https://www2.hkej.com/instantnews/market/article/2828611/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%99%82%E4%BB%A3%E5%A4%A9%E4%BD%BF%E5%86%8D%E6%8E%80%E6%96%B0%E8%82%A1%E7%86%B1%E6%BD%AE
|
聯儲局維持利率不變屬意料中事，不過鮑爺指通脹正升溫，雖然加息未係時候，但遲早都要傾下幾時開始縮減買債，市場解讀為聯儲局由鴿轉小小鷹，嚇到美股隔晚顯著下跌，其後跌幅收窄，但三大指數仍要報跌。至於港股隔晚夜期跟ADR均報跌，今早低開後受惠A股反彈高走，半日總算守住28500水平。
受美股拖累，恒指低開195點報28240，跌幅曾擴至220點，見28216半日低位，但低位有買盤支持，加上A股向好，大市止跌回升，恒指曾回升106點，見28543半日高位。恒指中午收報28516，升80點；國指中午報10585，升22點；恒科指升45點，報7875點。
藍籌股個別發展，海底撈(06862)半日跌3.4%，又再成為藍籌之中嘅最弱者；相反比亞迪(01211)獲通過分拆半導體業務於內地上市，半日升6.2%，藍籌之中表現最好。其他藍籌乏善可陳。波羅的海乾散貨指數(BDI)連升六個交易日，勁升三成，航運股噚日跟隨大市回調後，今日再度回勇，整個板塊閒閒地升逾3%。
新股時代天使(06699)首掛日爆升1.3倍，今日繼續市場焦點，雖然半日先升後回，半日跌5.7%，但已再掀起新股熱潮，而由中駿集團(01966)分拆出嚟嘅中駿商管已準備就緒，好快落實招股日期，值得留意。雖然內地對樓市進行調控，但物管股今年表現堅挺，其中喺商管業務有明顯戰略布局嘅，更具稀缺性而獲市場給予更高估值。
商業物管可享較高估值
而中駿商管為綜合物業管理服務供應商，其優勢為享有較高商業物業管理費，並擁有強大的品牌認知度及行業聲譽。根據仲量聯行嘅資料，中駿商管於2020年的商業物業管理服務平均物業管理費為27.7元人民幣，位列第一，比第二位嘅同業高40%。中駿商管於2018年至
2020年間的商業物業管理及運營服務毛利率分別為47.6%、51.3%及59.0%，令其整體毛利率則分別提升至34.6%、37.0%及44.3%。而喺聆訊後資料集解說咗，集團高毛利率不僅歸功於其享有較高嘅基本商業物業管理費，亦歸功於中駿商管嘅業務組合。
至於中駿嘅品牌形象亦具優勢，為中駿商管帶嚟快速擴張行業市場份額嘅機遇，包括商業及住宅物業的簽約建築面積由2018年底嘅1,790萬平方米，增至2020年底嘅3,660萬平方米。截至2020年12月底，中駿商管已簽約管理的商業及住宅物業多達199項；預計今年第四季迎來4座世界城購物中心開業，2022年更預期有超過10座中駿世界城亮相，未來將進入其高速成長階段。
麥狄文
(徐狄怡‧證監會持牌人)
