美滙走弱，人民幣強勢吸引外資湧入A股，單係噚日內地股市市值單日大漲1..83萬億人仔，滬深300指數全日飆升3.16%，創去年7月6日以嚟最大單日升幅，亦係自3月8日之後首次升穿100天移動平均線。事實上，A股已經歷咗三個月調整期，調整明顯已屆尾聲。即使美股隔晚回吐，港股今早仍能隨日A股做好。恒指高開145點，重返二萬九水平，開市無耐恒指升幅曾收窄至117點，見29027點半日低位，其後再發力走高，一度升263點，見29174點，創4月29日以來新高。恒指中午報收29117點，升206點；國企指數報10849點，升56點；恒科指升64點，報收8068點。大市已成功收復100日線(28870)，可惜暫時成交仍未算配合，半日只有857.34億元。
藍籌股個別發展，海底撈(06862)得到大摩加持，股價半日升4.7%，為最大升幅藍籌；ATMX續有反彈，美團(03690)跟騰訊(00700)半日分別升3%及1.3%。阿里健康(00241)業績雖然扭虧，但業績表現差過預期，半日跌近7%，藍籌之中表現最差。而連日創新高嘅申洲(02313)跟安踏(02020)創新高後回吐，半日分別跌1.1%及0.1%。
醫藥股個別發展，疫苖股復星醫藥(02196)半日升5.8%；藍籌藥明生物(02269)半日升1.2%，創三個月高位，基石藥業(02616)、東陽光藥(01558)跟遠大醫藥(00512)半日更升逾一成。另一個有突出表現板塊為濠賭股，市場憧憬中港澳三地喺疫情控制得宜下可於短期內通關，如自由行恢復，旅行團等重啟，整個板塊下半年有望跑贏大市，濠賭股今日有資金追捧， 而阿Man心水當然係龍頭銀河娛樂(00027)，股價如能於65元企穩，有望挑戰70元。
長汽(02333)
採納A股股票期權激勵計劃，帶動股價半日升逾6%，可惜仍受制100日線。暫時汽車股只係反彈，仍難回復之前強勢，若然手上仍有高位蟹貨，考慮趁反彈逃生。仲有兩日期指結算，呢幾日大市走勢似曾相識，尤如4月底結算前，指數同樣推高，但結算過後大市再度走軟，今個5月再呈如4月一樣先低後高格局，小心6月又案件重演，5月底結算後，6月初再度走軟，屆時再收集有潛質股份，好過喺呢幾日升市時高追。
加上6月底為半年結，大戶有可能粉飾櫥窗，若然跟4月及5月一樣呈先低後高格局，或者6月初係收集嘅好時機。
麥狄文
(徐狄怡‧證監會持牌人)
沒有留言:
張貼留言