離譜係中鋁國際(02068)半日急回15.4%，追貨嘅又做韭菜被割。其他中字股普遍回落，跌幅由超過1%至7%不等。講真個市真係無乜好炒，就連指數波幅亦收窄，下周期指結算，睇嚟又要待結算過後，港股先有更明確方向，暫時喺50天線及10天線之間上落。口痕友話炒股不如賭波，咁又無錯，成交縮水，生意淡薄，不如賭博。

麥狄文
(徐狄怡‧證監會持牌人)

 

【盤房來料】Tesla唔轉勢 汽車股閉翳

 https://www2.hkej.com/instantnews/stock/article/3306382/%E3%80%90%E7%9B%A4%E6%88%BF%E4%BE%86%E6%96%99%E3%80%91Tesla%E5%94%94%E8%BD%89%E5%8B%A2+%E6%B1%BD%E8%BB%8A%E8%82%A1%E9%96%89%E7%BF%B3

隔晚美股偏軟，科技股跑輸，不過標指仍守住3900支持，而納指未穿11000，美股仲有條件行上去，市場依家觀望緊今晚聯儲局個議息紀錄，加上周四感恩節假期，周五又得半日市，估計市場都會偏向審慎少少。港股連跌第四個交易日，累跌687點，今早反覆偏軟，目前喺10天線(約17526)爭持。

恒指低開30點，一度倒升96點，高見17751後沽壓再現，大市轉升為跌，半日最多跌244點，一度失守10天線，低見17411。不過其後10天線失而復得，止跌回升，但可惜企唔返上17700水平。中午大市報收17587，跌68點；國指收5973，跌28點；恒科指跌39點，報3592。半日成交額只有618.05億元，世界盃效應下，市況將會更趨淡靜。

藍籌股個別發展，大笨象(00005)半日升0.5%；平保(02318)跟建行(00939)分別逆市升1.4%及0.4%；之前係威係勢嘅港交所(00388)，喺近日成交縮水下，今日再跌1.3%；友邦(01299)半日跌0.2%有啲腳軟，又重返75水平搵支持。

口痕友話要留意今日中資電訊股抽高，再加埋一堆基建股炒上，最怕呢啲藍燈籠一落鑊，個市又玩完。市場憧憬國企改革，成批國企股落鑊炒，三隻電訊股表現突出，尤其聯通(00762)半日升一成，係升幅最大藍籌股；中移動(00941)跟中電信(00728)半日分別升2.4%及4.5%。基建方面嘅代表有中鐵建(01186)同中鐵(00390)，半日齊齊升8%。仲有其他中乜中物嘅國企股，今日都普遍升半成以上。不過國企改革呢啲，由有計劃到落實都唔知要搞幾耐，呢轉落鑊炒一炒可能又無影，阿Man都係得個睇字算，唔會手多多。

美股嗰邊嘅科技股近日一直跑輸，今日整體科技股繼續受壓，美團(03690)受內地疫情轉趨緊張，多處又圍封防控等影響，半日跌5.6%，成為表現最差藍籌股。ATMJ其他成員，騰訊(00700)近日較強，半日僅跌0.1%；阿里(09988)跟京東(09618)分別跌2.6%及1.5%。

自從Tesla老闆收購Twitter之後，對資金需求殷切，不得不減持手上股份套現，而呢個動作令Tesla 股價近日一浪低於一浪，連帶其他汽車股跟跌。比亞迪(01211)自從股神開始減持，表現一直疲弱，其他汽車股亦無運行。依家真係睇Tesla頭，Tesla要止跌回升，其他汽車股先能止跌。

麥狄文
(徐狄怡‧證監會持牌人)

 

【盤房來料】大市現水平整固 留意成交會否萎縮

 https://www2.hkej.com/instantnews/stock/article/3305488/%E3%80%90%E7%9B%A4%E6%88%BF%E4%BE%86%E6%96%99%E3%80%91%E5%A4%A7%E5%B8%82%E7%8F%BE%E6%B0%B4%E5%B9%B3%E6%95%B4%E5%9B%BA+%E7%95%99%E6%84%8F%E6%88%90%E4%BA%A4%E6%9C%83%E5%90%A6%E8%90%8E%E7%B8%AE

上周五美股三大指數雖然上升，但反映中概股嘅金龍中國指數腳軟跌3%，上周五晚嘅夜期跟ADR都預示今日港股要跌。另一方面，北京跟廣州疫情爆發，嚴厲防控，而內地近6個月來首個與新冠相關的死亡病例，為咗達到社會面清零，睇怕短期都好難放寛防疫措施。恒指過去三個星期升逾兩成，錄得3129點進帳後，今日早段一度回吐逾600點，其後跌幅收窄，重上17600水平。

恒指低開338點，報17654已經係半日高位，開市跌幅隨之擴大，最多跌603點，見17389半日低位。同時失守10日線(17417)後跌幅收窄，10日線失而復得。中午恒指報收17616，跌376點；國指跌135點，報5989；恒科指半日跌107點。半日成交額640.38億元，世界杯噚日開幕，預咗呢三幾個星期，整體市況都會靜返啲。

藍籌股普遍向下，友邦(01299)跟港交所(00388)半日齊齊跌逾3%，不過大笨象(00005)跟中移動(00941)就逆市上升，分別升0.3%及0.5%。油價回軟，三桶油一樣要跌，跌油價關連性最大嘅中海油(00883)，半日跌2.5%。

上周五中概股唔跟美股升，都預咗今日啲科技股唔精神，騰訊(00700)雖然一度跌4.6%，但最終跌幅收窄至0.6%，仍然守住280-285水平，算係保持強勢。至於京東(09618)嘅第三季度業績表現唔錯，肯定好過阿里(09988)份業績，不過就預告第四季營收增長緩，加上好消息出貨，今早捱沽，半日跌5.1%。美團(03690)跟阿里半日齊跌4%，美團暫時叫守咗150，而阿里側一直未能企穩80元樓上。

北京跟廣東再爆疫情，市場關注內地疫情再趨嚴峻下，防疫措施不僅未能放鬆，廣州白雲區今起嚴格限制人員流動，變相又作有限度封城。本來已見曙光嘅復常之路再次變動暗淡，相關復常股全部捱沽，包括零售、餐飲跟濠賭股，全部錄得較顯著跌幅。

餐飲股又受封控影響，全線下跌超過半成。零售股亦唔好得去邊，跌幅由超過2%至6%不等。內地疫情反覆，短期與內地通關無望，跌幅較為顯著，普遍都要跌5%以上。

上周五恒指服務公司宣布加入三隻藍籌新貴，不過除咗康師傳(00322)半日升5.8%之外，海爾智家(06690)半日無起跌，萬潤萬象(01209)就跟其他內房及物管股下跌。

阿Man較為有興趣係隻海爾智家，呢啲位博佢守住10、20同50日線，純睇走勢，仍撚有條件上返去挑戰條100日線企穩後再試250日線，先列入觀察類別留意住先。

暫時港股重返萬八樓下，要啲時間整固一下，只要仍守10日(17417)線及50日線(17117)，整固完仍有條件再向上挑戰100日線。不過預咗世界杯呢期會靜啲，成交若然縮水到少於1000億，就要留意一下，始終缺乏資金支持下，後市好難更上一層樓。

麥狄文
(徐狄怡‧證監會持牌人)

 

【盤房來料】大市萬八水平反覆 資金炒股唔炒市

 https://www2.hkej.com/instantnews/market/article/3304163/%E3%80%90%E7%9B%A4%E6%88%BF%E4%BE%86%E6%96%99%E3%80%91%E5%A4%A7%E5%B8%82%E8%90%AC%E5%85%AB%E6%B0%B4%E5%B9%B3%E5%8F%8D%E8%A6%86+%E8%B3%87%E9%87%91%E7%82%92%E8%82%A1%E5%94%94%E7%82%92%E5%B8%82

美股隔晚表現反覆，早段因為聯儲局鷹王出嚟放鷹，令道指早段曾跌逾三百點，但當標指跟納指下試3900同11000支持位後，三大指數跌幅逐步收窄，收復大部份失地，港股夜期時段隨美股回升，恒指今早隨夜期及ADR高開，可惜升幅縮水，連跌兩日共297點後，半日僅彈100點。

恒指高開270點，升幅一度擴大至332點，見18378半日高位，但A股走軟，港股升幅亦收窄，升幅一度縮水至69點，見18115半日低位。半日恒指報收18146，升100點；國指報收6191，升50點；恒科指報收3820，升98點。半日成交額777.68億元，中規中矩。

藍籌股個別發展，友邦(01299)跟大笨象(00005)分別跌0.1%及0.5%，內銀跟內險股表現較差，平保(02318)半日跌3.2%；建行(00938)半日跌。恒指主要靠科網股撐起，整個板塊表現不俗，阿里(09988)隔晚公布業績，次季經調整後盈利增19%，叫做高過預期少少，不過公司加碼回購計劃，股價半日升4%，暫時要睇企唔企得穩80水平，企就仲有條件上試85至90阻力位。至於美團(03690)噚日因為騰訊(00700)實物派送嘅消息急回，今日可能啲人睇返清楚個通告，實物派送要明年3月下旬先有貨，今日彈返唔少，半日曾高見167元，雖然升幅隨大市收窄，但仍守到160水平之上。其他科網股全線向上，今日京東(09618)、快手(01024)跟嗶哩嗶哩(09626)收市後公布業績，半日升幅由1.9%至4.9%不等。

生科股以抗疫股表現最好，三葉草(02197)再飆7%；君實(01877)炒高7.9%；歌禮(01672)彈升6%；康希諾(06185)升2.5%；復星醫藥(02196)揚4%；中國生物製藥(01177)走高0.7%；國藥控股(01099)升1.4%。不過醫藥股板塊近日明顯有資金流入，呢個板塊已捱過殺估值最黑暗嘅日子。

教育股落鑊，希望教育(01765)、中教(00839)跟思考樂(01769)，全部半日急升逾兩成，其他教育股閒閒地升一成過外。嚟到萬八水平，重磅股升幅有返咁上下，資金開始喺唔同板塊之間流動，有機會出現炒股唔炒市嘅狀況。

 

麥狄文
(徐狄怡‧證監會持牌人)

 

【盤房來料】港股回調守17400 仍可挑戰100天線

 https://www2.hkej.com/instantnews/stock/article/3303189/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%B8%AF%E8%82%A1%E5%9B%9E%E8%AA%BF%E5%AE%8817400+%E4%BB%8D%E5%8F%AF%E6%8C%91%E6%88%B0100%E5%A4%A9%E7%B7%9A

美國10月零售銷售數據好過預期，反映美國經濟唔係咁差，不過重量級零售商唱淡年底傳統旺季銷售前景，美股反覆回落。其實標指逼近4100大阻力位，加上超買，美股回調亦好正常，剛好波蘭又中咗導彈，正好畀資金一個由極為進取轉向較為審慎嘅理由。至於港股噚日回吐311點後，今早調整持續，更重返萬八水平之下。

恒指低開184點，跌幅一度收窄至131點，見18125半日高位，但未見有買盤追入，跌幅逐步擴大，並跌穿18000大關，最多跌544點，見17711半日低位。中午恒報收報17794，跌461點；國指跌183點，報6042；恒科指報3626，跌183點，跌幅達4.8%。半日成交縮減至776.81億，對好友嚟講，跌市成交回落都係好事，反映沽壓唔算好嚴重。

藍籌股普遍向下，友邦(01299)跟大笨象(00005)分別跌1.8%及1.1%，港交所(00388)半日跌2.4%，暫時喺300元水平爭持，企得到嘅話，仲有機會上試320至350元水平。不過內銀跟內險股比較弱，始終內地經濟未有耐走出谷底，呢兩個板塊仲有一段時間要捱。

騰訊(00700)公布的業績好過預期，同時宣布派送美團(03690)股份作為特別中期息，其實之前騰訊都派過京東(09618)，當小股東收到實物派送後，京東係曾經出現短暫沽壓，但其後已再跟隨大市上落，唔係話派咗股就會表現一路差，美團半日跌咗5.7%，暫仍守150元。不過騰訊派得出去就變相減持，其他騰訊持有嘅股份怕步美團後塵，半日全線捱沽，當中以騰訊音樂(01698)跌11.3%表現最差，其他騰訊系股份跌幅由4%至10%不等。唔單止騰訊系股份下跌，其他科網股亦見沽壓，阿里(09988)今日收市公布季績，股價半日跌4%，其他科網股跌逾3%至10%不等。

港股由上月低位14600水平反彈，至日前見18400水平左右掉頭，期間亦兩度出現調整，目前升抵萬八點出現調整亦屬意料中事，只要大市仍守17400至17600，當10天線準備升穿50天線，再出現黃金交叉，大市重上萬八企穩，後市向上挑戰100天線（現為18786）嘅機會就更大。

麥狄文
(徐狄怡‧證監會持牌人)

 

信報 【盤房來料】恒指18000-18200阻力大需整固

 https://www2.hkej.com/instantnews/stock/article/3300008/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%81%92%E6%8C%8718000-18200%E9%98%BB%E5%8A%9B%E5%A4%A7%E9%9C%80%E6%95%B4%E5%9B%BA

上周五美國續升，雖然三大指數升幅有限，因為超買之下，高位需要整固，不過反映中概股嘅金龍中國指數急升6.6%，港股今早繼續爆升，加上內地放寛檢疫至5+3，以及中央救內房，港股今早一度高見萬八點。

恒指過去兩周累升2462點，今早再高開673點，見179999後，升幅曾擴大至最多685點，見18011超過一個月高位，不過18000水平未能企穩，其後升幅收窄至259點，見17585半日低位。半日恒指升505點，見17831；國指升199點，報6067；恒科指半日升123點，報3615，開市價6137已經係半日高位。留意半日成交額已達1259.87億元，當然恒指重上17000水平之上，成交額按比例增加係正常，不過半日有超過1200億元成交額，都好值得尊重。

不過大市咁嘅升勢，竟然唔係73隻藍籌全線上升，當中仲有7隻股份係無進帳甚至逆市跌。金融股表現唔錯，友邦(01299)半日升4.1%；平保(02318)更勁，半日升7.7%；銀行股方面，本地代表係恒生(00011)，半日升逾半成；招行(03968)係內地代表，半日升近一成。不過國有銀行就無咁好彩，皆因阿爺要救內房股，內房股嘅爛數，無奈又要由內銀嚟埋單，以港股呢期嘅表現，內銀股好明顯落後幾條街。而中銀香港(02388)半日逆市跌3.1%，成為半日表現最差藍籌股，內銀股都係樣樣衰衰咁。

人民銀行與中國銀保監會再度出手，向內地金融機構頒布一共16項措施救樓市，包括讓房企未來半年內到期的貸款可多展期一年。內房物管股續爆升，尤其之前死到入咗ICU嘅民企內房，呢一輪反彈最勁揪。碧桂園(02007)起死回生，呢隻一直係阿Man認為財務狀況較為理想嘅民企內房，只係之前旭輝(00884)同龍湖(00960)呢兩間示範民企都要違約，市場怕佢步其後塵，有理冇理掉咗雙碧先，搞到雙碧跌到一仆一碌，如今阿爺出手，雙碧自然亦彈得最勁。其他內房跟物管股半日升至少一成，之前死得愈慘烈嘅股份，反彈亦最強，閒閒地升兩成或以上。

美國債息回落，對醫藥生物股有利，整個板塊做好，生物科技指數半日急升6.6%，板塊內股份，升幅由4%至超過兩成不等，暫時仲有貨就睇住個美債息， 一旦美國10年長債重上4%以上要小心。

港股不經不覺已升抵整個反彈浪頂部，18000-18200阻力唔細，相信要進一步突破，除咗要成交保持暢旺之外，仲需要額外好消息配合，否則大市從上月中低位反彈逾3000點，都係時候抖抖，暫時睇住條50日線(17229)守唔守，守得住後市仍可向好，一旦失守，本輪反彈告一段落，其後時間或者係16000至18000之間徘徊，過埋下月年結，明年初再等基金作新一年資金配置。

麥狄文
(徐狄怡‧證監會持牌人)

 

【盤房來料】港股成交配合反彈可持續

 https://www2.hkej.com/instantnews/stock/article/3294399/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%B8%AF%E8%82%A1%E6%88%90%E4%BA%A4%E9%85%8D%E5%90%88%E5%8F%8D%E5%BD%88%E5%8F%AF%E6%8C%81%E7%BA%8C

上周五美股連跌四日後反彈，中概股則維持強勢，雖然廣州疫情惡化，中國衛生部門官員周六再次重申堅持動態清零「不動搖」，加上今早公布嘅出口及進口數據均遜預期，但無礙港股繼續反彈，上周反彈逾千點後，今早恒指低開高走，半日再錄得超過3%升幅。

恒指低開129點，最多跌180點，見15980半日低位後，萬六大關迅速收復，其後頭也不回直上，半日最高升至16821，升幅擴大至660點。中午恒指報收16714，升553點；國指升193點，報5676；恒科指半日升153點，報3417。大市半日成交額887.7億元，暫時成交額都維持到，有返咁上下，假如呢幾日成交額以全日計，又縮返去1000億樓下，咁就要小心反彈隨時完結。

藍籌股只有蒙牛乳業(02319)逆市跌0.3%，其他藍籌股全線上升，油價急升，三桶油表現唔錯，當中以中海油(00883)半日升4.3%至醒神。金融類股份亦全線向上，大笨象(00005)半日升5.1%；友邦(01299)半日亦升逾3%；平保(02318)更強勁，半日升6.2%。成交額近日回升，港交所(00388)亦有顯著反彈，半日再升6.1%，成功重返250元水平之上。

科網股半日做好，就連早段下跌嘅阿里巴巴(09988)都重返70元水平，半日倒升1.1%；騰訊(00700)、美團(03690)跟京東(09618)分別升逾3、4、5%。其科網股普遍錄得半成以上升幅。手機設備股亦做好，舜宇(02382)半日再升一成，最高見88.15元，但留意90元阻力唔細，早前有喺低位撈貨嘅，睇位食糊。至於半日最好表現嘅係先前跌到相當甘嘅商湯(00020)，半日升逾兩成，但股價仍然喺2元水平之下，難聽啲講醫返都嘥藥費，若然覺下仲有5元樓上嘅貨，只能自求多福。

跌得愈深就彈得愈甘，呢啲係基於鐘擺理論，不過就未必隻隻股都適用，內房板塊較年內高位跌七八成者比比皆是，就算今日彈返半成甚至一成，現價都仲係接近低位。作為幾間試點內房民企嘅龍湖(00960)跟旭輝(00884)已先後違約，剩返碧桂園(02007)未出事，半日升14.2%，成為升幅最大藍籌股，旗下碧服(06098)亦升12.7%。至於其他內房股，升幅由3%到15%不等。

今日升勢都頗為全面，喺油價回升下，資源價格亦向上，紫金(02899)收購招金(01818)兩成股權成第二大股東，前者升11.7%；招金升12.4%。江銅(00358)升6.6%；中國宏橋(01378)升6.5%。中鋁(02600)升7.9%。不過要追呢個板塊嘅股份，就寧願買返油股，又或者集中火力睇住啲指數重磅股，即係ATMJ仲實際。

麥狄文
(徐狄怡‧證監會持牌人)

 

【盤房來料】港股能否轉勢廿日線企穩為關鍵

 https://www2.hkej.com/instantnews/market/article/3292671/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%B8%AF%E8%82%A1%E8%83%BD%E5%90%A6%E8%BD%89%E5%8B%A2%E5%BB%BF%E6%97%A5%E7%B7%9A%E4%BC%81%E7%A9%A9%E7%82%BA%E9%97%9C%E9%8D%B5

雖然隔晩美股連跌第四個交易日，但中概股表現硬淨，加上夜期跟ADR未有跟隨美股下跌，唔多唔少預視今日港股回升，恒指噚日回吐逾400點後，今日重新出發，好友發功下，恒指一度升逾900點，更成功收復20日線(15986)。恒指高開103點，報15442已經係半日低位，其後升幅持續擴大，成功升破10日線(15347)，10日線企定買盤湧入，進一步上破20日線(15986)，半日更成功突破16000心理關口，最多升928點，見16267半日高位。半日雖略回至16200水平，但半日仍錄得874點升幅，報收16213；國指中午報收5511，半日升340點；恒科指更怒升7.7%，半日報收3269點。半日成交額887.2億元，半日有咁嘅成交額，一定要尊重一下。

藍籌股全線做好，連一向弱勢嘅內房股都有得升，資金入場有殺錯，無放過，友邦(01299)半日升3.4%，大笨象(00005)升2.4%，港交所(00388)半日更升6.8%。比亞迪(01211)上月銷量增加1.4倍，半日升6.2%。平保(02318)亦做好，半日升7.4%，真係無乜幾可。

中概股翻生，有傳聞指美國對中概股審計告一段落，中概股安然過渡，今日科網股升勢凌厲，ATMJ，以美團(03690)半日升8.6%升得最少，阿里(09988)跟京東(09618)半日升逾12%，騰訊(00700)亦錄得近一成升幅。其他科網股至少都升逾半成，升逾一成嘅科網股比比皆是。

內地又傳放寬防疫措施，市場憧憬短期內通關，餐飲零售股全線向上，呷哺呷哺(00520)爆升17.3%；九毛九(09922)大升11.6%；奈雪的茶(02150)急揚6.4%；海底撈(06862)抽高9.6%；海倫司(09869)爆升17.3%，餐飲股板塊表現強勁。內需股亦唔執輸，體品股普遍升半成以上，李寧(02331)更急升13%。

內房股半日借勢抽上，不過內房民企相繼違約，就算今次跟隨大市反彈，仍充斥住不明朗因素，其實仲有蟹貨，或者可以趁呢下反彈逃生，內房一日搞唔掂啲債務問題，都係有波幅，無升幅。

港股今日又嚟借消息千升，能否扭轉之前弱勢，要睇住16500有有本事上到兼企定定，另一個指標係條20日線，若然條20日線都守唔住，今日又係借消息純挾淡友嘅技倆，但如果守得住條20日線，喺短線超買再喺20日線樓上整固下，仲可以有條件再挑戰16500水平持續反彈，相反，失20日線嘅話，呢下反彈隨時又玩完。

麥狄文
(徐狄怡‧證監會持牌人)

 

信報【盤房來料】港股乏成交 弱勢未改宜忍手

 https://www2.hkej.com/instantnews/stock/article/3266610/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%B8%AF%E8%82%A1%E4%B9%8F%E6%88%90%E4%BA%A4+%E5%BC%B1%E5%8B%A2%E6%9C%AA%E6%94%B9%E5%AE%9C%E5%BF%8D%E6%89%8B

美股隔晚表現反覆，早段道指曾跌逾429點，主要是新公布的小非農新增職位20.8萬份，反映美國職位未有快速萎縮，尤其是9月私人機構薪酬升幅達到7.8%，遠超預期，即係就業市場唔算太差。就業市場仲ok，聯儲局就有條件繼續加息。加上連聯儲局鴿派官員都加把口，話目前無減息空間，美股早段死死下。不過去到低位又見有買盤出嚟買下嘢，雖然隔晚美股成交唔係大，但尾市有買盤入場，總算令三大指數跌幅收窄。

其實早兩日美股勁彈，主要係英國彈弓手，撤回減稅方案，美匯指數回落，債息同VIX亦從高位略為回落，造就美股嚟一下勁彈，不過美股始終未擺脫熊市陰影，尤其喺聯儲局要控制通脹的大前提下，加上就業市場又提供咗加息空間，睇怕美股仲有排反覆。

至於港股噚日報復式反彈逾千點，但成交只有1055億，成交額講唔上配合升幅，今日港股見回吐都好正常。恒指高開12點，開市報18100已經係半日高位，其後隨即向下，最多跌129點，見17958半日低位，大部份時間喺萬八水平爭持。半日恒指收報18010，跌77點；國指跌42點，報6181；恒科指跌33點，報3651。半日成交額又縮水至只有340.7億元，噚日升過千點都唔見成交大增，今日成交縮水亦正常，話晒北水仲放緊假。

藍籌股個別發展，ATMJ只有美團(03690)半日仍保持升幅，升0.2%；騰訊(00700)、阿里(09988)半日分別跌0.7%及0.4%；京東(09618)噚日升一成之後，今日回吐2.6%，又重返210水平之下。本地地產股今日表現唔錯，當中以九倉置業(01997)半日表現最突出，升4.2%，其他本地地產股則錄得少於1%升幅，但都算跑贏大市。

友邦(01299)半日靠穩，守於70元水平之上，收報70.25元；大笨象(00005)半日則跌近1%。內險跟內銀股回吐，只有平保(02318)半日仍靠穩無起跌。

汽車股明顯受壓，比亞迪(01211)噚日反彈企唔穩喺210元之上，弱勢未改，半日跌3%，報203.4元；小鵬(09868)跟蔚來(09866)半日分別跌8.2%及7%。傳統汽車股同樣受壓，長城汽車(02333)半日跌逾8%，吉利(00175)跌4.8%，成為表現最差藍籌股。呠呠車唔掂，但飛機就起飛，市場憧憬十一黃金周內地旅遊業暢旺，相關出行股造好，尤其航空股表現突出，國航(00753)半日升4.5%，東航(00670)升逾5%，南航(01055)更升6%。首都機場(00694)跟中民航信息(00696)半日分別升逾1%及2%。攜程(09961)跟同程(00780)半日分別升4.3%及2.1%。

港股激彈一日又回復平靜，暫時大市喺萬八點爭持，無咩方向，萬八關能否企穩仍屬未知數。多條移動平均線中，僅收復10天線(17661)，20天線(18276)咁啱係接近三月份低位18200水平附近，連呢個位都未企得返上去，就算噚日升咗過千點，港股都未講得上係乜嘢轉勢，只係熊市反彈就係咁嘅款，大戶要挾死淡友，一兩日就可以挾升千點，令淡友投降，轉個頭外圍有乜冬瓜豆腐，港股又回復跌跌不休嘅弱勢，呢啲時候就只有耐心等待，要捱得過熊市嘅寒冬，保持實力，才有資格參與下一次牛市。

 麥狄文
(徐狄怡‧證監會持牌人)

 

【盤房來料】港股沒有最頽 只有更頽

 https://www2.hkej.com/instantnews/market/article/3254482/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%B8%AF%E8%82%A1%E6%B2%92%E6%9C%89%E6%9C%80%E9%A0%BD+%E5%8F%AA%E6%9C%89%E6%9B%B4%E9%A0%BD

隔晚美股持續走軟，市場擔心聯儲局喺今年餘下時間大大加息，三大指數繼續下跌。美股腳軟，A股高開低走，港股唔有最頽，只有更頽，半日再跌逾百點，更失守萬八大關，再創十年九個月低位。

恒指低開92點，其後一度倒升18點，見18165，A股愈跌愈多之下，港股半日最多跌195點，見17952半日低位，同時再創自2011年12月19日以嚟新低。中午恒指報收17994，跌153點；國指跌58點，報6137；恒科指半日跌75點，報3598。半日成交額只有412.24億元，繼續係沽又唔見大大力，但又無乜人願入場博反彈。

藍籌股繼續受壓，ATMJ全線下跌，阿里(09988)跌穿80水平，半日跌近2%，騰訊(00700)、京東(09618)跟美團(03690)半日齊齊跌逾2%，不過暫時美團跟京東，都仲未跌返去3月低位，相對表現算硬淨。暫時美團要睇實160支持位守唔守，京東就下個支持位喺200，留意住呢兩隻叫硬淨啲嘅重磅股，當見底反彈，亦優先考慮掃貨。其他重磅股都係無厘神氣。舜宇(02382)已八連跌，今日再跌3.7%，藍籌之中表現最差。

有消息指港府最快今日下午公布再放寬入境措施，同時日本亦已宣布，下月11日起恢復免簽證自由行，相關出行股逆市上升，但講到成交都係唔多似樣。國泰(00293)半日升2%；持有機票格價網站Skyscanner嘅攜程(09961)則升2.9%；以經營日本旅遊業務為主嘅東瀛遊(06882)及縱橫遊(08069)，分別升13%及兩成。

大笨象(00005)帶頭加P息，香港正式踏入加息周期，木地銀行股逆市上升，只有大新銀行(02356)半日跌0.7%，其他本地銀行股升幅由不足1%至2.8%不等。除咗大新銀行(02356)半日跟市跌0.7%。除咗本地銀行股，中資電訊股半日亦做好，中電信(00728)最厲害，半日升3.5%。

不過今日有兩個板塊特別樣衰，包括綠能股跟生科股。市場擔心9月硅料產量大增，新特能源(01799)大跌12.1%；協鑫科技(03800)插6.9%。風電股亦見沽壓，龍源(00916)跟金風(02208)分別跌4.3%及3.5%。美債息持續向上，未有盈利兼對息率敏感嘅生科股捱沽，藥明生物(02269)失守50未見反彈，半日再跌2.2%，同系藥明康德(02359)亦跌3.2%。

當其他東南亞陸續開放邊境，一再放鬆防疫措施下，港股就算依家再放寛入境限制，而未能進一步放寛防疫措施，例如取消出行限制，去指定處所嘅防疫要求等等，相對都係缺乏競爭力。至怕係公布一個兩頭唔到岸嘅方案，到時吸引唔到遊客到港之餘，只有便利港人出國旅遊，咁就真係得不償失。

麥狄文
(徐狄怡‧證監會持牌人)

 

信報 【盤房來料】長周末前挾淡倉 升跌大戶說了算

  https://www2.hkej.com/instantnews/stock/article/3243598/%E3%80%90%E7%9B%A4%E6%88%BF%E4%BE%86%E6%96%99%E3%80%91%E9%95%B7%E5%91%A8%E6%9C%AB%E5%89%8D%E6%8C%BE%E6%B7%A1%E5%80%89+%E5%8D%87%E8%B7%8C%E5%A4%A7%E6%88%B6%E8%AA%AA%E4%BA%86%E7%AE%97

雖然鮑爺隔晚再放鷹，講到明要大大力加息以遏止通脹，不過市場都好似消化咗隻鷹，美股連續第二日反彈。港股跌咗足足六日，恒指累計跌咗近千點後，今日卒之有個似樣啲嘅反彈，半日急彈近五百點，成功收復萬九心理關口。

恒指今早高開39點，內地全國居民消費價格指數(CPI)及工業生產者出廠價格指數(PPI)比預期低，市場憧憬阿爺有機再放水，推動內地股市跟港股齊齊反彈。半日恒指一度升491點，見19345半日高位，高開高走。恒指半日升488點，報19342點；國指跟恒科指半日分別升2.9%及2.8%，半日成交額513.87億元，講真咁嘅成交額，係完全配合唔到個升幅，除咗挾淡倉，根本就唔係乜嘢轉勢升市。

藍籌股全面做好，連死死下嘅內房同物管股都有返啲起色，鄭州要求30天內爛尾樓全復工，若然有效或推行至其他城市，可以提振購房者信心，不過未有結果內房物管股就炒定先。此外，內地地方城市為樓市去庫存推出新政，據不完全統計今年以來內地超24個城市推出使用公積金「一人買房全家幫」房策，亦推動呢兩個板塊向上。碧桂園(02007)半日升近一成半，成為表現最佳藍籌股，仔仔碧服(06098)半日亦近一成。其他內房同物管股，閒閒地升半成以上。

科網股今日亦反彈，美團(03690)升半成，阿里(09988)彈逾3%，騰訊(00700)跟京東(09618)分別升逾1%及3%。不過除咗京東之外，ATM三隻指數重磅股，都仍然係大股東沽貨目標，南非股東要沽騰訊，日本仔軟庫等住沽阿里，而騰訊較早前傳出要沽旗下投資項目套現千億元，美團自然成為沽貨對象。講真，今日挾淡倉正正係趁反彈減持呢幾隻大股東要吼位沽貨嘅重磅股嘅好機會，一日大股東大把貨喺手等沽，呢幾隻股份都只會有波幅，冇升幅。

內地公布種植牙醫療服務政策，有分析指種植牙價格減價幅度細過預期，相關牙科股乘機落鑊，只不過呢啲股份急升只係啱睇唔啱炒，成交疏落，大上大落，一個唔小心追入好易又被套死。

港股長周末假期前挾淡友，擺明唔畀淡友舒服過周末，但今晚同周一晚美股走勢，或阻礙港股進一步反彈，美股有乜冬瓜豆腐，隨時周二港股返嚟又玩裂口，總之依家喺成交薄弱下，升升跌跌係大戶說了算，坐倉過夜風險回報唔成正比，都係坐埋一邊食花生算數，祝大家大個愉快中秋節。

麥狄文
(徐狄怡‧證監會持牌人)

 

信報【盤房來料】港股成交薄弱 大戶輕易舞高弄低

 https://www2.hkej.com/instantnews/stock/article/3233075/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%B8%AF%E8%82%A1%E6%88%90%E4%BA%A4%E8%96%84%E5%BC%B1+%E5%A4%A7%E6%88%B6%E8%BC%95%E6%98%93%E8%88%9E%E9%AB%98%E5%BC%84%E4%BD%8E

美股連跌三個交易日，美股三大指數跌1%或以上，隔晚夜期跟ADR死死下，港股今早裂口低開，但中國公布月製造業PMI好過預期，今早恒指低開後，一步步收復失地，雖然上半場仍收制於20日線(19901點)，但喺無乜特別利淡消息下，大戶要舞高弄低個市易如反掌，家陣上上落落都唔使點有個理由。

恒指低開359點，開市再插落去19564半日低位，跌384點，但內地公布PMI好過預期，大市跌幅顯著收窄至42點，見半日高位19906，但10日線未能企穩，始終A股都係插緊水。半日恒指半日跌78點，報19871；國指跌0.1%，報6832；恒科指一度跌逾2%，低見4123，但半日倒升0.8%，收4260。半日成交額545.07億元，繼續靜靜局局，正因為成交薄弱，大戶要做嘢係隨心所欲。

藍籌股普遍向下，不過美團(03690)就先低後高，半日倒升2.5%，騰訊(00700)亦唔執輸，半日跟京東(09618)齊齊倒升，三股叫做撐起個指數，即管睇睇下半場能否再下一城。不過內銀股表現就麻麻，工行(01398)跟建行(00939)雙雙公布業績，咁啱得咁橋，兩間內銀半年都係賺多5%，不過四大國有銀行無獨有偶，年年份業績都係共同進退，大家都習以為常，不過股價就跟隨大市下跌，半日分別跌0.5%及0.6%。其他藍籌股都係跟個市咁上下，半日跌幅畀早段大大收窄，咁嘅走勢，下半場隨時轉埋燈。

比亞迪(01211)雖然交出一份唔錯嘅業績，但股神畢非德一樣無面畀，喺8月24日減持咗超過一球股份，股價一度低見229元，但半日跌幅收窄至不足一成。股神沽貨隨時只係個開始，雖然減咗球幾貨，但手上仍持有逾二億股，要全數減持，呢條數都有排計，睇嚟未來一段日子，比亞迪可能跟騰訊一樣，喺主要股東減持陰影下，只會有波幅，冇升幅。比亞迪急跌拖累到整個汽車板塊下跌，不過跌幅當然無比亞迪咁甘，普遍跌幅都係4%以內，蔚來(09866)更逆市升2.8%。

港股升跌依家真係唔使理由，尤其成交薄弱，買賣兩閒下，大戶要操控指數上落易過借火，暫時短線波幅係19200至20200點，呢一千點上上落落都夠玩。至於個股就真係無乜信心坐定定，都係高沽低買短線操作為主，咁嘅成交，好明顯係塘水滾塘魚，邊有大型基金肯入場陪你坐貨。

麥狄文
(徐狄怡‧證監會持牌人)

 

【盤房來料】港股結算前二萬爭持 美團(03690)業績理想

 https://www2.hkej.com/instantnews/stock/article/3229794/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%B8%AF%E8%82%A1%E7%B5%90%E7%AE%97%E5%89%8D%E4%BA%8C%E8%90%AC%E7%88%AD%E6%8C%81

上周五美股插水，主要係鮑爺喺Jackson Hole年會上放鷹，市場憂慮美國加快收水步伐，之前過度樂觀情緒修正，資金由risk on 轉向risk off。不過中美雙方就中概股審計達成協議，周五晚夜期曾因為中概股帶動下，一度升至20700水平，無奈美股跌勢凶猛，夜期升幅大大收窄，今早更隨黑期回落低開。

恒指低開209點，半日最多跌280點，見19889半日低位，不過美團(03690)業績理想，總算令大市跌幅收窄，恒指跌幅收窄至115點，見20054半日高位。半日恒指報收20029，跌140點；國指跌44點，報6876；恒科指半日跌39點，報4262。半日成交額只有521.01億元，港股只係上周四半日市成交額叫做有啲睇頭，依家又維持靜靜局局。

藍籌股普遍偏軟，港交所(00388)半日跌2.3%，港股拍咗烏蠅咁耐，港交所估值又係算平，股價當然唔升得去邊，能夠守住320水平已屬萬幸。半日表現最好嘅藍籌，當然係美團，業績遠勝預期，半日升逾4%，不過190元至200元阻力唔細，唔係咁容易一步登天。美團為恒指貢獻近60點升幅，叫做保住大市守喺二萬關附近。其他藍籌股偏軟，而準備喺下星期加入嘅藍籌新貴翰森製藥(03692)半日跌一成，唔知會唔會好似呢兩年染藍嘅成份股咁，難以打破染藍插水魔咒。

物管股陸續派成績表，都預咗物管股跟內房股業績唔會好，世茂服務(00873)公布中期盈利跌逾75%，半日跌7.3%；而中期純利跌逾37%嘅綠城服務(02869)，半日更大跌16.6%。其他物管股全線向下，跌幅由超過2%至半成不等。

生科股今日沽壓較大，美債息回升至3%水平，美國嘅生科股受壓，港股呢邊嘅生科股亦難維持高估值，整個板塊今日沽壓重重。康希諾(06185)中期純利急跌逾九成，股價半日跌13.3%，其他生科技閒閒地跌4%以上。不過呢個板塊已較高位回落唔少，唔少股份都已回落至合理水平，作為長線投資，個別股份仍然可以開始分段收集。而質素較佳嘅，可以睇返藥明孖寶跟信達(01801)等龍頭。

期指明日結算，上周四喺只得半日市情況下，由低位19200抽上，斷估結算都會喺二萬水平附近了斷，待結算過後再出方向。提防美股上周急跌後，走勢急轉直下，一旦美股繼續插水，港股亦難獨善其身，港股繼續上落市嘅狀況，喺缺乏成交帶動下，唔會有乜睇頭。

麥狄文
(徐狄怡‧證監會持牌人)

 

【盤房來料】港股廢到遭股民遺棄

 https://www2.hkej.com/instantnews/stock/article/3219294/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%B8%AF%E8%82%A1%E5%BB%A2%E5%88%B0%E9%81%AD%E8%82%A1%E6%B0%91%E9%81%BA%E6%A3%84

美股隔晚個別發展，大型零售企業季績優於預期，道指升逾200點，連升五個交易日。至於悶極嘅港股，連續兩日走軟，共跌345點後，今早略為回升，可惜兩萬點關得而復失。恒指高開165點，跟着隨A股回軟倒跌29點，見19800，其後有買盤支持，大市止跌回升，一度升179點，見20009半日高位，可惜二萬大關得而復失，未能企穩。恒指半日升167點，報19997；國指升55點，報6783；恒科指升40點，報4261。港股半日成交額446.5億元，繼續悶局。

藍籌股個別發展，大笨象(00005)半日升0.7%，中移動(00941)半日升0.8%；創科實業(00669)旗下客戶Home Depot業績優於預期，創科半日升近6%，藍籌之中表現最好。至於噚日有外媒報道騰訊(00700)計劃出售美團(03690)股份，美團噚日股價急挫一成，其後騰訊內部人士指有關減持傳聞不實，美團半日反彈4.6%，為恒指貢獻61點升幅，不過都無法完全收復噚日失地。騰訊今日公布季績，股價偏軟，半日跌0.1%。另外兩隻重磅股，港交所(00388)跟友邦(01299)亦分別跌0.4%及0.1%。

港股無乜方向，市場就跟住消息炒作，之前有傳股神要減持比亞迪(01211)股份，比亞迪股份就由320元水平急挫，噚日就輪到美團，仲有騰訊被南非股東減持；阿里(09988)主要股東軟銀，亦透過出售遠期合約減持阿里。無論點都好，暫時反映呢啲已經由高位調整至合理水平嘅重磅股，大股東亦因為種種原因，喺現水平都仲想減持，試問咁嘅情況下，港股點會有運行。

電力股今日保持升勢，又係趁個別消息炒住先，板塊內股份大多維持上升，只有華電(01071)半日回吐近1%。近日內地股市有轉好趨勢，內地券商股造好，不過券商股難炒都唔係今日先知，今日追貨唔知聽日事，呢啲情況都係靠邊站，食花生算數。

整體港股繼續喺二萬水平窄幅上落，乜嘢水盡鵝飛、乏善可陳，呢類說話再講都多餘，港股廢到一個點，被股民遺棄都好正常。

麥狄文
(徐狄怡‧證監會持牌人)

 

【盤房來料】港股長假後表現反覆 暫仍難走出上落市格局

 https://www2.hkej.com/instantnews/market/article/2761049/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%B8%AF%E8%82%A1%E9%95%B7%E5%81%87%E5%BE%8C%E8%A1%A8%E7%8F%BE%E5%8F%8D%E8%A6%86+%E6%9A%AB%E4%BB%8D%E9%9B%A3%E8%B5%B0%E5%87%BA%E4%B8%8A%E8%90%BD%E5%B8%82%E6%A0%BC%E5%B1%80

人家美股次季開局表現強勁，雖然隔晚回吐，但相對周一升幅，隔晚回吐相當溫和，相對港股表現真係弱過藥煲，主要係港匯見一年低位之外，A股表現亦欠佳。恒指高開162點，報29101點，重返29000並創逾兩周高，不過開市無耐已掉頭，曾倒跌267點，見28671點半日低位兼一度失守20線(28704點)。恒指中午收報28751點，跌187點；國指半日跌119點，報收11097點；恒科指跌91點，報收8478點。

藍籌股以重磅科技股表現較疲弱，ATMX全部向下，小米(01810)跌勢較溫和，暫時仍守26元；騰訊(00700)、美團(03690)跟阿里(09988)分別跌3.1%、1.4及1.2%，三股合供拖低大市130點。京東(09618)撤回旗下京東數科於內地上市申請，而分拆京東物流又無乜聲氣，股價半日跌3.6%，留意短線支持位320元不容有失，否則有機會再下試300水平找支持。

友邦(01299)半日跌1.4%，又重返接近呢期低位。除咗友邦，中資金融股亦顯著受壓，尤其係假期前落鑊炒起嘅券商股，今日普遍跌2%或以上。唔單止券商股腳軟，內險股亦見沽壓，一線跌勢較輕，二線好似太保(02601)呢啲，半日跌咗8%，話咗內地金融股搞唔過。

航運股表現突出，中遠海控(01919)料首季賺近155億元人民幣，中金指表現遠超預期，股價飆25.3%，帶動其他航運股整整炒高。集團旗下東方海外(00316)創新高，半日升12.8%。除咗中遠海控發盈警推動股價向上，晨鳴紙業(01812)半日一度急升15.8%，同樣發盈喜指今年首季盈利按年增長超過4倍，但中午收市升幅縮水得番5.3%，圖表走勢強差人意。

總括今日港股表現疲弱，主要受到港匯跟A股弱勢所拖累，而欠缺北水支持，亦令港股無神無氣，睇嚟港股今個月仍難走出上落市格局，除非有北水大量流入撐起港股，恒指至少要重返29200-29500水平靠穩，港股呢個月先有機會向上行。

麥狄文

(徐狄怡‧證監會持牌人)

 

【盤房來料】次季開季做好 回勇與否仍待觀察

 https://www2.hkej.com/instantnews/stock/article/2757827/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%AC%A1%E5%AD%A3%E9%96%8B%E5%AD%A3%E5%81%9A%E5%A5%BD+%E5%9B%9E%E5%8B%87%E8%88%87%E5%90%A6%E4%BB%8D%E5%BE%85%E8%A7%80%E5%AF%9F

今日 14:15 港股直擊 即巿股評

 

美滙指數兼美國10年期債息回落，隔晚標指創收市新高，港股第二季開季有個好開始，半日升逾三百點，恒科指更升逾3%。恒指高開216點，報28594，成功收復10日線(28445點)，不過財新3月中國製造業PMI降至11個月低，恒指升幅曾因此收窄至133點，見28511半日低位。幸而A股走強，港股重拾動力，推動恒指最多升343點，見28721半日高位，可惜未能企穩20日線(28713)。恒指半日收報28699，升321點；國指收報11122，升150點；恒生科指中午升288點，半收報8472。雖然上半場唔少股份有不俗升幅，但假期前夕，缸邊友傾向審慎，半日成交額894.58億元，算唔上配合升幅。

藍籌股個別發展，大笨象(00005)跟友邦(01299)逆市跌1%及0.5%，今日資金又流返去科技股板塊，而阿Man早兩日講過，開始喺投資組合內再配置醫藥股，龍頭藥明生物(02269)有瑞銀唱好，大幅調升其目標價至142元，雖然股價半日已升5.6%重返紅底股，但現價距瑞銀目標仍有四成上升空間。阿Man喺95樓下叫收集，家下上返紅底，暫時睇埋105元阻力有冇機會假後突破。

科技股之前高位回落殺估值，阿Man喺個幾星期前，已表示殺估值已告一段落，相關股份需要時間整固，成功尋找支持後，仍需要時間消化蟹貨，而呢個過程唔會係三兩個交易日搞得掂。

今日呢個板塊做好，JATMX當然全線回勇，之前阿Man已畀晒呢幾大巨頭嘅收集區間，有心建倉應該買晒貨上咗車。二線科技股之前插得深，反彈起上嚟就相對甘，當中心動公司(02400)獲阿里(09988)及嗶哩嗶哩(09626)入股，半日勁升15.5%。其他二線科技股閒閒地升5%或以上，升一成過外嘅亦大有股在。不過假期前夕，阿Man堅決唔追貨，反正經過一輪執倉，兼增加短線操作後，倉位已恢復至一個相當舒服嘅水平，輕倉渡長假期，假後再睇下呢吓科技股係虛火，抑或有本事強勢回勇。

內房股繼續走軟，阿Man千叮萬囑咪多手追貨，原因都唔再多講，亦無謂呢個時候踩多腳，總之物管股跟內房股二選一的話，阿Man毫無猶疑揀物管股。值得留意係今日有多達37間公司停牌，原因係呢批公司都未能趕及最後死線公布業績，大部份公司解釋係受疫情影響核數進度，比較特別係協鑫系嘅保利協鑫(03800)跟協鑫新能源(00451)呢兩間公司，將公布業績之期一改再改，一拖再拖，雖然公司表示已跟核數師達成共識，即係公司非因疫情問題而阻礙核數進度，至於盤數有乜嘢問題，要等公司公布。

(徐狄怡‧證監會持牌人)

 

【盤房來料】內房資源股高追中伏必應驗

 https://www2.hkej.com/instantnews/market/article/2755645/%E3%80%90%E7%9B%A4%E6%88%BF%E4%BE%86%E6%96%99%E3%80%91%E5%85%A7%E6%88%BF%E8%B3%87%E6%BA%90%E8%82%A1%E9%AB%98%E8%BF%BD%E4%B8%AD%E4%BC%8F%E5%BF%85%E6%87%89%E9%A9%97

美匯指數回復強勢，令資金流出新興市場及亞洲區股市壓力增加，港股彈咗三日累升超過600點後，今早高開低走，長假期前夕買賣兩閒，投資者態度審慎，尤其喺美國10年長債息趨升下，更唔願加大風險胃納。恒指高開225點，雖然曾收復20日線(約28748)，但今早開市價28802點已經係半日高位。恒指受制20日線，觸及此點即見沽盤湧現，大市掉頭向下，半日最多跌191點，低見28385半日低位，10日線(約28533)亦告失守。中午恒指報收28488點，跌88點；國指跌43點，半日報收10976點；恒科技半日升16點，報收8196點。半日成交進一步縮水至866.76億元，預咗呢兩日成交額縮晒水。

藍籌股個別發展，半日表現最好竟然係升2.5%嘅中信(00267)，呢隻股阿Man幾乎已遺忘，差啲唔記得佢係藍籌股；而表現最差嘅藍籌係萬洲(00288)，剛派完成績表，核心盈利少賺近三成，股價半日跌11.2%，藍籌股半日跌逾一成真係無乜幾可。

雖然隔晚美國嘅重磅科技股腳軟，但喺港股呢邊嘅JATMX，除阿里(09988)喺220元水平無神無氣之外，其他四大巨頭半日均見進帳。美團(03690)重返300大關，半日升2.3%，但能否企穩仍屬未知數，300大關料有爭持。

狼來了故事喺小米(01810)身上發生N次，公司終宣布成立全資子公司進軍能電動車市場，股價早段曾升6%，但半日升幅窄淨0.6%。其實有關小米造電車嘅消息，市場傳咗N咁多次，早已無晒驚喜，加上阿爺剛剛先點名批評恒大汽車(00708)紙上造車，炒起股份市值幾千億，好明顯係唔多滿意汽車製造商借發展新能源車作為炒作藉口。

值得安慰係雷總講到明，公司資金雄厚，有成千億本錢投資呢項業務，即使公司表示未來10年將投資100億美元去搞電車，暫時公司都無集資壓力。而小米已派完成績表，早前公司表示將以200億元回購股份，至少股價有一定支持。作為中線投資，雖然小米今年未必能衝破萬億市值，股價見40元，但阿Man有信心，小米要重返30元至32元無乜問題，25邊呢啲位買，穿22打靶都值博。

阿Man講過高追內房股好易中伏，話口未完，今日內房股又冚包散，萬科(02202)於三條紅線政策中，有一條超標，中午插6.4%；世茂(00813)核心利潤低於預期，中午大跌8.6%；其他內房股閒閒地跌3%或以上，融創(01918)僅跌0.3%已經算硬淨。總之喺三條紅線政策下，內房股都好難發圍，回得急可以撈，高追免問。

另一個阿Man好少沾手嘅板塊資源股，今日亦全線插水，喺美匯指數回升至5個月高位下，商品價格難免受壓，相對內房股，呢個板塊回調時，阿Man係連趁低撈貨嘅興趣都欠奉。

麥狄文

(徐狄怡‧證監會持牌人)

 

 

【盤房來料】連登契媽開新ETF 科技股齊齊贈興

 https://www2.hkej.com/instantnews/market/article/2753188/%E3%80%90%E7%9B%A4%E6%88%BF%E4%BE%86%E6%96%99%E3%80%91%E9%80%A3%E7%99%BB%E5%A5%91%E5%AA%BD%E9%96%8B%E6%96%B0ETF+%E7%A7%91%E6%8A%80%E8%82%A1%E9%BD%8A%E9%BD%8A%E8%B4%88%E8%88%88

 

美國家族投資公司Archegos資本管理未能補交孖展而遭斬倉，拖累多隻中概股上周遭大洗太平地，而野村跟瑞信更因此錄得巨額虧損，雖然令市場有所憂慮，但暫時未見有其他投行瀨嘢，亦未見有其他基金再爆煲，望就望事件唔會繼續發酵，演變為雷曼兄弟事件2.0。美股隔晚個別發展，道指再創收市新高升98點，標指跟納指則分別跌3點及79點。港股連升三日，嚟到3月期指結算日上返條10日線(約28597)，隔晚美股嘅中概股止跌，帶動港股呢邊嘅科技指數返彈逾3%。

恒指早段高開214點，A股走強，帶動港股升幅擴大至最多341點，成功收復10日線，半日高位見28679點。恒指報收28672點，升334點；國指報收11063，升120點；恒科指中午升252點，報收8233點。半日成交額922.92億元，長假期預咗市場會較為審慎，雖然半日升市成交低過1000億元，仍可以接受。

雖然美國10年債息重上1.7厘 以上，但一如阿Man呢幾日咁講，科技股經過一輪殺估值，而市場亦已開始接受債息趨升嘅預期，科技股已無再插水。加上由連登契媽主理，針對太空開發創新技術ARKX，計劃今晚上市，咁都要贈一贈興，科技股普遍做好。契媽呢個「太空倉」持股包括JATMX之中嘅美團(03690)、騰訊(00700)、阿里(09988)同京東(09618)，雖然諗到頭都大埋，唔知呢四大天王同太空開發創新技術有乜關係，但有理無理，有契媽射住係唔同啲，半日美團彈5%最勁，京東跟阿里半日升3%，騰訊只有1%進賬，似乎契媽威力遠遠不及北水大媽……

藍籌股方面，銀行股做好，利率趨升有助拉闊銀行息差收入，大笨象(00005)、中銀香港(02388)走高0.2%；工行(01398)漲0.2%。話咗內房股高追無着數，兼且呢期派完成績表好多股份都見光死，潤地(01109)跟中海外(00688)派完成績表均逆市下跌，前者跌3.7%，後者跌4.6%，表現最差兩藍籌。

早兩日阿Man曾經喺聊天室表示，係時候要配置返啲醫藥股喺投資組合內，首選龍頭藥明生物(02269)，上半場一度重上紅底，半日升3.8%，呢隻值得中長線持有。海吉亞醫療(06078)去年經調整利後勁賺八成，半日大升一成，康龍化成(03759)跟君實生物(01877)半日亦錄得同樣升幅。

阿爺開到口話要注意新能源汽車炒風，更點名批評恒大汽車(00708)，半日再跌2.4%，跌幅較預期少，其他汽車股普遍下跌。小米(01810)近日屢傳有意加入電動車市場，但集團每次否認傳聞踢爆狼來了，指一直未為有關業務發展立項，小米唔知係早能預測阿爺心意，抑或雷軍行緊運。

麥狄文

(徐狄怡‧證監會持牌人)

【盤房來料】恒指雖收復頸線 仍需時確認見底

 https://www2.hkej.com/instantnews/market/article/2749205/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%81%92%E6%8C%87%E9%9B%96%E6%94%B6%E5%BE%A9%E9%A0%B8%E7%B7%9A+%E4%BB%8D%E9%9C%80%E6%99%82%E7%A2%BA%E8%AA%8D%E8%A6%8B%E5%BA%95

美股隔晚先跌後回升，市場一邊擔心聯儲局鮑爺忽然鴿轉鷹，另一方面又憧憬拜登政府可能推巨額基建方案，美股都叫有啲利好消息支持。至於港股跌足五日，恒指唔見咗千五點後，今日卒之識反彈，半日重返二萬八水平。

恒指高開144點，即返100天線(27963點)及二萬八，甫開升幅收窄至114點，見28014點半日低，之後愈升愈有，曾彈391點，見28291點半日高。恒指中午收報28218點，升318點；國企指數報10893點，升149點；科指升1.6%，報8073點。可能係周末效應關係，半日升市成交不足一千億元，相對早幾日跌市成交較多，今日嘅反彈略嫌力度不足。而恒指雖然重上28200重要頸線位，但仍需要企穩至少三個交易日，才能確定短期見底，下周二期指結算，如結算後大市仍能守住頸線，季結完成後，下個月港股表現或有改善。

雖然隔晚個別中概股仍於美股下挫，但今早港股嘅科技股則個別發展，第二上市新丁百度(09888)隔晚喺美股跌逾一成，今日再創上市後新低，半日跌5.7%，暫時都係睇定啲。雖然移卡(09923)去年賺多四倍，但收入增長只有1.5%令人失望，半日股價跌8.5%，咪見跌得多去接刀，現價已失3月9日低位都仲未識得彈。有消息指小米(01810)有意選用長汽(02333)車廠生產自家電動車，兩股分別升6.7%及11.9%，不過小米到呢一刻仍未就發展電動車立項，狠來了故事唔嫌多，有貨可以選擇持有，但急升嚟追貨小心又中伏。其他科技股表現向好，JATMX只有阿里(09988)半日續跌2.6%，但阿里現價估值相對低，諗唔到一個理由要喺呢啲水平沽貨。

內房股及物管股今日表現唔錯，只有禹洲集團(01628)公布有關盈利預警的補充公告，料去年股東應佔利潤按年大減96.8%，半日挫13.7%；同埋佳兆業(01638)大幅折讓25.13%供股，半日挫9.9%。其他內房股及物管股均有進賬，兩個板塊要二選一，阿Man都係偏愛物管股多啲。

基於大市仍未能確定止跌回升，今日又係周五周末前夕，早兩日跌到仆直時未敢撈貨嘅，今日已無乜可以做，除咗食花生之外，至於低位有撈貨嘅，一兩日已有5%或以上盈利，不妨考慮食糊，就算唔食全餐都可以食半留半，記住個市暫時反覆走勢未改，即使已確認見底，亦唔會三扒兩撥就上返三萬點，總有機會畀位你上車，戒急用忍方為上策。

麥狄文

(徐狄怡‧證監會持牌人)

 

 

【盤房來料】高增長未穿前低位 殺估值已屆尾聲

 https://www2.hkej.com/instantnews/market/article/2746378/%E3%80%90%E7%9B%A4%E6%88%BF%E4%BE%86%E6%96%99%E3%80%91%E9%AB%98%E5%A2%9E%E9%95%B7%E6%9C%AA%E7%A9%BF%E5%89%8D%E4%BD%8E%E4%BD%8D+%E6%AE%BA%E4%BC%B0%E5%80%BC%E5%B7%B2%E5%B1%86%E5%B0%BE%E8%81%B2

各地疫情反覆，歐洲及東南亞個別地區疫情大幅反彈，美國大部份地區亦未見疫情有緩和，似乎疫苗面世亦未能控制疫情，市場憂慮經濟復甦進速受阻，加上新興市場波動，投資者擔心土耳其事件拖累其他新興市場。資金加快RISK OFF，加上美債息回落，資金再流入債市，美匯指數喺亞洲時段創四個月新高，反映資金正流出亞太區市場，港股今日創兩個半月低位。

恒指低開59點，開市後跌幅一度收窄至39點，見28457點半日高位，其後A股愈跌愈多，港股跌幅隨之擴大，恒指失守二萬八，曾插603點，見27894點近兩個半月低。恒指中午收報27954點，跌542點；國企指數報10868點，跌242點；恒科指則跌近3%，報8057點。半日成交回升至過千億元，反映半日沽壓甚為嚴重，走資情況正加劇。

藍籌方面，吉利(00175)業績後被大行降評級兼狠削目標價，半日跌13.3%，藍籌之中包尾，集團回A受阻，H股估值或受影響，不過集團發展新能源汽車目標清晰，股價回落至20樓下似乎有啲跌過籠。至於恒安(01044)半日逆市升1.1%，係表現最好藍籌。醫藥股中，阿Man一直偏愛藥明系，藥明生物(02269)交到功課，股價半日升近1%。

騰訊(00700)將於今日收市後公布業績，半日跌1.1%，未有貨等埋業績出先再算，有貨想加注都係要睇定啲，不過暫時作為長線投資，610至630之間收集策略無變，預期業績唔會出咩岔子，今日亦未算跌到反艇，暫時上次低位613未見。

快手(01024)去年虧損1166.3億元人民幣，按年擴大4.9倍，股價插10.7%為表現最差科指成份股；其實快手嘅虧損當中，2019年的可轉換可贖回優先股公允價值變動分別為負1068億元及負199億元，主要係公司估值增加所致，實際上業績符合預期，電子商務GMV表現強勁，毛利率亦見擴闊，今日插水超過一成又係跌過籠，上次低位250元做止蝕參考，呢啲價入場夠值博。其他科技股普遍偏軟，之前又話債息升，高增長股吸引力大減引發深度調整，依家呢一下再插，其實大部份都無去方上次嘅低位，殺估值應該殺得七七八八。

至於恒指再插水，同恒指牛證重倉有一定關係，暫時多個恒指牛證重貨區都已被劏，現價最接近嘅一個重貨區喺27800，殺埋呢一個重貨區，正路會反彈，關鍵係劏完肥牛個市能夠迅速重返28200頸線企穩，守得住條頸線個市就死唔去，守唔住只有繼續向下尋底。缸邊友要好好審視投資組合倉位，現階段絕對不宜槓桿，衍生工具可免則免。

麥狄文

(徐狄怡‧證監會持牌人)