全球多國疫情反覆，加上疫苗副作用或令接種進度受阻，美股隔晚由上周五高位回落，納指更跌近1%。大型科技股普遍回落，美企陸續派成績表，至目前為止約有一成標指成份股已公布第一季度財報，其中八成業績超過預期。分析指上半年美股仍可維持升勢，下半年波動性則加劇。港股表現仍反覆，恒指早段跌逾200點後拗腰回升，目前喺二萬九水平爭持。
恒指低開143點，早段曾跌220點，見28885點半日低位，其後喺10日線(約28822)見支持回升，一度倒升33點，見29139點半日高位。恒指中午報收29105點，跌不足一點；國指跌11點，報收11081點；恒科指跌27點，報收8318點。
美國10年期債息回復至1.5厘水平，對於科技股嚟講係好事，偏偏內地嘅平台股一直受反壟斷法威脅，喺政策風險困擾下，呢類股份暫時無運行。美團(03690)宣布配股，不過有別於騰訊(00700)大股東減持，今次美團係集團先舊後新配股集資，講明係用作無人配送等科技研發及一般企業用途，即係市場預期嘅社區團購業務要燒錢。
美團股價先跌後回升，反映市場認同今次美團集資對其業務發展有利，加上騰訊亦有認購，有助消除主要股東可能減持嘅疑慮。美團今日雖然先跌後拗腰，但睇返騰訊批完股都係上上落落，表現較為反覆，估計平台股呢期都係咁上下，有心買美團都唔急追貨，280至290之間收集。JTAMX呢幾隻巨頭，呢期表現最好係小米(01810)，一來非平台股受政策風險有限，二來公司持續回購，對股價帶嚟支持，留意小米喺27至28元阻力較大，未有貨嘅一係等回吐至26元樓下吸納，一係等突破28元企穩先入場。
內需消費股今日做好，市場又炒返五一假期概念，餐飲股較受歡迎，可惜成交只係一般。鋼鐵股今日做好，除咗鐵貨(01029)升逾8%，其他鋼鐵股升幅微不足道，呢個板塊經常急升後橫行，除非買定貨捕住等，想博短炒經常事與願違悶到死。
麥狄文
(徐狄怡‧證監會持牌人)
沒有留言:
張貼留言