聯儲局議息回議維持利率不變，即使聯儲局官員態度偏鷹，不過尚未有收水時間表，而加息或於明年開始，由美國收水係遲早嘅事，市場已有心理準備，美股做好，三大指數升0.95至1%不等。除咗美股回升之外，有消息指恒大(03333)債務危機有望解決，內地政府計劃將恒大分為三個實體，並進行重組，最快可能喺呢幾日公布有關方案。港股今早一度反彈逾600點，但市場對內地監管風暴仍有戒心，唔少沽盤喺高位湧現，令港股半日升幅縮水，恒指半日升唔夠二百點。
恒指高開392點報24614，升幅曾擴大至605點，見24827點半日高位，但高位沽盤湧現，大市升幅縮至水158點，見24379半日低位。恒指半日收報24388，升166點；國指半日報收8718，升78點；恒科指僅升23點。北水中秋連休後復市，大市半日成交曾至1113億元，不過半日升幅縮水，北水亦喺高位沽貨套現，今日港股走勢麻麻。
藍籌股個別發展，ATMX表現好壞參半，騰訊(00700)跟美團(03690)大成交回升，但半日升幅收窄至1.6%及3%；而阿里巴巴(09988)跟小米(01810)則逆市腳軟。友邦(01299)先高後低，升至92元水平遇阻力，半日倒跌1.2%；反而平保(02318)半日升彈2.1%。
噚日A股已假後復市，唔少電力股升停板，今日內地電力股喺呢邊發力，全個板塊顯著上升，龍頭龍源電力(00916)股價一度升逾兩成，創20.25元上市新高，半日升幅無咗半截，得返一成，有貨喺手見好要識收，見急成兩成都有食唔食，認真罪大惡極。其他電力股閒閒地至8%至15%。電力設備股亦受追捧，半日升幅由5%至14%不等。
恒大有救消息傳出，帶動內房股及物管股反彈，恒大大度升逾三成，追貼隔晚ADR升幅，但有分析指，即使恒大債務危機得到解決，但仍有一段時間要面對流動性緊撮問題，股價半日升幅縮至一成左右。其他內房股及物管股反彈。半日升幅由7%至超過一成，碧桂園服務(06098)升一成，為半日最大升幅藍籌股。而恒大系內嘅恒大汽車(00708)，有消指中策(00235)計劃沽售其恒大汽車股份，恒大汽車早段急升兩成後，半日倒跌3.8%。
汽車股今日逆市走軟，屬吉利系嘅曹操出行中國地圖漏繪藏南地區、釣魚島等，被行政處罰內容為責令停止發布廣告並罰款20萬元人民幣，吉利(00175)半日4.5%，並拖累其他汽股半日跌0.3%至5%不等。
港股半日升幅縮水，反映市場對港股後市仍缺乏信心，投資者選擇趁反彈減磅套現，睇嚟呢個時候都係忍忍手，保持輕倉及預留較多現金，策略以防守為主。
麥狄文
(徐狄怡‧證監會持牌人)
