美股上周五表現唔錯，市場再次憧憬拜登政府所建議嘅6萬億美元刺激經濟方案，三大指數總括上星期都有進帳。至於近日強勢嘅A股，因為今早官方製造業PMI數據差過預期，加上廣州出現印度變種病毒個案，市場憂慮疫情於內地反彈，A股有啲腳軟，上證指數失守3600點，港股亦受拖累，喺舊經濟股回軟下，今日高開低走。
恒指高開101點，報29225，開市呢口價已經係半日高位，開市即掉頭向下，最多跌184點，見28939半日低位，29000關再告失守，幸而暫時仍守住多條移動平均線。恒指中午跌145點，報收28978點；國企指數升5點，報10799；恒科指逆市跑出，半日升52點，報8010點。
藍籌股普遍作軟，友邦(01299)跟大笨象(00005)分別跌4%及2.9%，前者更成為今早表現最差藍籌股，可能跟日內恒指權重比例下調有關，而廣州疫情升溫亦令中港兩地短期無望通關，之前市場憧憬友邦通關後，內地客人生意可回升嘅如意算盤打唔響，友邦股價受壓亦合理。至於大笨象唔係咁容易企穩50大關，皆因50樓上蟹貨一籮籮，仍需要時間消化。
科技股個別發展，美團(03690)收入好過預期，即使預咗未來幾季要加大資本投資，但股價半日曾升逾8%，其後回順，中午仍錄得7.2%升幅。留意其最近一個阻力位喺290元，而310元阻力更大，有貨短炒自己執生。文旅部展開短視頻平台音樂產品檢查，快手(01024)上周落咗地獄後，今日繼續向住唔知第幾層地獄出發，跌穿200元，半日跌3.5%，再創上市後近低。其他科技股普遍有唔錯表現，逆市向上跑贏大市。其實阿爺對科網股監管跟審查未有停止過，短期整個板塊表現仍會反覆，唔建議喺股份上揚日子追貨，炒上落都吼跌嗰日先搵位博反彈。
疫情反覆資金繼續炒醫藥股，阿Man至愛嘅藥明生物(02269)半日升4.3%，重返120水平；康方生物(09926)又創新高，破頂唔估頂，有貨set好個止賺位繼續持有。個別醫美股又再炒高，不過大部份醫美股都係水鬼升城皇，由不足50億市值炒上，主要係靠貨源歸邊而炒起，基本因素同業績係咪支持到估值，到水退嗰日就知邊個無着褲。阿Man都係鍾情龍頭股，至於貨真價實，唔係靠圍飛作歹，莊家活動。
麥狄文
(徐狄怡‧證監會持牌人)
沒有留言:
張貼留言