顯示具有 古天后 標籤的文章。 顯示所有文章
顯示具有 古天后 標籤的文章。 顯示所有文章

2023年3月6日 星期一

【盤房來料】港股雖守十日線 惟成交不足欠動力

 https://www2.hkej.com/instantnews/stock/article/3387957/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%B8%AF%E8%82%A1%E9%9B%96%E5%AE%88%E5%8D%81%E6%97%A5%E7%B7%9A+%E6%83%9F%E6%88%90%E4%BA%A4%E4%B8%8D%E8%B6%B3%E6%AC%A0%E5%8B%95%E5%8A%9B

上周五美股做好,主要係10年債息回落,市場又再憧憬加息步伐可放緩,三大指數升逾1%,標指又係去到3900見支持回升。不過美股暫仍未能擺脫上落格局,標指就係3900至4100水平之間上落。至於港股今日無乜方向,全國兩會舉行,內地定下今年GDP增速5%嘅目標,只怕又係期望高,實現難,港股上星期反彈逾500點,今日有啲停滯不前。

恒指低開129點,盤中最多跌157點,見20410半日低位,但10日線(約20323)仍守得住,大市再發力,一度回升92點,見20660半日高位,可惜未能一口氣突破20日線(約20716),暫時窄幅上落。半日恒指升8點,報20576、國指跌24點,半日報收6915;恒科指半日跌41點,報4170。半日成交額634.53億元,仍未見有新資金流入,塘水滾塘魚下,港股暫乏力再向上,能夠企穩條10日線已經算係咁。

藍籌股個別發展,ATMJ各有升跌,之前因為市場擔心京東(09618)嘅百億補貼活動拖累盈利表現,但幾份大行報告為其護航,指市場反應過敏,反而呢個補貼活動已於今日凌晨展開,股價半日升1.3%;美團(03690)半亦錄得0.8%升幅;但阿里(09988)表現疲弱,半日再跌1.2%,股價仍未能重返90元水平,更處於多條移動平均線之下,走勢較弱;至於騰訊(00700)半日制20日線,暫未能重返370元水平,半日跌1.1%,要睇下北水有冇心再掃貨。三桶油表現唔錯,中海油(00883)跟中石化(00386)再創52周高,半日齊升3%。但內銀股跟內險股則腳軟,招行(03968)半日跌4.3%,藍籌之中表現較差。

工信部部長金壯龍稱,業界組建6G推進組,加快研發,相關股份今早跑出,唔單止三大電訊股再創52周高,其他通訊設備股仍有理想表現,上周阿Man曾於其他平台推介嘅中通服(00552)半日升5.1%;另一隻曾推介嘅聯想(00992)半日升3.8%,藍籌股之中表現最好。

中國2023年國防開支預算增加7.2%,是近5年來第二高,今早軍工股全面做好,但中午升幅大大收窄,中航防務(00317)創52周高後,半日倒跌。兩會未見再有新措施扶持內房股,加上碧服(06098)發盈警,預料去年全盈利按年減少51%至57%,股價半日跌7.5%,藍籌股中表現最差,同系碧桂園(02007)亦跌4.5%,其他內房股跟物管股全部走軟。

暫時港股能夠守住10日線,短線仍有機會向上挑戰20及50日線,只係成交一直唔多配合,上升動力略嫌不足,呢個亦係港股喺現水平唔上唔落嘅原因。

麥狄文
(徐狄怡‧證監會持牌人)

 

2023年2月27日 星期一

【盤房來料】結算後且看能否修復250日線

 ttps://www2.hkej.com/instantnews/market/article/3380438/【盤房來料】結算後且看能否修復250日線

上周五美股走軟,三大指數跌逾1%,主要係反映通脹嘅1月PCE數據升幅大過預期,或增加聯儲局進一步加息壓力,10年債息高企3.93%,影響市場情緒,而反映中概股嘅中國金龍指數跌近4%,當晚港股夜期跟ADR受壓。港股上周五以今年最低位收市之外,已跌足四個星期,恒指累計跌咗2678點,今早進一步走低,一度跌逾200點。

恒指低開189點,失守250日線(19976),更一度跌205點,見19804半日低位,亦係1月3日以嚟新低,其後拗腰回升, 一度倒升76點,重返20000水平,報20086半日高位,其後再度受壓。恒指中午報收19860,跌149;國指跌54點;半日報收6649;恒科指跌47點;半日報收3963。半日成交額628.9億元,較上日稍有增加,見重磅股低位有反彈,似乎低位開始有啲買盤趁低吸納。

藍籌股個別發展,主要係金融股拖低大市,大笨象(00005)半日跌近2%,60呢個位始終企唔住。內銀股普遍跌1%以上;港交所(00388)跟友邦(01299)分別跌0.9%及0.1%,單係呢推金融股已佔去大市跌幅一半,拖低恒指74點。重磅科技股則升跌參半,美團(03690)跟百度(09888)半日分別升1%及2%,但騰訊(00700)、京東(09618)、阿里(09988)跟網易(09999)則跌0.2%至0.4%;小米(01810)跌2.6%,算係跌幅比較大。電動車競爭日趨白熱化,Tesla之前減價,依家又輪到比亞迪(01211)王朝系列產品降價,舊車款減幅萬元人幣以上,股價半日插4.5%,為表現最差藍籌。而表現最好嘅藍籌係海底撈(06862),發盈喜公布去年由虧轉盈賺逾13億人仔,股價半日升13.4%。

今日期指結算,目前指數正處於本月低位,而250日線失守,要睇過咗結算,呢兩日大市能否盡快修復250日線,能企穩喺250日線上面,本輪嘅調整或可告一段落。至於大市失守250日線後,下一道防線大約係19600水平,亦即係由10月14600低位反彈至1月高位22700水平嘅回調黃金比0.382,呢個位不容有失,一旦失守,港股由熊轉入牛嘅希望或者幻滅,要高度警覺。

麥狄文
(徐狄怡‧證監會持牌人)

 

2023年1月13日 星期五

【盤房來料】農曆長假愈近 成交愈趨淡靜

 https://www2.hkej.com/instantnews/stock/article/3350135/%E3%80%90%E7%9B%A4%E6%88%BF%E4%BE%86%E6%96%99%E3%80%91%E8%BE%B2%E6%9B%86%E9%95%B7%E5%81%87%E6%84%88%E8%BF%91+%E6%88%90%E4%BA%A4%E6%84%88%E8%B6%A8%E6%B7%A1%E9%9D%9C

美國隔晚公布12月份CPI,通脹按月錄得兩年半以嚟首次回落,之前市場已預計聯儲局會放慢加息步伐,如今個CPI見頂後開始回落,市場進一步憧憬至年底或者有減息空間。美股隔晚反覆向上,三大指數上升,納指更連升五個交易日,標指企穩3900水平,道指升逾200點。至於港股今早表現較為反覆,恒指噚日創六個月高位後,今早動力明顯減弱,盤中更曾倒跌,半日保住小量升幅。

恒指高開90點,一度升137點,見21651半日高位,未能進一步突破噚日高位21698後掉頭回落,不過最多都係跌39點,見21474半日低位後靠穩,重上21500水平。恒指半日報收21549,升35點;國指升7點,報收7319;恒科指今日繼續跑輸,半日跌2點,報收4485。半日成交額只有653.3億元,愈接近農曆年長假期,預期成交會繼續縮水。

藍籌股個別發展,重磅科技股呢兩日已見腳軟,AMTJ只有阿里(09988)半日仍保持升幅,但都只係升0.4%,半日報收111.3元。騰訊(00700)噚日跌得較為顯著,今日靠穩,半日升0.1%,但已無法重上365元之上。美團(03690)呢幾日維持弱勢,半日再跌近2%,報收169.6元,短線支持170失守;京東(09618)則跌2%,半日報收242.4元,留意240元支持失守或見更大幅度調整。

重磅科網股腳軟,由其他指數重磅股撐住大市,大笨象(00005)升1.8%,重上55元水平,不過大笨象由48元起步升上嚟,遺下幾個上升裂口,暫時要睇住54元前阻力能否企穩,掉頭向下穿54元,分分鐘要落去逐個口回補。中移動(00941)半日亦升近2%,同樣突破55元,54元變成短線支持,可以睇住呢個位止賺。中移動一直被視為大市藍燈籠,藍籌升到佢通常都係尾水,不得不小提防。紐約期油再升逾1%重上每桶78美元,帶動三桶油向上,中海油(00883)股價見四個月高位,半日升逾2%;中石油(00857)更升近3%,半日報收3.86元,中石化(00386)升少於1%,始終油價上升,中石化唔係最受惠,反而會增加成本。至少其他藍籌股以網易(09999)半日升3.1%表現最好;而信義光能(00968)半日跌超過半成,表現最差。

醫藥股今日表現亦唔錯,香港上市生物科技指數急升3.1%。藥明生物(02269)升2.9%;康方(09926)升3.6%;信達生物(01801)升2.6%。諾輝健康(06606)發盈喜,刺激股價半日急升逾一成,而同樣升逾一成嘅生科醫藥股都唔少,計有榮昌生物(09995)升10.4%;心通醫療(02160)升13%;和黃醫藥(00013)飆11.6%;康寧傑瑞(09966)升10.4%。

愈接近農曆年長假,成交將會愈見淡靜,目前港股喺現水平停滯不前,高位震盪,會否出現久守必失仲係未知數,畢竟成交縮減,大戶要操控指數更為容易,唔排除呢段時間喺一千幾百點內舞高弄低,暫時都未係可以進取嘅時候。

麥狄文
(徐狄怡‧證監會持牌人)

 

2023年1月12日 星期四

天后煉金術│京東物流收集作中線投資(古天后)

 https://hk.finance.yahoo.com/news/%E5%A4%A9%E5%90%8E%E7%85%89%E9%87%91%E8%A1%93%E2%94%82%E4%BA%AC%E6%9D%B1%E7%89%A9%E6%B5%81%E6%94%B6%E9%9B%86%E4%BD%9C%E4%B8%AD%E7%B7%9A%E6%8A%95%E8%B3%87%EF%BC%88%E5%8F%A4%E5%A4%A9%E5%90%8E%EF%BC%89-233053870.html

京東物流(2618)第三季業績表現強勁,2022年全年盈利有機會扭虧為盈,集團今年第三季收入為357.7億元(人民幣.下同),按年增長38.9%;股東應佔虧損由去年同期的10.7億元收窄至2.87億元。按非國際財務報告準則計,今年第三季股東應佔純利2.55億元,扭轉去年同期錄虧損6.22億元。期內,集團毛利按年增長108.6%至26.5億元;毛利率由去年同期的4.9%上升至7.4%。另外,第三季來自京東集團的收入為109億元,佔比30.5%,較去年同期的佔比42.4%下降。

雖然自然收入增長放慢,但集團的毛利趨勢繼續有按年改善,主要受惠於規模經濟效益,以及管理層繼續致力於提高經營效率,在成本控制和客戶組合重組方便有很好成效。即使去年宏觀不明朗及疫情破壞下,但集團透過有效措施提高盈利能力上表現很好。暫時京東物流仍受消費疲弱和宏觀不確定性或會繼續影響商家的消費潛力所困擾,對集團來說是主要不明朗因素。

首個目標18元

現時市場關注重點已從第四季的展望轉移至2023年重新開放的利好消息,管理層預計防疫措施鬆綁的情況下,消費者信心將加快復甦,業績將全面改善,消費者非必需品及第三方銷售將出現強勁反彈。而市場普遍看好其零售規模、獨特線上直銷模式以及行業領先的倉儲及供應鏈能力,將2022年全年經調整淨利潤預測上調,並上調2023及2024年的盈利預測,以反映收購帶來的利好因素,以及京東零售利潤提升,以及新業務投資規模縮減。長遠而言,京東物流將關注垂直領域的價值創造,以及解決客戶問題。作為中線投資,建議可於15至16元水平收集,跌穿14元止蝕,上望首目標為重上250日線,並企穩於18元之上,中長線目標為20至22元。

古天后

筆者為證監會持牌人,未持有上述股份財務權益。

https://stockqueen.co/ZH/

https://www.facebook.com/stockqueenbb

https://www.instagram.com/stockqueenbb/?hl=en

本欄逢周四刊出

 

2023年1月11日 星期三

【盤房來料】配股潮抽乾水 大市暫難再大升

 https://www2.hkej.com/instantnews/stock/article/3348293/%E3%80%90%E7%9B%A4%E6%88%BF%E4%BE%86%E6%96%99%E3%80%91%E9%85%8D%E8%82%A1%E6%BD%AE%E6%8A%BD%E4%B9%BE%E6%B0%B4+%E5%A4%A7%E5%B8%82%E6%9A%AB%E9%9B%A3%E5%86%8D%E5%A4%A7%E5%8D%87

雖然大部份FOMC(聯邦公開市場委員會)委員都贊成今年未有減息空間,亦同意要將息率維持5%喺一段較長時間,但鮑爺喺瑞典央行論壇未有放鷹,美股周二早段反覆後,尾市回升,三大指數向上,納指再升1%已經三連升,而標指更重上3900大關。反映中概股嘅金龍指數亦升1.7%,帶動港股造好,恒指喺噚日略為回吐後,今早升逾300點,創超過6個月高位。

恒指高開132點,其後升幅略為收窄至94點,見21425半日低位後回勇,最多升335點,見21667半日高位,創超過半年新高。其後升勢回順,半日恒指收報21549,升218點;國指升81點,報7334;恒科指升49點,收4607。半日成交額789.22億元,未見顯著增加,口痕友話咁多公司配股抽水,市場資金都被抽乾。

藍籌股個別發展,大笨象(00005)半日升0.6%,有貨喺手可以用52元止賺持有,睇下呢一浪有冇本事上埋55元。友邦(01299)半日升0.6%,內險股跑贏,國壽(02628)半日升逾3%,平保(02318)更勁升4.7%,金融股份之中表現最好。ATMJ表現好壞參半,騰訊(00700)及阿里(09988)擔起撐高指數嘅使命,兩股半日分別升2.9%及3.5%,合共為恒指貢獻122點;不過京東(09618)跟美團(03690)呢期繼續跑輸,京東上半場反反覆覆,忽升忽跌,半日最終都係要跌0.1%,美團半日就跌2.1%。

內地動力煤期貨急升逾3%,帶動煤炭股造好,當中以兗礦(01171)半日升6.5%最勁,其他煤炭股唔少升4%以上,就連兗煤旗下嘅兗煤澳洲(03668)都升0.6%。雖然今日個指數都仲係升,但已有唔少板塊見腳軟,好似本地地產股,今日整個板塊都回軟,主要係之前憧憬跟內地通關後,會有大量內地旅客來港消費,可惜天氣不似預期,連就最近內地嘅上水,都唔多見水貨客嘅影蹤,更何況出到市區嘅各大商場,同樣係靜過鬼。

好似噚晚阿Man同朋友喺尖沙咀某商場食飯,去咗一間過往出咗名難book枱嘅餐廳,竟然walk-in都有位,仲要晚飯時間得我哋一枱客,反映出面市道認真麻麻,地產股自然難升。不過地產股跌幅又唔算大,跌得最多嘅新地(00016),都係跌1.3%,其他地產股跌不足1%。除咗地產股表現麻麻,食品股今日都受壓,周黑鴨(01458)半日喺大成交之下,急跌近兩成,其他食品股跌幅由1.1%至3.6%不等。

近日不斷有公司配股抽水,今日輪到雅居樂(03383),以先舊後新方式配售2.2億股,每股配售價2.25元,集資淨額約4.89億元,暫時半日跌6.5%,但仍守配股價,都算係咁。而近期嘅配股公司,似乎都守到配股價,反映資金折讓接貨後未急於沽貨,只係咁抽水法,再無新資金流入市場,水總會抽乾。大市要繼續向上,總要有成交配合,而接近農曆年假期,內地資金變得較緊絀,阿爺好難大大力放水,無成交配合,咁即使大市未似要大幅回調,但暫時都好難再重現上周千點嘅巨大升幅。

立即試用EJFQ「信號」全方位股票分析系統,運用100+ 選股條件篩選值博股!

 

2023年1月9日 星期一

【盤房來料】阿爺出手太遲內房股內傷難救

 https://www2.hkej.com/instantnews/market/article/3346523/%E3%80%90%E7%9B%A4%E6%88%BF%E4%BE%86%E6%96%99%E3%80%91%E9%98%BF%E7%88%BA%E5%87%BA%E6%89%8B%E5%A4%AA%E9%81%B2%E5%85%A7%E6%88%BF%E8%82%A1%E5%85%A7%E5%82%B7%E9%9B%A3%E6%95%91

 

放完成個星期大假,個市由上周一低位19300水平左右抽高,至今短短一星期,已由低位拉升咗2000點,以首個星期計,恒指升咗1210點,叫做今年有個好開始。上周五美股公布非農數據後全面上升,美期今早繼續做好,港股亦跟隨高開,一度升逾400點,創六個月高位。

恒指今早高開304點,一度升幅收窄至225點,報21216半日低位後,再加大馬力升最多479點,見21470半日高位,創近六個月高位,恒指半日升336點,報收21328。國指半日升123點,報7267;恒科指半日升125點,報收4556。半日成交額859.41億元,叫做中規中矩,個市已經上到嚟21000水平,全日計成交少過1800億,其實都唔算合格。

藍籌未見全面上升,有24隻股藍籌逆市下跌,友邦(01299)半日跌1.4%,係表現較嘅重磅藍籌股,留意友邦短線支持位85,有貨喺手,睇住呢個位止賺。不過其他金融股就有唔錯表現,港交所(00388)半日升4.6%,表現強勁,但留意380阻力位唔係咁輕易能夠突破企穩。大笨象(00005)追落後,半日升1.8%,不過大笨象都追得落後,小心個市短期見頂要抖抖。科網股方面,又係咁啱一直落後嘅小米(01810)今日發力,半日升8%,真係無乜幾可咁強勁。至於阿里(09988)之前喺ATMJ之中,一向係跑第尾嗰位,呢期又吹風話馬雲撇清同螞蟻嘅關係之後,螞蟻將會短期內上升。不過今日公司已否認重啟上市,不過股價半日再升近8%,留意110短線阻力,而支持當然係100心理關口。自從騰訊(00700)宣布派送美團(03690)股份之後,美團走勢可以話無乜點好過。今日半日大市升至半年高位,相反美團亦逆市下跌;京東(09618)同樣由之前嘅火車頭,變咗開慢車,今日甚至有機會開倒車,兩隻重磅股咁嘅表現,都要提高警覺。

澳門將新冠感染定為風土病,另外噚日起調整入境防疫措施,由內地、香港及台灣入境旅客,毋須再出示任何新冠病毒檢測證明。雖然通關消息炒咗一段日子,但澳門又走前香港一步,將covid定性為風土病,咁以後就唔會再有乜嘢出入境限制呀,檢疫呢啲麻煩嘢,對沉靜多時嘅澳門娛樂業實在係好事。濠賭股全面向上,升幅閒閒地有3%,永利澳門(01128)盤中更創52周新高。

至於內房物管股,雖然阿爺講到明放鬆三道紅線,但呢兩個板塊今日不升反跌,道理好簡單,個病人喺ICU,就死嘅時候,你乜都唔做,幾乎仲要拔埋人哋條喉,半生不死嘅狀況下,你話同人打補針,又話畀啲純氧你聞,個病人變咗植物人先嚟救,似乎已經太遲。另一方面,市場亦擔心呢個板塊一炒就配股,明知你都係想同市場抽水,又或者有折讓配股執平貨,仲有邊個會喺市場同你掃貴貨。

麥狄文
(徐狄怡‧證監會持牌人)

2022年12月30日 星期五

【盤房來料】內地通關在即 疫情或有變數宜審慎

 https://www2.hkej.com/instantnews/market/article/3337280/%E3%80%90%E7%9B%A4%E6%88%BF%E4%BE%86%E6%96%99%E3%80%91%E5%85%A7%E5%9C%B0%E9%80%9A%E9%97%9C%E5%9C%A8%E5%8D%B3+%E7%96%AB%E6%83%85%E6%88%96%E6%9C%89%E8%AE%8A%E6%95%B8%E5%AE%9C%E5%AF%A9%E6%85%8E

美國首次申領失業金人數連續兩星期上升,反映美國就業市場或稍為轉弱,市場憧憬聯儲局貨幣政策唔需要再企到咁硬,可以稍為鴿返些少,美股借勢反彈,三大指數向上,連帶夜期跟ADR做好,港股今早乘機重返二萬大關,可惜未能企穩,此關得而復失。恒指高開289點, 早段最多升332點,見20073半日高位,但未能升穿前日高位20099。加上長周末在即,有獲利盤假前沽貨套現,二萬大關得而復得,恒指升幅一度收窄至只有47點,見19788半日低位。半日恒指報收19903,升161點;國指升54點,報收6749;恒科指半日升51點,報收4159。成交額預咗縮水,半日462.06億元,交投淡靜。

藍籌股普遍高開,不過騰訊(00700)跟美團(03690)半日倒跌,後者更跌3.2%,藍籌股中表現最差。下周四騰訊就派發美團股份除淨,雖然股東要喺3月份先會收到美團股份,但唔排除有大戶偷步沽貨,甚至沽空,反正3月已確保有貨到手,大市現處二萬水平附近,先偷步沽貨亦無可厚非。值得留意係騰訊大股東南非基金將會收到為數唔少嘅美團股份,之前南非佬要套現就沽騰訊,而騰訊則進行回購以抵抗其沽貨行動,但美團至今仍未有宣布任何回購計劃,事實上美團手上亦唔似得騰訊咁疊水,持有大量現金可供回購之用,一旦南非佬要掟晒手上嘅美團出街,美團難免捱沽。

其他重磅藍籌股則普遍向上,友邦(01299)升2.6%表現不俗,內險股同樣受捧,平保(02318)跟國壽(02628)分別升3.4%及2.8%;其他非藍籌內險股升幅更大,中太平(00966)跟新華人壽(01336)半日更升逾5%。

所謂物極必反,Tesla自跌穿200美元後跌跌不休,直至早前跌至108美元有撈底買盤入場,隔晚連續第二晚反彈,再升8%,帶動相關概念股做好,尤其係有份供應Tesla零部件或組件嘅公司,全線做好。而其他汽車股乘勢反彈,比亞迪(01211)半日亦跌彈1.8%。

唔少新股趁呢兩日趕上市尾班實,唔少上股,尤其係以介紹形式上市嘅新股表現唔錯,不過呢類股份都係由分拆業務上市嘅母公司以派送方式贈予股東,未有公開發售,講白少少就係私人派對,對於呢類股份要參與炒作,只能嚴格執行止蝕,想搭順風車無問題,一有唔對路,當然要識第一時間跳車。

話咁快又過一年,今日最後一個交易日,港股能接近二萬水平年結,已算係有個唔錯嘅結果,本周新年長假,下周美國將會公布唔少經濟數據,美股近日走勢較為飄忽,日升日跌,標指未能重返3900水平未叫脫險,納指仍於11000水平樓下,表現亦強差人意。港股炒大陸通關就重返二萬,1月8日通關後,本港疫情會否失控仍屬未知數,暫時阿Man取向較為審慎,寧買貴,莫買錯,長假在即,都係輕倉過周末。

先預祝各位新年進步,阿Man趁日本未實施限制香港旅客入境措施,再放假遊日,下周二至周五本專欄休息暫停,至1月9日回復正常。

麥狄文
(徐狄怡‧證監會持牌人)

2022年12月29日 星期四

【盤房來料】港股未能企二萬大關 萬九至二萬水平先作整固

 https://finance.now.com/news/post.php?id=773309&type=analysis

【信報財經新聞】美國聖誕節假後又緊接除夕新年,唔少基金經理仍然休假中,美股成交薄弱,喺缺乏成交支持下,美股隔晚走軟,三大指數跌逾1%,而反映中概股表現嘅金龍指數更跌逾3%,港股噚日升逾300點,一度重返二萬關後,但二萬未能企穩,今早回吐逾200點。恒指低開250點,跌幅曾收窄至134點,見19764半日高位後沽壓再現,最多跌359點,見19539半日低位。中午恒指報收19675,跌223點;國指半日跌105點,報收6667;恒科指跑輸大市跌108點,報收4103。半日成交回復淡靜,只有512億元,噚日都講過,過兩日又到新年長周末,缸邊友買貨又點會積極。

藍籌股可以話由騰訊(00700)撐起半邊天,騰訊跟任天堂一同開發的《寶可夢大集結》獲批12月遊戲版號,股價曾倒升3%報336元,創逾五個月高位,半日升2.4%報334元,更以62億成交額居榜首。不過成交額僅之騰訊之後嘅阿里巴巴(09988)半日跌2.7%,其他重磅股如友邦(01299)、平保(02318)等,半日跌逾2%。但弱咗一段時間嘅藥明生物(02269)半日升3.9%,連帶其他藥股都有唔錯表現,幾隻藍籌藥股全線向上,翰森(03692)升2.4%;中生製藥(01177)升0.7%;石藥(01093)升0.6%。其他醫藥股普遍升2%至超過一成不等。

內房股跟物管股繼續受壓,碧服(06098)插5.4%,為表現最差藍籌;其他藍籌內房股,全線跌2%以上,碧桂園(02007)半日跌3.8%。即使有報告睇好潤地(01109),指其買入項目具一定折讓,叫做執到平貨,但股價半日仍跌近3%。另一個噚日已見腳軟嘅板塊教育股,今日繼續捱沽,卓越教育(03978)插11.7%;思考樂(01769)挫8.2%;中教(00839)跌2.8%;新高教(02001)挫3%。

暫時港股未能成功企穩二萬大關,此關得而復失,睇嚟都需要時間整固,最棘手係美股勢每況愈下,標指失守3900重要支持後未能短期內修復失地,美股危危乎,而中港股市炒通關消息,亦已消化得七七八八,嚟到現水平,乜嘢通關利好消息都已反映,港股可能要喺19000至20000水平之間整固,留意10日線及20日線已上移,暫時19300至19500會係一個較重要支持區,一旦此關失守並再下破萬九大關,有機會進一步向下測試100日線18200水平,呢個將會係好友最後一道防線。

麥狄文
(徐狄怡‧證監會持牌人)

 

2022年12月28日 星期三

【盤房來料】港股重上二萬關必有一番爭持

 https://www2.hkej.com/instantnews/stock/article/3334752/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%B8%AF%E8%82%A1%E9%87%8D%E4%B8%8A%E4%BA%8C%E8%90%AC%E9%97%9C%E5%BF%85%E6%9C%89%E4%B8%80%E7%95%AA%E7%88%AD%E6%8C%81

隔晚美股假期後表現偏軟,雖然道指仍錄得37點升幅,但標指高開低走,跌15點;納指跌幅更超過1%,跌144點。唔少人仲放緊假,過兩日又新年,成交薄弱,喺缺乏買盤支持下,自然易跌難升。標指已失守3900大關,好友唯有退守3800,目前美股去向仍然要睇息口何去何從。

債息回升,美股科技股表現弱過藥煲,但中概股喺內地落實通關消息下,表現強硬,只不過中概股升勢唔夠全面,Tesla跌跌不休,電車股三傻跟跌,其他中概股升勢唔算顯著,只有出行股表現較強。A股沒有聖誕假期,過去兩日內地股市上升,只係升勢唔算強勁之餘,成交亦唔算暢旺,深滬兩市成交未及萬億,可見入場資金唔算積極。

至於港股,受通關消息所帶動,重上二萬大關,升至四個月高位,半日更一度升逾500點。恒指高開194點,見19787已經係半日低位,其後見買盤入場,未幾大市已升穿二萬,半日最多升506點,見20099高位。中午恒指收報20011,升418點;國指報6815,升162點;恒科指收4236,升111點。半日成交額715.57億元,以半日升幅嚟講,咁嘅成交只可以話過得去,又唔算特別多。

藍籌股普遍造好,藥明生物(02269)半日升8.1%,係表現最好藍籌股。內地通關在即,市場憧憬內地經濟復常後回勇,內銀股跟內險股造好,工行(01398)跟建行(00939)半日升逾4%,平保(02318)半日則升近3%。至於ATMJ未見特別強勁,半日升幅2%左右。

汽車股表現特別差,Tesla喺美股嗰邊跌到一仆一碌,跌跌不休,拖累其他汽車股走軟。蔚來(09866)大幅下調第四季度交付預測,中午急跌9.1%,其他兩傻小鵬(09866)跌8%、理想(02015)跌6.2%;比亞迪(01211)跌0.7%算跌得少。其他傳統車股亦下跌,吉利(00175)跟長汽(02333)半日分別跌2.6%及2%。就連4S汽車股亦走軟,中升(00881)半日跌3.3%,成為表現差藍籌股。

雖然內地落實下月8日全面通關,但內房股跟物管股逆市下跌,始終債務問題只見治標,未能治本,內房板塊能否起死回生,仲要睇之後嘅銷售數字,加上未再見阿爺有任何政策出台解決目前內房困局,內房物管股半日普遍下跌,唔少股份跌幅超過半成。除咗內房股表現疲軟,假期前落鑊狂炒嘅教育股,假後整體下跌,閒閒地跌半成,更有個別股份跌逾一成,之前阿Man都講過,呢啲股份唔係話唔可以炒,但炒得要有心理準備大上大落,食少多教訓,阿Man寧願食花生。

期指明日結算,喺結算前夕大市推高轉倉,加埋年結因素,呢兩日港股企到高位,但結算過後再加埋年結完成,過埋除夕新年假期,下周能否繼續高企成疑問,阿Man呢一刻唔打算追貨,反正大市真係要再上,總有機會,反正過埋呢個星期,又係新一年開始,成年流流長,就算個市要再升,又點會無機會買貨,急亦唔急嗰一陣,二萬大關相信會有一番爭持,點會咁容易話企就企定定。

麥狄文
(徐狄怡‧證監會持牌人)

 

2022年12月23日 星期五

【盤房來料】期指轉倉托指數 恒指得保十日線

 https://www2.hkej.com/instantnews/stock/article/3333123/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%9C%9F%E6%8C%87%E8%BD%89%E5%80%89%E6%89%98%E6%8C%87%E6%95%B8+%E6%81%92%E6%8C%87%E5%BE%97%E4%BF%9D%E5%8D%81%E6%97%A5%E7%B7%9A

隔晩美股顯著下跌,主要係市場再受加息困擾,除咗日本央行略為擴闊利率波動區間至0.5%之外,歐洲息口亦調高至3.5%,德國10年債息再創高位,喺全球緊縮貨幣政策下,加上美國第三季GDP增長終值好過預期,美股投資者憂慮美國加息步伐增速,聯儲局可能又再放鷹。美股三大指數隔晚下跌,道指更一度跌800點,尾市跌幅收窄至348點,標指則跌55點;納指則跌逾2%,跌233點。隔晚港股喺夜期跟ADR再度失守10日線(19441),拖累今早恒指低開,但10日線失而復得。

恒指低開296點,早段跌幅曾擴大至298點,見19380半日低位,但恒指跌穿10日線後,A股止跌回升,港股亦收復10日線,更扭轉跌勢倒升7點,見19686半日高位,不過假期前夕,缸邊友買貨又點會積極,最終半日恒指報收19578,跌100點;國指則跌73點,報收6642;恒科指則跌80點,報收4129。半日成交額只有444.23億元,買賣兩閒。

藍籌股普遍下跌,但中港兩地通關之聲高唱入雲,有消息指下月初中港兩地將落實免檢及免隔離通關,友邦(01299)半日升3%,市場憧憬通關後,友邦中國業務可回復活力。近日美股嘅科技股顯著跑輸大市,隔晚連反映中概股嘅金龍指數亦強勢不再,ATMJ半日下跌,騰訊(00700)跌0.4%算跌得少,阿里(09988)跟美團(03690)半日跌1.5%,京東(09618)跌幅更遠過2%。阿里健康(00241)半日跌5.5%,藍籌之中包尾。其化藍籌股乏善可陳,年結前夕表現麻麻,其實由10月低位反彈咗咁多,大市能夠喺萬九水平做個年結都算過得去。

美國Tesla倍增當地買車折扣,隔晚股價插水近9%,走勢每況愈下,龍頭唔精神,其他電動車股全線腳軟。比亞迪(01211)盤中曾跌半成,半日跌幅仍達4.4%。蔚小理三傻,跌幅由2.8%至4.4%不等。汽車零部件股亦下跌,主要係美國國會參議院金融委員會要求當地8個最大汽車製造廠商,審查中國零部件供應商對其供應鏈影響。

今日最突出嘅板塊係教育股,繼續由劣幣驅逐良幣,當中嘉宏教育(01935)半日急升23.9%;中國科培(01890)創52周高,半日大升一成半。其他教育股閒閒地升半成以上,都係嗰句,高追免問,食少多教訓,純做觀眾睇表現一定無損失。

2022年只剩餘三個交易日,下周四期指結算,呢兩日期指轉倉高峰期,轉倉活動下,港股唔多跟外圍股市走,當其他股市跌到一仆一碌,港股仲守住條10日線,都係受期指轉倉活動所影響。若然聖誕節過後外圍跟內地股市繼續插水,當大戶完成轉倉後,港股出現追跌亦唔意外,長假前都係唔好手多多。

麥狄文
(徐狄怡‧證監會持牌人)

 

2022年12月21日 星期三

【盤房來料】好淡爭持 等更佳入場位

 https://www2.hkej.com/instantnews/stock/article/3331095/%E3%80%90%E7%9B%A4%E6%88%BF%E4%BE%86%E6%96%99%E3%80%91%E5%A5%BD%E6%B7%A1%E7%88%AD%E6%8C%81+%E7%AD%89%E6%9B%B4%E4%BD%B3%E5%85%A5%E5%A0%B4%E4%BD%8D

日本央行噚日突然宣布擴闊利息波幅上限至0.5%,雖然唔係正式加息,但足以刺激日圓急升,因為咁係意味長久以來極度寛鬆嘅日圓政策已調整,唔排除明年加息。留意目前日本政府仍有買債,但若然繼續緊縮,有可能停止買債,一旦縮表收水,對金融市場定必帶嚟震盪。日央行調整貨幣政策,不僅刺激日圓急升,同時亦推動美10年債息由3.5%回升至3.7%,美股隔晚一度走軟,但其後轉跌為升。本來日本一直係借貸成本至低嘅國家,日本開始調整貨幣政策,難免令全球借貸成本上升,對股市嚟講並非好事。

港股連跌兩日後,今早曾嘗試反彈,不過假期前夕,市場氣氛相當淡靜,無乜資金入場下,反彈亦有心無力,目前係好淡爭持。恒指高開96點,最多升160點見19255半日高位。不過A股疲軟,港股亦曾由升轉跌,一度倒跌27點,見19066半日低位。中午恒指收報19112,升17點;國指報6480,升8點;恒科指收4007,升10點。半日成交額勁縮水,只有386.22億元,唔少缸邊友已提早收爐,準備放聖誕節長假。

藍籌股個別發展,大笨象(00005)半日升1.6%;相反友邦(01299)繼續腳軟,半日跌0.7%。ATMJ乏善可陣,騰訊(00700)跟阿里(09988)半日分別升0.5%及0.7%,無甚睇頭,但都好過京東(09618)郁都唔郁無起跌,美團(03690)仲要跌1%。其他藍籌股都係靜靜局局,睇款都係提早收爐。

不過金礦股喺金價重越1800美元水平下造好,整個板塊嘅股份,除咗山東黃金(01787)僅升0.8%,其他升1.2%至3.2%不等,只係成交都唔多似樣,又係得個睇字。Nike上季度業績好過預期,帶動相關概念股上升,當中申洲(02313)半日升6.8%,藍籌之中表現最好。裕元(00551)漲1.9%,滔搏(06110)揚2.4%,中國動向(03818)升1.6%,但係無乜成交,又係得個睇字。

有大行下調iPhone在12月嘅銷量預測,手機設備腳軟,舜宇(02382)半日跌2.4%;其他手設股普遍跌1%或以上,只有比亞迪電子(00285)半日升1.3%。同樣係比亞迪系,造車嘅比亞迪(01211)半日跌2%,又重返200元樓下,主要係美股嘅電車龍頭Tsela表現每況愈下,連跌三日唔在講,隔晚更急跌逾8%,拖累電車股及相關產業鏈股份下跌。

半日成交縮到400億都唔夠,個個提早收爐,基本上呢兩日港股都收得工,加上喺19000水平樓上,阿Man都講過值博率大減,寧願靜待機會,等一個更佳切入點,阿Man係會等大市回落至20天線甚至100天線水平,先會考慮再入場買貨。

麥狄文
(徐狄怡‧證監會持牌人)

 

2022年12月19日 星期一

【盤房來料】內房抽水持續 進入有波幅 冇升幅階段

 https://www2.hkej.com/instantnews/stock/article/3329226/%E3%80%90%E7%9B%A4%E6%88%BF%E4%BE%86%E6%96%99%E3%80%91%E5%85%A7%E6%88%BF%E6%8A%BD%E6%B0%B4%E6%8C%81%E7%BA%8C+%E9%80%B2%E5%85%A5%E6%9C%89%E6%B3%A2%E5%B9%85+%E5%86%87%E5%8D%87%E5%B9%85%E9%9A%8E%E6%AE%B5

 

上周五美股因為零售銷售數據意外下跌而走軟,不過港股卻未有受影響,除咗係金龍指數上周五表現穩定外,中央經濟工作會議召開,定調支持成長,包括支持住房需求,同時提到支持互聯網平台公司喺經濟發展中發揮領導作用,反而無再講乜嘢共同富裕呀,反壟斷呢啲,重磅科網股今早表現唔錯,帶動港股早段做好。

恒指今早高開後升幅擴大至超過300點,但A股走軟,令升幅收窄後更倒跌。恒指高開21點,其後升幅擴大至半日最多升335點,見19786半日高位,但內地股市疲軟,港股升幅收窄後更倒跌,最多跌174,見19276半日低位。中午恒指報收19362,跌88點;國指半日跌22點;中午報收6612;恒科指半日跌14點,報收4134。半日成交額602.8億元,嚟緊聖誕節長假期,相信呢個星期成交將會較為淡靜。

藍籌股跌多少升,不過ATMJ全線向好,只有京東(09618)半日靠穩無起跌,但騰訊(00700)、美團(03690)跟阿里巴巴(09988)全部做好,美團跟阿里半日分別升1.8%及1.9%;騰訊早段更創三個半月新高,見328.8元,半日升幅則收窄至不足1%。小米(01810)曾幾何時跟ATMJ齊上齊落,但自舊年開始走勢每況愈下,走勢一直落後其他科網股,半日小米跌2%,能夠重上雙位數,已經算係咁。至於中升(00881)半日升3.7%,係升幅最大藍籌股,相反東方海外(00316)半日跌8.5%,表現最差。唔單止東方海外,整個航運股板塊插水,海豐國際(01308)插13.4%;中遠海控(01919)挫4.3%;太平洋航運(02343)插6.9%。中遠海運港口(01199)跌4.3%。上周阿Man都提過,大市喺高位整固,資金開始尋找落後板塊落鑊炒作,但由於長假逼近,炒作可能變得更為短癮,高追值博率有限,寧願少食多教訓。

好似教育股咁,呢排係威係勢,今日唔少股份又急升,閒閒地升半成以上,至勁嘅成實外教育(01565)更大升三成,新東方(09901)則創52周新高。雖然教育股近日節節上升,但食少多教訓,但累計升幅已唔少,高追值博率有限,阿Man自己就唔追貨喇,但亦唔會阻大家發達嘅,有心想博嘅,就自己設定止蝕,唔好因少失大。

中央經濟工作會議繼續強調「房住不炒」,內房股彈得最急嗰段已經過咗,加上近日不斷有內房配股抽水,今日輪到合景泰富(01813)折讓15%配股,股價半日跌12%左右。其他內房股跟物管股偏軟,普遍下跌,但跌幅少於一成,睇嚟呢兩個板塊又要進入有波幅,無升幅嘅狀態。

另一個放完煙花謝晒皮嘅板塊係濠賭股,澳門政府上周五(16日)與6間持現有賭牌博彩公司簽署新一輪博彩經營批給合同,6間公司喺投標文件中承諾投資總額共約1188億澳門元。不過阿Man之前都講過,澳門賭業整個行業運作已變天,喺無咗中介人之後,貴賓廳業務必然受到重大影響,至於中場業務表現如何,都要睇返內地何時復常,以及中國經濟表現如何。

麥狄文
(徐狄怡‧證監會持牌人)

2022年12月14日 星期三

【盤房來料】港股高位整固 資金轉炒落後板塊

 https://www2.hkej.com/instantnews/stock/article/3325800/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%B8%AF%E8%82%A1%E9%AB%98%E4%BD%8D%E6%95%B4%E5%9B%BA+%E8%B3%87%E9%87%91%E8%BD%89%E7%82%92%E8%90%BD%E5%BE%8C%E6%9D%BF%E5%A1%8A

美國隔晚公布的11月份CPI低過預期,道指一度急升逾700點,但市場趁好消息出貨,最終三大指數維持上升,但升幅大大收窄,道指升103點,標指升23點,納指升113點。標指一度升抵4100水平,但呢個阻力唔易過,睇嚟短期標指仍然喺3900至4100之間上落,美股都係喺高位反覆震盪。

雖然美國CPI低過預期,但FOMC喺香港時間周四凌晨出嘅議息結果,都預咗要加息0.5%,只係咁辛苦將個通脹壓咗落嚟,FOMC又點會咁快放水,市場一廂情願,結果好快又回復清醒,美股升幅亦大大收窄。至於夜期亦一度借美股升勢,曾升抵20000大關,甚至高見20100水平,不過隨住美股升幅收窄,夜期亦幾乎打回原形,重返19700水平。

至於恒指,今早高開179點,其後升幅擴大至263點,見19859半日高位,跟着升幅再度收窄,半日恒指升134點,收報19730;國指升61點,報6716;恒科指升2點,收4225。半日成交額747.9億元,今日全日成交額應該都會少過1500億元,反映喺萬九水平之上,願意高追嘅資金減少,估計港股暫時高位震盪,短期難以有重大突破,再大幅上升空間有限。

藍籌股個別發展,ATMJ喺隔晚金龍指數造好下,今日全部上升,騰訊(00700)升2%,美團(03690)升2.1%、阿里巴巴(09988)升1.6%,呢期京東(09618)較落後,半日升0.6%。友邦(01299)半日跌2%,大笨象(00005)則升0.5%,其他藍籌股乏善可陳,目前都係跟大市一齊整固。至於股神巴菲特再度減持比亞迪(01211),但比亞迪股價半日只跌1.2%,市場對股神減持已無之前咁大反應,睇嚟比亞迪嘅股價亦可以穩定落嚟。

噚日有消息指內地將斥資萬億扶持晶片業,刺激晶片股急升,但今早出現回吐,只有ASMPT(00522)仍升1.3%,其他晶片股回吐2.7%至接近8%不等,又一次證明急升高追唔會有乜好結果。今日教育股跟紙業股齊齊落鑊,當中教育股升勢急勁,以光正教育(06068)半日升八成最誇張,成實外教育(01565)亦急升六成,其他教育股閒閒地升兩成,而噚日急升一倍嘅思考樂(01769),半日再升18.7%。紙業股一向都係炒到水尾先落鑊,整個板塊今日見有資金追落後,升幅由超過3%至近一成不等。

不過,都係嗰句,急升高追除咗值博率大減,亦隨時變做韭菜被割,望住呢啲急升股,都係食少多教訓,眼看手勿動。

麥狄文
(徐狄怡‧證監會持牌人)

 

2022年12月5日 星期一

【盤房來料】短線港股有條件回補9月下跌裂口

 https://www2.hkej.com/instantnews/stock/article/3318041/%E3%80%90%E7%9B%A4%E6%88%BF%E4%BE%86%E6%96%99%E3%80%91%E7%9F%AD%E7%B7%9A%E6%B8%AF%E8%82%A1%E6%9C%89%E6%A2%9D%E4%BB%B6%E5%9B%9E%E8%A3%9C9%E6%9C%88%E4%B8%8B%E8%B7%8C%E8%A3%82%E5%8F%A3

上周五美股低開高走,跌幅大大收窄,道指更倒升34點收市。美股暫時仍於高位整固,最近嘅通脹數據反映通脹開始見頂回落,而就業市場表現亦穩定,雖然大型科企裁員,但之前受疫情影響嘅餐飲及酒店業,正積極招兵買馬,創造唔少就業職位,只要通脹繼續受控,聯儲局明年就有放鬆貨幣政策嘅空間。自通脹數據似見頂回落後,美滙指數跌穿110,而美債息亦見回落,美元停止由新興市場流走,全球股市亦逐漸走出陰霾,包括中港兩地股市。反映中概股嘅金龍指數一周累計升逾兩成,係自今年3月以嚟表現最好嘅一星期。離岸人民幣兌美元自今年9月以嚟首次升破7元。同一時間,內地喺防疫方面有放鬆跡象,更多城市唔再要求核酸陰性證明,市場繼續憧憬內地防疫政策轉向。港股今早曾急升近七百點。

恒指高開546點,升幅一度收窄至359點,見19035,但萬九水平支持不俗,升幅再度擴大至699點,見19374半日高位。恒指中午報收19320,升645點;國指半日升236點,報收6604;恒科指升254點,半日報收4133。半日成交額1204.13億元,資金願意高位入市,似乎後市仍可睇高一線。

藍籌股普遍向上,科技股表現突出,AMTJ全線上升,騰訊(00700)升6.1%、阿里(09988)升5.1%、美團(03690)升2.7%;京東(09618)最厲害,半日升7.7%。就連一直落後嘅小米(01810)今日亦急升8.1%,呢一浸上嚟算係追落後。金融股做好,友邦(01299)跟平保(02318)分別升4.6%及8.1%;不過大笨象(00005)表現一般,遲遲未能重返50水平。港交所(00388)半日亦錄得3.8%升幅,大市成交保持暢旺,港交所仍有條件重返350元。農夫山泉(09633)半日跌2.9%,係表現最差藍籌股。

美元回軟,加上中國更多城市放鬆管控措施,對內房及物管股利好。整個板塊炒起,升逾一成嘅物管股比比皆是;內房股則至少升半成或以上。由於內地開始放鬆防疫管控,復常股受捧,餐飲股全線急升一成以上。濠賭股亦急升,市場憧憬通關在即;個別消費股亦有資金追捧。總上醫療股亦向好,三箭頭京東健康(06618)、跟平安好醫生(01833)分別升11.8%及兩成,阿里健康(00241)更創52周新高,半日升16.3%。

港股由結算前約17000水平起步,短短幾日之間急升至19200水平,雖然上周五一度回吐至18600水平,今日再重返19000水平之上並企穩,短線可望回補9月中遺下嘅下跌裂口19500-19600點,暫時淡友難以抗衡,亦無必要逆市擋刀。至於手上無貨現價再追值博率已大減,19600阻力唔易過,無必要為咗幾百點再去高追。

麥狄文
(徐狄怡‧證監會持牌人)

 

2022年12月1日 星期四

【盤房來料】港股急升短線超買需整固

 https://www2.hkej.com/instantnews/stock/article/3314179/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%B8%AF%E8%82%A1%E6%80%A5%E5%8D%87%E7%9F%AD%E7%B7%9A%E8%B6%85%E8%B2%B7%E9%9C%80%E6%95%B4%E5%9B%BA

隔晩美股顯著上升,小非農數字顯示經濟有放緩跡象,通脹應該壓得住,再加上鮑爺講話轉口風放鴿,最快喺12月議息時會放緩加息速度,市場憧憬美息見頂,貨幣政策有望最快明年由緊縮轉返去放鬆,美股三大指數上升,標指逼近4100阻力位,納指成功重返11400水平。至於港股噚晩ADR跟夜期已跟隨美股重上19000大關,不過今早高開後,未能繼續高走,半日升幅無咗一半,萬九關得而復失。

恒指今早裂口高開461點,升幅一度擴大至640點,見19237半日高位,但財新中國11月製造業PMI續低過50,大市升幅收窄,升幅縮水至191點,見18788半日低位,其後略為回升,仍保住近半升幅,但半日收市都低過開市價。恒指半日報收18895,升298點;國指升79點,報收6453;恒科指半日升90點,報3888。半日成交額增至1254.11億元,當中有幾百億係噚日MSCI rebalancing趕唔切入機,今朝補返上板嘅貨,扣除呢一部份,半日成交應不足千億元。

藍籌股見高開有獲利盤湧現,友邦高開報80.55元,盤中曾見82元高位,中午升幅收窄至2.4%,但仍企到喺80水平。港交所(00388)半日升4.6%,暫時喺320元水平爭持。ATMJ全線做好,呢期啲中概股表現強勁,港股呢邊嘅科網股食住個勢,呢浸由低位反彈力度不俗。不過騰訊(00700)未能企穩300,美團(03690)喺180之前亦掉頭,京東(09618)亦喺230之前止步,阿里(09988)叫企穩80水平,暫時都算係咁,四股升幅普遍超過3%,今日阿里升4.4%,表現最高。其他藍籌股普遍向上,只有大笨象(00005)半日跌0.3%,股價未能食住今日升市挑戰50元。

內地有意逐步放鬆防疫措施,市場憧憬內地通關在即,濠賭股今日落鑊,整個板塊升幅至少超過4%,永利(01128)跟美高梅(02282)半日升逾一成。另一個較突出嘅板塊係物管股,以民企物管股升勢較強勁,不過要作中長線投資,阿Man認為揀返國企或央企較為穩陣,始終內房嘅淘汰賽仲有排玩,路遙知馬力,民企短線喺鐘擺效應下係彈得勁啲,但長線嚟講,基本因素遠不及國企同央企。藥股跟火電股逆市下跌,前者估值始終係一個問題,後則因為動力媒價急升一成,成本當然有不利影響,半日整個板塊全線下跌。

至於大市呢三日由16800-17000水平抽升逾二千點,至今早高位19237,短短三個交易日,升幅已接近14%,短線已呈超買,相信都係時候進行整固,短線支持位係之前久久未能突破嘅100日線(約18400),成功突破100日線後企穩,100日線將由阻力變為支持,短線回調至18400-18600,回補今日嘅上升裂口,後市仍有機會向上挑戰19500水平,亦即係9月份由19500向下穿19000嘅下跌裂口。

麥狄文
(徐狄怡‧證監會持牌人)

 

2022年11月30日 星期三

【盤房來料】12月港股仍可看高一線

 https://www2.hkej.com/instantnews/market/article/3312595/%E3%80%90%E7%9B%A4%E6%88%BF%E4%BE%86%E6%96%99%E3%80%9112%E6%9C%88%E6%B8%AF%E8%82%A1%E4%BB%8D%E5%8F%AF%E7%9C%8B%E9%AB%98%E4%B8%80%E7%B7%9A

美國今晚公布小非農數據,加上鮑爺今晚有嘢講,唔知佢會唔會放鷹,隔晚美股三大指數個別發展,道指靠穩,標指跟納指偏軟,納指一直跑輸,始終啲龍頭如蘋果公司及Tesla行唔郁,而標指喺4100水平阻力唔細,亦需要啲時間整固,只要標指守得住3900支持位,美股後市仍可睇高一線。

要留意係美股走勢,都係取決於息口走勢,大前題係通脹要受控,就業市場平穩,加息步伐放緩,美股自然有條件再升。至於港股噚日喺期指結算日急升近千點,今朝一度回吐逾百點,但在沽壓唔大之下,半場倒升。

恒指低開63點,一度跌152點,見18052半日低位,萬八水平有支持,大市轉跌為升,一度升171點,見18376半日高位。半日恒指升40點,收報18245;國指跌3點,報6233;恒科指靠穩,幾乎持平,收3696。半日成交額776.71億元。留意今日係MSCI rebalancing,全日嘅成交會因此有所增加,如果後市要維持升勢,撇除呢部份嘅成交,最好成交額可以維持喺1200億以上。

藍籌股個別發展,雖然中概股隔晚表現唔差,不過今早科網股表現平平,AMTJ只有美團(03690)保持上升0.5%,但騰訊(00700)、阿里(09988)跟京東(09618)半日要唞氣,分別跌1.1%、0.8%及0.5%。汽車股表現突出,吉利(00175)半日升8%,係表現最佳藍籌股,比亞迪(01211)亦升2.8%。內房跟物管股回吐,阿Man都講咗,內銀出手救內房,都係自救嘅一種,但暫時只能治標未能治本,經過一輪消息刺激,股價急升過後都要回歸平淡。

大笨象(00005)宣布出售加拿大業務,同時計劃派特別息,股價今早一度升2.9%,半日收47.05元,升幅略為回順。市場對呢項交易睇法普遍正面,因為今次可能派特別股息,有助安撫對於2020年一度暫停派息,以及呢兩年減少派息嘅投資者。不過以往傳統「聖誕鐘,炒滙豐」呢支歌仔已無唱好耐,今年亦唔會因為呢項交易而令滙控特別當炒,暫時48元係一個大阻力區。

整體嚟講,之前阿Man嘅預測,依家正正跟住個劇本走,早兩日回試20天及50天線,守咗,重上17000水平就再展升浪,暫時預計喺100天線18422會有較大阻力,加上噚日急升完,可能需要啲時間整固一下,18000只要守得到,後市要突破100天線再向上唔難,12月目標係19000至19500點,呢段時間可以趁有回調時收集ATMX等指數權重股。

麥狄文
(徐狄怡‧證監會持牌人)

 

2022年11月24日 星期四

古天后【盤房來料】世盃效應 港股冷清

 https://www2.hkej.com/instantnews/market/article/3308222/%E3%80%90%E7%9B%A4%E6%88%BF%E4%BE%86%E6%96%99%E3%80%91%E4%B8%96%E7%9B%83%E6%95%88%E6%87%89+%E6%B8%AF%E8%82%A1%E5%86%B7%E6%B8%85

隔晚美聯儲局公布11月議息會議紀錄,大部分委員認為息口快要見頂,喺通脹同時見頂下,加息步伐有望放緩,市場見息口有機會見頂,美股三大指數即彈,不過可能係世界盃效應,少咗市場資金參與,美股上升動力唔算勁,加上標指喺4100點阻力唔細,一旦升得穿兼企穩,美股就有機會由熊入牛,呢一點正正係阿Man對整體市場後市唔會睇得太淡嘅原因。

至於港股除咗美股向好之外,反映中國概念股表現嘅金龍中國指數反彈2.27%,港股噚日終止五連跌,反彈99點,今早一度升逾200點,但仍受制10天線(現處17780)。恒指高開160點,一度升235點見17759半日高位,其後曾倒跌6點,見17517半日低位。中午恒指升90點,收報17614;國指升30點,報5975;恒科指升23點,收3579。半日成交額縮到500.47億元,預咗世界盃效應下,成交會縮水。

藍籌股個別發展,ATMJ中,騰訊(00700)跟阿里(09988)分別升0.4及0.9%,京東(09618)半日跌1.6%,暫時喺200元水平爭持,至於明日公布季績嘅美團(03690)半日跌0.7%。由於騰訊大股東南非基金,講明收到美團嘅股份實物分派後打算有秩序地喺市場沽貨,令到呢期美團走勢較弱,但派送係明年3月底嘅事,啲人就有理冇理沽定先。金融股繼續造好,滙控(00005)升1.3%,中銀香港(02388)升2%,平保(02318)升近1%,友邦(01299)升0.2%明顯跑輸。

國常會指出要適時適度運用降準等貨幣政策工具,保持流動性合理充裕。另外,據報國有銀行向房企提供約2200億元人民幣授信額度,民企內房料可受惠,今日內房股跟物管回升。不過內房要解決問題嘅根本,係要靠銷售,要內房真正擺脫目前困局,始終要內地嘅房產市場回暖,但喺目前嘅防疫政策下,呢方面未見有起色。

話咗炒國企改革呢啲比較短癮,早兩日升嘅中字股,今日見回吐,最離譜係中鋁國際(02068)半日急回15.4%,追貨嘅又做韭菜被割。其他中字股普遍回落,跌幅由超過1%至7%不等。講真個市真係無乜好炒,就連指數波幅亦收窄,下周期指結算,睇嚟又要待結算過後,港股先有更明確方向,暫時喺50天線及10天線之間上落。口痕友話炒股不如賭波,咁又無錯,成交縮水,生意淡薄,不如賭博。

麥狄文
(徐狄怡‧證監會持牌人)

 

2022年11月22日 星期二

【盤房來料】Tesla唔轉勢 汽車股閉翳

 https://www2.hkej.com/instantnews/stock/article/3306382/%E3%80%90%E7%9B%A4%E6%88%BF%E4%BE%86%E6%96%99%E3%80%91Tesla%E5%94%94%E8%BD%89%E5%8B%A2+%E6%B1%BD%E8%BB%8A%E8%82%A1%E9%96%89%E7%BF%B3

隔晚美股偏軟,科技股跑輸,不過標指仍守住3900支持,而納指未穿11000,美股仲有條件行上去,市場依家觀望緊今晚聯儲局個議息紀錄,加上周四感恩節假期,周五又得半日市,估計市場都會偏向審慎少少。港股連跌第四個交易日,累跌687點,今早反覆偏軟,目前喺10天線(約17526)爭持。

恒指低開30點,一度倒升96點,高見17751後沽壓再現,大市轉升為跌,半日最多跌244點,一度失守10天線,低見17411。不過其後10天線失而復得,止跌回升,但可惜企唔返上17700水平。中午大市報收17587,跌68點;國指收5973,跌28點;恒科指跌39點,報3592。半日成交額只有618.05億元,世界盃效應下,市況將會更趨淡靜。

藍籌股個別發展,大笨象(00005)半日升0.5%;平保(02318)跟建行(00939)分別逆市升1.4%及0.4%;之前係威係勢嘅港交所(00388),喺近日成交縮水下,今日再跌1.3%;友邦(01299)半日跌0.2%有啲腳軟,又重返75水平搵支持。

口痕友話要留意今日中資電訊股抽高,再加埋一堆基建股炒上,最怕呢啲藍燈籠一落鑊,個市又玩完。市場憧憬國企改革,成批國企股落鑊炒,三隻電訊股表現突出,尤其聯通(00762)半日升一成,係升幅最大藍籌股;中移動(00941)跟中電信(00728)半日分別升2.4%及4.5%。基建方面嘅代表有中鐵建(01186)同中鐵(00390),半日齊齊升8%。仲有其他中乜中物嘅國企股,今日都普遍升半成以上。不過國企改革呢啲,由有計劃到落實都唔知要搞幾耐,呢轉落鑊炒一炒可能又無影,阿Man都係得個睇字算,唔會手多多。

美股嗰邊嘅科技股近日一直跑輸,今日整體科技股繼續受壓,美團(03690)受內地疫情轉趨緊張,多處又圍封防控等影響,半日跌5.6%,成為表現最差藍籌股。ATMJ其他成員,騰訊(00700)近日較強,半日僅跌0.1%;阿里(09988)跟京東(09618)分別跌2.6%及1.5%。

自從Tesla老闆收購Twitter之後,對資金需求殷切,不得不減持手上股份套現,而呢個動作令Tesla 股價近日一浪低於一浪,連帶其他汽車股跟跌。比亞迪(01211)自從股神開始減持,表現一直疲弱,其他汽車股亦無運行。依家真係睇Tesla頭,Tesla要止跌回升,其他汽車股先能止跌。

麥狄文
(徐狄怡‧證監會持牌人)

 

2022年11月21日 星期一

【盤房來料】大市現水平整固 留意成交會否萎縮

 https://www2.hkej.com/instantnews/stock/article/3305488/%E3%80%90%E7%9B%A4%E6%88%BF%E4%BE%86%E6%96%99%E3%80%91%E5%A4%A7%E5%B8%82%E7%8F%BE%E6%B0%B4%E5%B9%B3%E6%95%B4%E5%9B%BA+%E7%95%99%E6%84%8F%E6%88%90%E4%BA%A4%E6%9C%83%E5%90%A6%E8%90%8E%E7%B8%AE

上周五美股三大指數雖然上升,但反映中概股嘅金龍中國指數腳軟跌3%,上周五晚嘅夜期跟ADR都預示今日港股要跌。另一方面,北京跟廣州疫情爆發,嚴厲防控,而內地近6個月來首個與新冠相關的死亡病例,為咗達到社會面清零,睇怕短期都好難放寛防疫措施。恒指過去三個星期升逾兩成,錄得3129點進帳後,今日早段一度回吐逾600點,其後跌幅收窄,重上17600水平。

恒指低開338點,報17654已經係半日高位,開市跌幅隨之擴大,最多跌603點,見17389半日低位。同時失守10日線(17417)後跌幅收窄,10日線失而復得。中午恒指報收17616,跌376點;國指跌135點,報5989;恒科指半日跌107點。半日成交額640.38億元,世界杯噚日開幕,預咗呢三幾個星期,整體市況都會靜返啲。

藍籌股普遍向下,友邦(01299)跟港交所(00388)半日齊齊跌逾3%,不過大笨象(00005)跟中移動(00941)就逆市上升,分別升0.3%及0.5%。油價回軟,三桶油一樣要跌,跌油價關連性最大嘅中海油(00883),半日跌2.5%。

上周五中概股唔跟美股升,都預咗今日啲科技股唔精神,騰訊(00700)雖然一度跌4.6%,但最終跌幅收窄至0.6%,仍然守住280-285水平,算係保持強勢。至於京東(09618)嘅第三季度業績表現唔錯,肯定好過阿里(09988)份業績,不過就預告第四季營收增長緩,加上好消息出貨,今早捱沽,半日跌5.1%。美團(03690)跟阿里半日齊跌4%,美團暫時叫守咗150,而阿里側一直未能企穩80元樓上。

北京跟廣東再爆疫情,市場關注內地疫情再趨嚴峻下,防疫措施不僅未能放鬆,廣州白雲區今起嚴格限制人員流動,變相又作有限度封城。本來已見曙光嘅復常之路再次變動暗淡,相關復常股全部捱沽,包括零售、餐飲跟濠賭股,全部錄得較顯著跌幅。

餐飲股又受封控影響,全線下跌超過半成。零售股亦唔好得去邊,跌幅由超過2%至6%不等。內地疫情反覆,短期與內地通關無望,跌幅較為顯著,普遍都要跌5%以上。

上周五恒指服務公司宣布加入三隻藍籌新貴,不過除咗康師傳(00322)半日升5.8%之外,海爾智家(06690)半日無起跌,萬潤萬象(01209)就跟其他內房及物管股下跌。

阿Man較為有興趣係隻海爾智家,呢啲位博佢守住10、20同50日線,純睇走勢,仍撚有條件上返去挑戰條100日線企穩後再試250日線,先列入觀察類別留意住先。

暫時港股重返萬八樓下,要啲時間整固一下,只要仍守10日(17417)線及50日線(17117),整固完仍有條件再向上挑戰100日線。不過預咗世界杯呢期會靜啲,成交若然縮水到少於1000億,就要留意一下,始終缺乏資金支持下,後市好難更上一層樓。

麥狄文
(徐狄怡‧證監會持牌人)

 

2022年11月18日 星期五

【盤房來料】大市萬八水平反覆 資金炒股唔炒市

 https://www2.hkej.com/instantnews/market/article/3304163/%E3%80%90%E7%9B%A4%E6%88%BF%E4%BE%86%E6%96%99%E3%80%91%E5%A4%A7%E5%B8%82%E8%90%AC%E5%85%AB%E6%B0%B4%E5%B9%B3%E5%8F%8D%E8%A6%86+%E8%B3%87%E9%87%91%E7%82%92%E8%82%A1%E5%94%94%E7%82%92%E5%B8%82

美股隔晚表現反覆,早段因為聯儲局鷹王出嚟放鷹,令道指早段曾跌逾三百點,但當標指跟納指下試3900同11000支持位後,三大指數跌幅逐步收窄,收復大部份失地,港股夜期時段隨美股回升,恒指今早隨夜期及ADR高開,可惜升幅縮水,連跌兩日共297點後,半日僅彈100點。

恒指高開270點,升幅一度擴大至332點,見18378半日高位,但A股走軟,港股升幅亦收窄,升幅一度縮水至69點,見18115半日低位。半日恒指報收18146,升100點;國指報收6191,升50點;恒科指報收3820,升98點。半日成交額777.68億元,中規中矩。

藍籌股個別發展,友邦(01299)跟大笨象(00005)分別跌0.1%及0.5%,內銀跟內險股表現較差,平保(02318)半日跌3.2%;建行(00938)半日跌。恒指主要靠科網股撐起,整個板塊表現不俗,阿里(09988)隔晚公布業績,次季經調整後盈利增19%,叫做高過預期少少,不過公司加碼回購計劃,股價半日升4%,暫時要睇企唔企得穩80水平,企就仲有條件上試85至90阻力位。至於美團(03690)噚日因為騰訊(00700)實物派送嘅消息急回,今日可能啲人睇返清楚個通告,實物派送要明年3月下旬先有貨,今日彈返唔少,半日曾高見167元,雖然升幅隨大市收窄,但仍守到160水平之上。其他科網股全線向上,今日京東(09618)、快手(01024)跟嗶哩嗶哩(09626)收市後公布業績,半日升幅由1.9%至4.9%不等。

生科股以抗疫股表現最好,三葉草(02197)再飆7%;君實(01877)炒高7.9%;歌禮(01672)彈升6%;康希諾(06185)升2.5%;復星醫藥(02196)揚4%;中國生物製藥(01177)走高0.7%;國藥控股(01099)升1.4%。不過醫藥股板塊近日明顯有資金流入,呢個板塊已捱過殺估值最黑暗嘅日子。

教育股落鑊,希望教育(01765)、中教(00839)跟思考樂(01769),全部半日急升逾兩成,其他教育股閒閒地升一成過外。嚟到萬八水平,重磅股升幅有返咁上下,資金開始喺唔同板塊之間流動,有機會出現炒股唔炒市嘅狀況。

 

麥狄文
(徐狄怡‧證監會持牌人)