【盤房來料】黃金上升周期難肯定 寧博其他金屬價再升

 https://www2.hkej.com/instantnews/market/article/2793684/%E3%80%90%E7%9B%A4%E6%88%BF%E4%BE%86%E6%96%99%E3%80%91%E9%BB%83%E9%87%91%E4%B8%8A%E5%8D%87%E5%91%A8%E6%9C%9F%E9%9B%A3%E8%82%AF%E5%AE%9A+%E5%AF%A7%E5%8D%9A%E5%85%B6%E4%BB%96%E9%87%91%E5%B1%AC%E5%83%B9%E5%86%8D%E5%8D%87

隔晚美股道指再創新高，其餘兩大指數亦向上，不過科技股及高增長股沽壓重重，至於港股呢邊繼續反彈。「跨境理財通」細則出台，加上內地出口好過預期，財新PMI升至4月個高位，港股喺金融股做好下，一度重上多條移動平均線，可惜深圳股市下挫，拖累恒指升幅收窄，目前尚算守住條10日線(28775點)。

恒指高開83點，升幅收窄至31點，見28669半日低位，其後數據理想推動大市升246點至半日高位28884，收復多條移動平均線，但其後內地深成指及創業板指數下挫，港股升幅收窄，20(28803點)及50(28867點)日線得而復失。恒指中午收報28787點，升149點；國企指數報10771點，升15點；科指跑輸，半日跌95點，報8038點。半日成交額縮返去748.96億元，都係周末效應。

藍籌股創科(00669)創新高，半日升3.1%；友邦(01299)升2.4%，話咗呢隻係好嘢，大笨象(00005)半日跌0.3%，港交所(00388)升0.6%，其他藍籌個別發展。舜宇(02382)表現最差，半日跌4.8%；其他重磅科技股，只有小米(01810)得到北水垂青，半日升0.78%，ATM全部腳軟，跌幅少於1%，又唔算跌好多，但科技股中嘅Sass股跌到一仆一碌，原因係美國同類股份遭洗倉。

內地出口市場表現強勁，航運股續受捧，當中最勁係中遠海發(02866)追落後半日升一成，中遠海控(01919)再升8.5%；早兩日阿Man喺聊天室推介嘅海豐國際(01308)半日升逾4%創新高，再之前推介嘅太平洋航運(02343)亦升1.4%，其他航運及港口股，普遍升1%以上。

唔單止航運股做好，金屬股亦有好表現，金價重上1800美元大關，帶動金礦股做好，留意金價喺1840美元有阻力，而加密貨幣炒風旺盛，已有取代黃金成資金避險工具嘅趨勢，對於金價係咪進入上升周期，阿Man有保留，唔建議呢啲位去追金礦股，反而其他具工業用途嘅金屬喺供需失衝下，更具上升空間，噚日建議吼位買江西銅(00358)，今日表現唔錯。

歐盟有官員指已暫停批准中歐投資協定工作，市場擔心不利新能源產業，相關股份捱沽，之前阿Man講咗呢個板塊無運行，2月份過度炒作，新能源汽車就人人都要參與，當愈嚟愈多產業以外嘅公司話要涉足呢個行業，相關股份走勢開始由盛轉衰。

P.S.下周一作者休假，《盤房來料》專欄休息一日，周二回復正常。

麥狄文
(徐狄怡‧證監會持牌人)