【盤房來料】騰訊步阿里後塵 金融業務面臨拆骨

 https://www2.hkej.com/instantnews/market/article/2809281/%E3%80%90%E7%9B%A4%E6%88%BF%E4%BE%86%E6%96%99%E3%80%91%E9%A8%B0%E8%A8%8A%E6%AD%A5%E9%98%BF%E9%87%8C%E5%BE%8C%E5%A1%B5+%E9%87%91%E8%9E%8D%E6%A5%AD%E5%8B%99%E9%9D%A2%E8%87%A8%E6%8B%86%E9%AA%A8

 

美股隔晚牛皮靠穩，市場靜待周五經濟數據對通脹有否啟示，但反而就見散戶團抱股GME又嚟料，睇嚟啲散戶係見美股回穩咗，入市炒作都積極返啲。至於港股呢邊連升咗兩日，恒指進帳七百幾點後，今早即使A股低開高走，都唔係好推得上個港股，證明港股29300呢啲阻力唔容易克服。恒指低開167點，早段曾跌250點，見28950點半日低，但喺100日線(28896點)上方見支持，跌幅曾收窄至8點，見29157點半日高。恒指中午收報29078點，跌87點；國企指數報10810點，跌45點；恒科指半日升20點，報8093點。半日成交額略增至923億元，回吐先嚟增加成交，都係小心啲好。

人民幣維持強勢，加上中國商務部表示，中共中央政治局委員、國務院副總理、中美全面經濟對話中方牽頭人劉鶴，與美國貿易代表戴琦(Katherine Tai)通話，帶動A股先低後高，A股強勢持續，呢點對港股後市發展係好事。

藍籌股個別發展，乏善可陣，科技股同樣係咁，不過半導體股表現較為突出，中芯(00981)、華虹半導體(01347)升逾6%，後者係最大升幅科指成份股；ASM太平洋(00522)半日升4.7%。ATMX阿Man話咗短期係得小米(01810)有運行，交出一份標青業績，多間大行調高其目標價，股價早段曾升穿29元，可惜未能企穩，暫時小米守住28元上面，有貨唔急走，無貨等埋結算市況係咪真正扭轉之前弱勢，再決定追貨與否。

至於ATM其他三成員，繼阿里(09988)旗下螞蟻集團被整改，估值被大幅調低後，又輪到騰訊(00700)被內地監管機構下令騰訊分拆旗下金融相關業務，並組金融控股公司以便監管。話口未完，又輪到佢被拆骨，即使騰訊一向循規蹈矩，並標榜主動節制金融業擴張步代嘅騰訊嘅金融業務亦難逃此劫，步阿里旗下螞蟻集團後塵。而美團(03690)將於明日公布業績，阿爺仍未落實對美團有關涉遺反壟斷法嘅罰款，市場擔心美團要大派贖罪券，股價半日跌2.8%。

單係ATM都已拖住大市升唔起，暫時能守二萬九已偷笑。

醫藥股續有資金追捧，除左石藥(01093)、中生製藥(01177)同藥明生物(02269)幾隻藍籌藥股半日逆市向上外，二三線醫藥股更受歡迎，醫美股昊海(6826)升7.5%，不過幾十億市值嘅貨仔，人為操控相當容易，一向唔係阿Man杯茶；同樣復宏漢霖(02696)又係百億市值唔到。其實呢一堆二三線醫藥股，唔少由幾十億市值炒至過百億，最終邊啲係實力派可以留低，到水退嗰日就一目了然。

麥狄文
(徐狄怡‧證監會持牌人)

 

【盤房來料】公司配股控股股東減持為大市平添沽壓

 https://www2.hkej.com/instantnews/market/article/2774074/%E3%80%90%E7%9B%A4%E6%88%BF%E4%BE%86%E6%96%99%E3%80%91%E5%85%AC%E5%8F%B8%E9%85%8D%E8%82%A1%E6%8E%A7%E8%82%A1%E8%82%A1%E6%9D%B1%E6%B8%9B%E6%8C%81%E7%82%BA%E5%A4%A7%E5%B8%82%E5%B9%B3%E6%B7%BB%E6%B2%BD%E5%A3%93

 

全球多地疫情反彈，尤其新興市場國家如印度疫情嚴峻，影響投資市場氣氛，隔晚美股繼續回吐，三大指數均見下跌，港股一向跟唔上美股向上嘅步伐，反而美股跌就為港股平添沽壓，恒指彈咗三日之後，今早一度跌逾600點。恒指低開433點，50日線(29185點)及10 日線(28823點)雙雙失守，開市後跌幅曾一度收窄至357點，見28778點已屬半日高位，其後沽壓再增，再跌628點，見28506點超過一星期低位，略穿20天線(28633點)後喘定。恒指中午收報28661點，跌474點，總算守位20日線；國指半日跌179點，報收10905點；恒科指則143點，報收8168點。跌市半日成交額增至917.61億元，升跌股份比例為七三，不足三成股份下跌。

藍籌股只有公用股力保不失，煤氣(00003)跟中電(00002)半日逆市微升0.5%及0.1%；重磅藍籌友邦(01299)半日跌近2%，大笨象(00005)更跌逾2%；油價隔晚回軟，中石化(00386)半日跌4.7%；吉利(00175)則於近日回升後回吐，半日跌3.5%。

科技股受壓，阿Man講過平台股受政策風險所困擾，有排無運行，JATMX全線下跌，小米(01810)最唔受政策風險影響，半日跌1.7%算最硬淨。阿里(09988)半日跌3.1%；騰訊(00700)跟美團(03690)分別跌1.5%及2.4%；快手(01024)跟京東(09618)兩股齊跌餘3%。網易(09999)跟百度(09888)則分別跌逾1%。眾多科技股中，只有ASM太平洋(00522)因為首季純利勁升21倍，股價半日逆市升14.4%。醫藥股有資金追捧，除咗藍籌股藥明生物(02269)隨大市回吐，多隻生物科技股逆市做好，整個板塊升幅閒閒地超過2%，最勁嘅亞盛醫藥(06855)半日更升逾一成。

繼美團跟騰訊進行大型配股後，安踏(02020)亦有控股東減持股份套現，以每股作價131.48元，配售8800萬股，佔已發行股份約3.26%，配股價較噚日收市價折讓7.54%，係接近下限範圍訂價，控股股東套現115.7億元，拖累股價半日跌7%。安踏今次係控股股東自2014年10月以嚟首次批股，控股股東嘅配股行動，難免令市場揣測安踏已反映其估值，甚至係估值「到頂」。留意板塊另一龍頭李寧(02331)現價估值較安踏仲要高，唔排除徘徊高位或有機會進行配股，又或者惹嚟控股股東減持套現。

麥狄文
(徐狄怡‧證監會持牌人)

 

【利好晶片股】中信里昂料8吋晶圓將供不應求

【利好晶片股】中信里昂料8吋晶圓將供不應求

2019年12月5日 18:04

【Now新聞台】在本港及台灣上市的晶片股均有追捧。

中信里昂發表報告，指近期半導體需求增加，亞洲的8吋晶圓產能已經接近用盡，而明年有數個因素會令8吋晶圓的供不應求，包括5G手機的生產、指紋辨識設備的需求，以及中國大陸加速「去美國化」，即減少使用美國的晶片及零件。

里昂預期今次供應短缺可能會維持較長時間，多家廠商可因而受惠，包括華虹半導體，評級由「跑輸大市」調高至「買入」，股價收市升15%。中芯國際及ASM太平洋升2%至3%，而台灣上市的聯電及世界先進評級亦獲里昂調高。