內地封殺虛擬貨幣，中國互聯網金融協會、中國銀行協會，以及中國支付清算協會周二發布聯合公告指出，虛擬貨幣嚴重侵害人民群眾財產安全，擾亂經濟金融正常秩序。阿爺擺明唔畀再玩虛擬貨幣，金融機構、支付機構等唔可以用虛擬貨幣為產品及服務定價；亦唔可以承保與虛擬貨幣相關嘅保險業務，或將虛擬貨幣納入保險責任範圍等。講到底，阿爺打擊虛擬貨幣，係為咗未來推數碼人民幣鋪路，而唔會容忍其他虛擬貨幣嘅交易。
內地投資者一向係最受歡迎虛擬貨幣比特幣嘅持份者之一，阿爺一話唔畀玩，引發虛幣斬倉潮，一度引發市場憂慮虛幣斬倉潮延伸至美股，美股隔晚三大指數一度急挫，雖然收市前三大指數收復部份失地，納指更一度倒升，即使收市只係跌咗3點，但反映科技股去到低位已有買盤吸納。除咗虛擬貨幣被阿爺打擊之外，聯儲局有部份官員指未來幾次會議將談論有關縮水QE，市場擔心收水，美股連跌三日。港股喺佛誔假期前連升875點，假期完半日跌二百幾點，失守20日線(約28558)，但中午仍守10日線(約28300)。
恒指低開180點報28413；早段跌幅一度擴大至300點，低見28293，略穿10日線後見支持，跌幅曾收窄至85點，見28508點半日高位，但高位沽壓再現，港股再跌逾兩百點，最終恒指半日收報28382，跌211點；國指午造10613，跌41點；恒生科指跑輸大市，半日升71點，中午報收7889點。
藍籌股中以金融股表現較差，大笨象(00005)半日跌1.7%。建行(00939)更跌2.4%，工行()01398)跟平保(02318)各跌1%，友邦(01299)半日跌2.4%。科技股普遍做好，騰訊(00700)今日收市後派成績表，半日股價變動不大。美團(03690)半日升6%，留意美團企穩262元後，下一個阻力280元，要衝破20日線唔容易，假期前買咗博反彈，要好好考慮食唔食糊。已派成績表嘅京東(09618)上季收入勝預期，半日股價反彈4.5%；網易(09999)上季賺超過兩成，旗下網易雲音樂與Sony達成版權合作，半日股價抽高7.4%。小米(01810)半日亦升近2%，但阿里(09988)唔多爭氣，半日跌1.1%，ATMX之中表現最差。
汽車股頽咗咁耐，呢兩日有返啲起色，中金發表報告，指汽車業估值正出現變化，車企盈利模將轉至「渠道化」，為汽車股注入活力。雖然今日唔少汽車股都逆市上升，但要提醒大家，呢堆汽車股上面唔少蟹貨，每個阻力位唔易突破，暫時只能寸進，難以回復第一季嘅風光日子，短炒有糊好食，唔好存有太大幻想。始終大市表現仍反覆，資金喺各板塊之間輪動，逗留嘅時間愈嚟愈短，切忌短炒變長坐。
麥狄文
(徐狄怡‧證監會持牌人)
沒有留言:
張貼留言