美股上周五晚回升，標指跟納指更升逾1%，但港股未能乘美股強勢收復50日線，半日喺二萬九水平上落爭持。恒指高開27點，一度倒跌83點，見28995半日低位，幸而二萬九關好快又收復，半日最多升160點，見29238點半日高位，亦係一星期高位。可惜50日線(29168)得而復失，又再倒跌。至中午收市恒指則報收29102點，升18點；國指報收11049點，跌18點，恒科指則跑贏大市升1.4%，報收8586點。
美團(03690)半日升3.6%，為最大升幅藍籌股；五一假期預計會釋放消費力，海底撈(06862)半日升2.5%；港交所(00388)快將公布首季業績，半日升近2%，雖然大市成交少咗啲，但預計今年IPO集資額都會有咁上下size，港交所續前落鑊，但留意500水平有阻力。大笨象(00005)明日派季度成績表，業績前靠穩，不過公司喺2月份派全年業績時已表示，首個季度唔會派息，2022年前亦唔會重啟回購，無咗呢兩個對股價有一定支持嘅利好因素，睇怕今次份業績都無乜值得憧憬。其他藍籌股表現好壞參半，而陸續會公布業績嘅內銀股普遍偏軟，內銀股一向唔係阿Man杯茶，今次業績亦唔值得有乜嘢期望。
變種病毒令亞洲多地疫情再急轉直下，疫苗股及相關病毒治療藥明概念股落鑊，而醫美股承接上周升勢，今日續見炒作，醫思醫療(02138)創新高，上面蟹貨重重嘅四環醫藥(00460)半日再升6.8%。不過追唔追貨阿Man就兩睇，依家大市仍然反覆，今個星期又多重磅股業績，星期四美國聯儲局議息同埋期指結算，高追任何板塊都唔見得有着數。好似航運股跟資源股，即使大方向同氣氛已轉強勢，都係等回調整固候低吸納，好過高追。
字節跳動已表示喺TIKTOK仍有官司纏繞下，暫未有考慮上市計劃，快手(01024)暫時得以保持其獨有地位，股價今日大反擊，半日重上270元水平升近7%。留意快手喺280元阻力較大，之前250元邊有撈貨，累計已有一成升幅，不妨考慮食一食糊，記住依家個市仍未回復一二月時嘅 強勢，尤其大市成交一直唔配合，暫時都係要密食當三番，未直過份進取。
麥狄文
(徐狄怡‧證監會持牌人)
沒有留言:
張貼留言