隔晚美股假期休市，港股自動波踩油向上衝，夜期承接噚日升勢，已直逼29000大關，今日再喺北水湧入下，一度勁升近千點，創逾20個月高位，明顯跑贏區內其他股市。恒指高開237點，報29100，咁就係半日低位，大市愈升愈有，臨近中午恒指最多升985點，見半日29848，再創2019年5月3日以來高位，中午收報29746，升883；國企指數升333點，報11796；恒科指再創新高，半日飆359點，報9475點。
留意半日成交額已達1620億元，當中556億元係北水成交額，淨流入188億元，而噚日全日北水全成交都只不過係761億元，而噚日嘅淨流入金額為230億元。北水單日成交額，今日大有機會創自互聯互通機制成立以嚟單日新高，北水買貨唔停手，相信除咗係力撐被美國制裁嘅股份之外，年初基金包括私募基金進行資產配置，亦係令北水呢幾日大量投入港股嘅原因。
藍籌股中只有吉利(00175)斯人獨憔悴，其餘所有藍籌隨大市做好，港交所(00388)話咁快變身大牛股，半日升6%，盤中高見525元上市新高。ATMX全線上升，美團(03690)跟騰訊(00700)創上市新高，半日分別升6%及1.1%，阿里(09988)升2.3%，但留意250至260元阻力唔細。上星期被制裁嘅小米(01810)，半日升6%，而上周五阿Man係叫喺29元水平買入，買完兩日又執一成，呢啲快錢去邊度搵。內房股今日做好，大追落後，相返當炒嘅物管股先升後回，又係資金喺唔同板塊輪動。不過內房股只係追落後，仲要受到多項政策制肘，相反物管股有政策扶持，如果急升先嚟內房股，倒不如趁物管股回調伺機買入。
中港兩地股市成交暢旺，加上今年回流港股或A股上市嘅中概股數目唔少，內地券商當然受惠，中金(03908)創上市新高，中午勁升11.3%；中信建投(06066)彈升6.7%；其他股商股閒閒地升半成或以上。不得不提係升到券商股，大市又係炒到水尾嘅時候，尤其指數升到接近30000點呢啲心理關口，唔多唔少都會有回調壓力，未必可以一舉突破，大家好趁升得急嘅時候減減磅，否則高峰過後又個睇字。
明源雲(00909)今日見大手上板30球，每股47.88元，涉資超過14億元，半日股價跌4.1%。明源雲噚日股價升至前高位，今日就整劑大手上板，估計係有投資者作場外交易。有買有賣，但斷估肯以47.88元接貨嘅大戶都唔係傻，現價50元邊買入，博之後再炒高倉新高，用返個上板價嚟做止蝕參考，都叫有數圍，可以博一博。
麥狄文
(徐狄怡‧證監會持牌人)
沒有留言:
張貼留言