湯文亮專欄｜現在劈價賣自住樓的人犀利過神

 https://www.orangenews.hk/columns/1161716/%E6%B9%AF%E6%96%87%E4%BA%AE%E5%B0%88%E6%AC%84%EF%BD%9C%E7%8F%BE%E5%9C%A8%E5%8A%88%E5%83%B9%E8%B3%A3%E8%87%AA%E4%BD%8F%E6%A8%93%E7%9A%84%E4%BA%BA%E7%8A%80%E5%88%A9%E9%81%8E%E7%A5%9E.jhtml

文：湯文亮

有一位不太相熟朋友經常叫我賣樓，並且引用投行、分析員甚至玄學家的說話，今日唔賣樓明日就會很後悔，無論我點講，甚至話我自己有分數，都不能夠令那人兄收聲，最後我唯有問，既然叫我賣樓，他自己有冇賣。那位人兄話身體力行，他劈價兩成，低市價一成將自住單位賣走，而且售後租回，租金相宜，點計新業主收租都唔夠供樓，買家真係蠢，條友祈望我讚美一兩句。我唯有話，閣下真係犀利過神，佢雖然受落，不過話我太誇張，人點可以犀利過神，唉，唔讀書又點知我講什麼。

我經常話，除非移民，或者經濟出現問題，否則在任何情況之下，都唔好將自住單位賣走，如果仲要劈價賣更加唔應該，低租金售後租回表面上對賣樓的業主非常著數，其實是中了買家誘敵之計。如果不是低租金售後租回，賣樓的業主一定會四出睇樓，最後他會發覺，其他單位不但租金比較貴，亦冇咁方便，質素也差了一些，結果是不會賣樓，仲要劈價賣，想都不用想。老實說，買家收順些少租金有乜問題，兩年後舊業主被踢走時就知道味道。有老友話，現在劈價賣樓的人是蠢，點解我會話那人犀利過神。

在聖女貞德歌劇裡面講，神雖然是無敵，但始終敵不過愚蠢，所以我話那個劈價賣自住單位的人犀利過神，老友話對對對。

本文為作者獨家供稿

本文為作者觀點，不代表本媒體立場。