美股上周五晚美現理想，道指跟標指再創收市新高，中港股市今早做好。恒指低開9點後，一度跌162點至半日低位28806點，略穿10日線後即反彈，倒升兼且收復50日線(約29202)，一度升350點，見29319點，為3月18日以來高位。恒指中午報收29201點，升232點；國指升84點，報11111點；恒科指則升139點，報收8371點，跑贏大市。半日成交額835.5億元略為回升，但相對一二月份嘅暢旺情況，尚差一大段距離。
藍籌股個別發展，港交所(00388)半日升3.2%，表現強勁，某程度上反映市場氣氛有所改善。一直受政策風險所困擾嘅平台股，今日定返些少，只有阿里(09988)跟京東(09618)逆市跌，騰訊(00700)、美團(03690)跟小米(01810)分別升0.7%及1.7%。其他科技股普遍做好，但升幅當然難以跟第一季初嘅強勁力度相比。
汽車股走勢大有改善，上海實展今日開幕，整個板塊今日繼續反彈，吉利(00175)再彈6.4%，成為表現最好藍籌股。之前吉利死死吓，上周公布推出新汽車品牌新車「極氪」首款純電動車型「極氪001」，獲多間大行從新睇好，市場再見資金追入。其他汽車股亦見有追捧，長汽(02333)升6.1%；比亞迪(01211)升3.6%；北汽(01958)升3.4%；東風(00489)升3.2%。汽車零件股亦落鑊，當中五菱汽車(00305)客戶夥大疆生產汽車，半日升22.5%，其他汽車零件股普遍錄得一成升幅，耐世特(01316)半日升3.6%已算好唔爭氣。
內地五一假期火車票將於4月17日開售，截至4月17日下午6點，已發售5月1日車票315萬張，為2019年同期數目嘅三倍。出行股全線做好，阿Man上星期曾於收費聊天室內推介嘅同程藝龍(00780)升至超過兩年高位，半日升2.8%；復星旅遊(01992)升6.7%；而今日首度登陸本地魚缸嘅攜程(09961)較招股價升3.5%，好過其他近日首掛都破底嘅新股。內地航空股亦有追捧，公路股升幅則較溫和。濠賭股亦上升，升幅由2%至8%不等。
雖然恒指成功企穩喺29000水平之上，但要回復強勢，必要向上挑戰29500，並上破30000方能回復強勢，而成交金額未能重返1800億至2000億元，上升動力亦不足，暫時維持上落市格局預測不變，升市盡量忍耐少追貨，反而係檢視手上投資組合，有冇乜嘢股需要趁高減持嘅好機會。
麥狄文
(徐狄怡‧證監會持牌人)
沒有留言:
張貼留言