美股隔晚個別發展，雖然勞動力市場數據表現強勁，但市場已消化呢個強於預期嘅數據，美股表現平穩。離岸人民幣再創三年高位，港股今早亦升至近一個月高位。恒指高開106點，早段曾倒跌14點，見29098點半日低位，其後回勇，盤中一度升220點，見29333點，創4月29日以來高位。恒指中午收報29297點，升183點；國企指數報10867點，升19點；恒科指跑輸，半日跌61點，報8062點。
人民幣強勢下，外資持續流入A股，內地股市強勢有利港股氣氛，加上期指結算日指數進一步推高，藍籌股大部份向好，尤其金融股領漲，大笨象(00005)終升破50元，不過能否企穩仍屬未知數。同系恒生(00011)亦升逾3%；建行(00939)升2.1%；友邦(01299)亦升1.2%。長實(01113)回購計劃雖結束。但股價半日仍升5.3%，係表現最勁藍籌股。相反海底撈(06862)半日逆市跌4.6%，藍籌股中跑第尾。至於科技股今日表現平平，美團(03690)將於今日派成績表，半日股價跌近1%；小米(01810)未能升破30元，績後股價做好，今日則見回吐。
雖然阿爺有意遏止商品價格，免得引發更大通脹效應，但隨著經濟復甦，市場對商品，尤其金屬需求增加，帶動銅價上升；而通脹升溫亦令金價高位，資源股今日普遍向上。至於醫藥及醫療股，今日由二三線股份跑出，雖然昊海(06826)被點名指股權高度集中，但股價半日再創新高升2.3%。由於昊天股權集中，加上市值細細只有三十幾億，人為操控下股價自然愈升愈有，炒得呢啲股仔，升嘅時候唔好得意忘形，一見調頭唔對路，要識第一時間跳車。
雅生活(03319)終向市場抽水，以每股37.6元配售8666.68萬股新H股，集資32.59億元，雖然暫時仍守批股價，但今日收市失守38元，之前有平貨買咗都好食糊。整體物管股今日表現麻麻，可能同市場擔心物管股抽水潮持續，陸續有物管股夠鐘就批股集資。其實物管股批股集資，只要係用於未來收購及業務發展，批股後反而掃除不明朗因素，只要消化批股消息後靠穩，係可以搵位上車作中線投資嘅選擇。
麥狄文
(徐狄怡‧證監會持牌人)
沒有留言:
張貼留言