美國上周新領失業救濟人數創疫後新低，市場憧憬經濟持續復甦，美股連跌三日後反彈，可惜騰訊(00700)派出一份差過預期嘅成績表，拖累港股高開低走，幸而半日仍守於10日線(28282)之上。恒指高開134點，報28548點已屬半日高位，騰訊開市後越插越深，港股亦掉頭回落，恒指一度倒跌163點，見28286點半日低位，逼近10日線見支持，恒指跌幅收窄，半日報收28391點，跌58點；國指則升45點，中午報收10687點；恒科指則跑贏，雖然騰訊腳軟，但AMX齊齊做好，恒科指半日升102點，重上8000大關，報收8017點。恒科指於上周開始築底，目前先以8200點為首目標，下一目標睇下上唔上到8600點。
騰訊季績差過預期，而公司跟其他科網巨企一樣，計劃利潤增量用於投資，意味住今年未來三季嘅non-IFRS盈利嘅按年增長，可能仲差過第一季，即係介乎零至22%，本來放眼將來係好事，但似乎市場唔多受落，今日股價低開低走，半日跌3.9%，係表現最差恒指成份股及科指成份股。不過其他重磅股表現算係咁，普遍向上，令恒指跌幅得以收窄，並力保10日線。
雖然通脹預期並未降溫，但市場都幾buy經濟復甦，只要息率循序漸進地向上唔急升，科技股應該頂得住，隔晚納指反彈近1.8%，今日恒科指亦重上八千大關，科技股整體回勇。小米(01810)第二期智能工廠將於2023年底落成，股價半日升1.3%，留意28元水平阻力唔細，短炒喺26附近上咗車，好睇住食糊，暫時市況反覆，上落市短炒咪太貪心。今日收市恒指服務公司將公布季檢結果，快手(01024)、京東(09618)及網易(09999)有機會染藍，三股半日分別升4.9%、3.6%及4.3%。雖然話今次恒指成份股數目有機會增至60隻，即係會多五隻股份入選晉身藍籌股，只係恒指服務公司會否一口氣染藍三隻科網股，阿Man有啲懷疑。
除咗上述科網三寶，生物科技股亦係今次染藍熱門板塊，當中已甩B嘅信達生物(01801)呼聲甚高，但股價升至90元水平似要先作整固。而其他生物科技股有資金追捧，康龍化成(03759)創上市新高，半日升2.6%，而眾多生物科技股中，以康寧傑(09966)半日升17%最勁揪，板塊內其他股份，閒閒地升2%或以上。
話咁快又一個星期，嚟到星期五阿Man甚少買貨，反而係搵機會減磅，之於假期前叫留意批股後李寧(02331)唔死得應該有得諗，同樣屬於有機會入選藍籌嘅熱門股之一，暫時企住65元水平之上，只要企穩，稍後上試70元水平應無難度。
麥狄文
(徐狄怡‧證監會持牌人)
沒有留言:
張貼留言