今年潛在IPO

【抽唔抽？抽唔抽到先？】中概股今年繼續排晒隊嚟香港上市，消息多到暈，小編根據截至今日（13/1）嘅市場消息，幫大家（同自己）整理一吓先......

 

1.快手：短視頻第一股？

當中似乎內地短視頻平台快手真係最「快手」，舊年11月已交上市申請畀港交所，之前傳過想2月5號掛牌；近日傳最快下周上市聆訊，擬集資50億美元(約388億港元)，順利嘅話農曆新年前可招股，有望成國内「短視頻第一股」。

 

2.嗶哩嗶哩：今年首隻中概S股？

同樣係內地視頻平台(不過唔係「短」視頻)嘅嗶哩嗶哩(Bilibili)(美股代號：BILI)，就有機會成為今年首隻來港第二上市嘅中概股。

據報嗶哩嗶哩已用保密形式向港交所遞交申請，計劃3月招股。傳出嘅集資額由舊年嘅10億美元，最新增加到25億至30億美元(194-232億港元）。

 

3.百度：上半年掛牌？

想來港第二上市嘅，仲有最近同吉利母公司合作搞智能電動車嘅百度(美股代號：BIDU)，據報呢間內地搜尋引擎龍頭擬最快上半年發售約5%至9%股份，集資最少35億美元。

 

4.京東物流：第二/三季分拆上市？

有炒開京東(9618)嘅，都知佢計劃分拆京東物流來港上市，最快第二或第三季掛牌，籌至少40億美元(約310億港元)。

 

5. 唯品會、歡聚：第二/三季回流？

同樣計劃第二或第三季來港上市嘅，最新據報仲有唯品會(美股代號：VIPS)同歡聚(美股代號：YY)，料分別籌25億(194億港元)及12.5億美元(97億港元)。

 

6.騰訊音樂、滴滴：今年來港IPO？

其餘傳今年嚟香港上市、但未有具體預計時間嘅，仲有騰訊音樂(美股代號：TME) 同內地網約車平台滴滴出行。

 

騰訊音樂集資目標由最初傳嘅20億美元加碼到最多35億美元(271億港元)；而滴滴目標估值就介乎600億至800億美元（約為4650億至6200億港元）