https://hk.appledaily.com/finance/20210128/FL4C7OGIORERNMTLOZOS5D3M5A/
■農曆新年內地休市，香港在這段期間有5個交易日要活在沒有北水的日子。戰友要搵個靚價食糊，下星期應係最佳時機。 資料圖片
大市今星期狂升急回，但總括來說1月都係大牛市，戰友們應賺到盤滿缽滿，今次急升的最大推手，是源源不絕的北水，去年北水整年淨流入6,721億元，但截至星期三收市，一月已錄得淨流入2,965億元，等於去年金額的四成。今月瘋狂買貨，其中一個原因係美國制裁，令MSCI及富時指數要剔除中移動（941）、中海油（883）及中芯（981）等股份，北水嚟護盤，比較易理解，但一月份買了幾百億騰訊（700）係咩因由，就真係眾說紛紜了。
港股市場A股化，已越趨明顯，本月更是靠北水撐起，近兩星期北水流入得較少的兩天，係1月22日及26日，分別只有108億及148億，恒指在這兩天分別跌了479點及767點，所以有不少戰友都擔心，北水萬一退潮，即使唔係淨流出，只係減少流入，已足夠引發一個深度調整。
青冰沒有水晶球，答唔到你北水幾時收水，但有一個日子，就必須要記着，就係2月9日，內地農曆年長假，滬深交易所將於2月11日起休市，港股通亦將在2月9日起休息，至2月17日，香港在這段期間有5個交易日，港股要活在沒有北水的日子。正常情況下，呢一浸炒得咁急，長假期前食吓糊，屬正常不過，所以戰友或要早過北水食糊，才會搵到個靚價，下星期應係最佳時機。
萬人空巷的快手（1024），相信凍資6,000、7,000億應該無走雞，所以在下周四放返啲孖展資金出來前，港股水源就冇咁充足喇，在這個環境下，大股的動力將減弱，如手持輪證，宜小心因縮窩而招損失，但等到資金回籠時，亦不要太過興奮立即衝入場，留意返北水放假的日子，這段時間最好就執吓倉，汰弱留強，心水股份有回吐先至出手吧。
青冰
沒有留言:
張貼留言