2017/04/21
香港電視（01137）創辦人兼主席王維基，最初成立公司是為了申請免費電視牌照，卻因「一籃子」因素申請失敗，轉攻網購平台，在2015年成立HKTVmall。兩年間有逾1,300個商戶加盟，提供13.5萬件產品給顧客選擇，平至水果、零食、飲品等超市商品，貴至傢俬和珠寶首飾都有得賣。
今年55歲的他仍不時被人叫魔童，人生已四度轉型，由做長途電話IDD起家到光纖寬頻，再半途出家走進天天燒銀紙的電視行業，坦言買梳化一定要坐過摸過的維基，兩年前更轉為經營觸摸不到的網購平台，
其實都係迫出嚟，你估我（最初）想做ecommerce咩？條路係人行出嚟，我們捱咗兩年幾。
香港電視近月公布的業績仍是滿江紅，去年全年業績蝕2.57億元，但營商經驗豐富的王維基未有放棄，致力將HKTVmall打造成全港最大型的網購平台，他在互聯網研討會上分享作為電商新丁之路，
「雖然我地股價一落千丈，我話俾你哋聽我輸咗2億幾，但今日我的（網購）生意係接唔晒。」
他開設的網購平台上，有各式各樣的產品供客人選購，除了有一般超市可以買到的食品和日常用品，還有傢俬、家電、Coupon等，產品逾13萬件。即使售幾千元的梳化、以萬元計的珠寶首飾，同樣有捧場客。
他認為香港的網購風氣盛行，就如坊間有不少提供代訂套票的網上旅行社，吸引市民在手機上訂購機票、酒店，偏偏家品、電器、傢俬等產品，卻缺乏優質網購平台，「我覺得好多人誤解市場無呢個需要，所以無Supply，我的睇法係相反，正因為無Supply，所以消費者唔能夠提出Demand。」
幾千蚊梳化一樣大賣
不少人認為，在香港創辦電商平台是一個愚蠢的做法，「呢度唔係美國、歐洲，香港係好細的城市，一行落去，周圍都有嘢買，好方便。」加上市民大多喜歡看實物，買嘢一定要親手掂到、摸到才有信心，王維基也曾是其中的一分子，
我今年55歲，我覺得買梳化一定要試坐吓、摸吓，所以我都唔明白賣幾千蚊的梳化，點解上星期賣咗200幾張，我只可以講一句，原來我唔認識我啲消費者。
網購平台的生意逐漸增長，或者是印證他理論正確。現時公司每日定單數目由一年前的1,300多宗，增加至今年3月的3,000多宗，有一日的定單數目更差點突破7,000宗。每宗交易金額也由一年前的500元，增加至今年的630元，
客戶幫襯我們一兩次後，唔會再落去（超市）買洗潔精、抬洗衣粉和米，我平過超級市場，多貨過超級市場，又送埋上你屋企，有乜理由唔同我買？
自動化物流提升效率
HKTVmall設有20萬平方呎貨倉，雖然面積大，可存放更多產品，但提取貨品卻遇上困難，
例如一張單買20樣嘢，同事要推住一架車仔，在20萬呎貨倉同你執呢枝豉油、呢包出前一丁。
這種做法成本高，效率緩慢，故公司正在安裝香港首套全自動化物流設備，預期今年暑假完工。解決了物流，也要處理伺服器的問題，「今日（11日）中午11至12點，因為太多生意（定單），成個Server冧咗，需求大得好緊要，就算我哋點樣加Server都追唔切。」
經營網購平台的另一困難，就是要突破中年和老年人去實店購物的習慣，王維基也坦言，最希望媽媽能幫襯他，
我最想阿媽幫襯我，因為媽咪和爸爸用多啲電腦或者互動平台，老人痴呆症會少好多。
然而，如何改變母親購物習慣，需要親身去教他們，設立實體店是其中一個方法，「有舖係度，如果他們真係唔明可以去問，會安心好多。」
HKTVmall自設車隊，送貨的員工大多彬彬有禮，也成為和顧客接觸的另一防綫，「如果唔開實店，唯一與客人親身接觸的就是係送貨員，點解唔俾其他物流公司去派，係因為我控制唔到佢地。」故他規定員工要有禮貌，不能夠染髮，予人整齊和有禮的感覺。
海怡半島舖生意增6倍
半年前，公司在北角和富開設第一間實體店舖，其後在海怡半島開分店，每間舖不多過500平方呎，店內賣的並不是貨品本身，而是賣「排場」。「我唔係想啲客即場買玩具，而是想話俾市民聽，我呢度係乜都有得賣！」真正做生意的還是在手機App和網頁上。
海怡半島的店舖面積約300平方呎，生意卻由未開店時的20萬元，急增6倍，至上月的136萬元生意，店舖長期擠得水洩不通，
呢間舖頭每個禮拜展示不同的貨品，有一個禮拜淨係賣紙巾，擺咗200種不同的紙巾係度，第2個禮拜擺咗300種不同的飲品，之後試過擺咗200種不同的米，有韓國米、泰國米、澳洲米、日本米，岩岩呢個禮拜擺咗玩具。
將實店變成產品展示場，既可讓市民睇實物，也可以提高客人的信心和購買欲，故王維基對這間店舖充滿信心，
我俾同事的Target係呢間300呎的舖，年底要做300萬元生意，即是每一呎做一萬蚊。
營商20多年的王維基，對於做廣告也有一套心得，他認為在現今科技發達的年代，要緊貼科技潮流，就要用人惟才，尤其是聘用熟悉網絡操作的年輕人。他的團隊內，大多是30歲以下的年輕人，他們身穿的衣服大多來至網購平台，
正如你唔食煙、唔飲酒，要去賣煙和酒，就好似你跟本無試過網購，唔係嗰個世界，（做出嚟嘅野）唔會Ｗork。
現時，他們每月的廣告費為100萬至200萬元不等，大多用於電子廣告，如Facebook、Google。
兩年前，他剛轉型去經營網購平台，曾買下港鐵月台上3,328塊的廣告板，加上附有創意的盞鬼的字句去Sell產品，不少人都覺得新奇又有趣，但他回想起只是一個傻佬行為，
嗰一次我地洗咗1,500萬，好多人都意外，但對我地的生意……我覺得完全係一個錯誤，只係一個傻佬叫王維基好大喜功，用返過往20年做IDD、做寬頻的經驗，以為自己好叻咁做廣告，所以一敗塗地。
（原文刊於《iMoney 智富雜誌》495期）
