美國公布4月消費物價指數(CPI)急升，引發通脹憂慮，美國10年期長債孳息又再抽高逼近1.7厘，科技股又再面臨重重沽壓，納指重挫2.7%，道指跌近2%，標指亦跌逾2%。港股本來已反彈乏力，噚日恒指彈完200點，今早沽壓再現，回復跌勢，恒指跌突噚日反彈升幅，再失守二萬八關。
恒指低開311點，再失二萬八，一度跌398點，見27832點半日低位，創3月25日以來新低，之後跌幅曾收窄至170點，見28060點半日高，可惜二萬八關始終守不住。恒指中午報27970點，跌260點；國企指數報10434點，跌122點；恒科指挫170點，報7690點。
藍籌股以創科(00669)跌幅最大，半日跌6.8%，友邦(01299)跌0.9%，吉利(00175)跌2.9%，繼續向下尋底。蒙牛(02319)終於等到第二大股東，法國達能悉數配售3.9億股，以每股39.8元上板，為指引價格上限，股價平開後逆市做好，半日升近4%。全世界都等緊呢一次配股，阿Man 講過配股不死，必有後福，蒙牛如今配股完成，已無後顧之憂，反而值得留意。
科技股繼續插水，美債息抽升一向都不利呢個板塊，重磅嘅ATMX，跌幅低於2%，已相對其他恒科指成份股叫跌得少。至於之前一向硬淨嘅聯想(00992)半日跌近8%，連最強勢嘅最後一根稻草都插水，有機會係相關股份跌勢已接近尾升。
國家主席習近平昨考察中藥產業，提到要進一步發展中醫藥產業，相關股份逆市走高。中國中藥(00570)升3%；新華製藥(00719)升3.2%；康臣(01681)升2.4%；白雲山(00874)升3.5%；同仁堂科技(01666)升1.3%；神威藥業(02877)升5.4%。其他藥股個別發展，阿Man愛股之一嘅藥明生物(02269)雖然半日跌逾1%，但股價仍穩守百元大關，生化藥股都算唔錯。
早兩日講咗資源股不宜高追，話口未完呢兩日呢批股份沽壓沉重，內地鐵礦石期貨一度挫5.6%，鋼鐵股普遍下跌超過2%，個別三四線鋼鐵股跌幅更達一成或以上。其他資源股同受拖累，暫時都係不宜撈貨，待整個板塊喘穩，再考慮入場。
美股剛開始調整，道指下一個重要支持位喺32000大關，美股呢期有機會反覆下試支持，港股當然無好日子過，暫時港股仍未成功尋底，恒指大有機會進一步下試27000-27500水平，即使早前已減倉作好撈貨準備，呢一刻似乎未係時候，都係畀啲耐性再觀察，買貨幾時都唔急，只有跳車走佬止蝕先要果斷執行。
麥狄文
(徐狄怡‧證監會持牌人)
沒有留言:
張貼留言