隔晚美股偏軟，科技股跑輸，不過標指仍守住3900支持，而納指未穿11000，美股仲有條件行上去，市場依家觀望緊今晚聯儲局個議息紀錄，加上周四感恩節假期，周五又得半日市，估計市場都會偏向審慎少少。港股連跌第四個交易日，累跌687點，今早反覆偏軟，目前喺10天線(約17526)爭持。
恒指低開30點，一度倒升96點，高見17751後沽壓再現，大市轉升為跌，半日最多跌244點，一度失守10天線，低見17411。不過其後10天線失而復得，止跌回升，但可惜企唔返上17700水平。中午大市報收17587，跌68點；國指收5973，跌28點；恒科指跌39點，報3592。半日成交額只有618.05億元，世界盃效應下，市況將會更趨淡靜。
藍籌股個別發展，大笨象(00005)半日升0.5%；平保(02318)跟建行(00939)分別逆市升1.4%及0.4%；之前係威係勢嘅港交所(00388)，喺近日成交縮水下，今日再跌1.3%；友邦(01299)半日跌0.2%有啲腳軟，又重返75水平搵支持。
口痕友話要留意今日中資電訊股抽高，再加埋一堆基建股炒上，最怕呢啲藍燈籠一落鑊，個市又玩完。市場憧憬國企改革，成批國企股落鑊炒，三隻電訊股表現突出，尤其聯通(00762)半日升一成，係升幅最大藍籌股；中移動(00941)跟中電信(00728)半日分別升2.4%及4.5%。基建方面嘅代表有中鐵建(01186)同中鐵(00390)，半日齊齊升8%。仲有其他中乜中物嘅國企股，今日都普遍升半成以上。不過國企改革呢啲，由有計劃到落實都唔知要搞幾耐，呢轉落鑊炒一炒可能又無影，阿Man都係得個睇字算，唔會手多多。
美股嗰邊嘅科技股近日一直跑輸，今日整體科技股繼續受壓，美團(03690)受內地疫情轉趨緊張，多處又圍封防控等影響，半日跌5.6%，成為表現最差藍籌股。ATMJ其他成員，騰訊(00700)近日較強，半日僅跌0.1%；阿里(09988)跟京東(09618)分別跌2.6%及1.5%。
自從Tesla老闆收購Twitter之後，對資金需求殷切，不得不減持手上股份套現，而呢個動作令Tesla 股價近日一浪低於一浪，連帶其他汽車股跟跌。比亞迪(01211)自從股神開始減持，表現一直疲弱，其他汽車股亦無運行。依家真係睇Tesla頭，Tesla要止跌回升，其他汽車股先能止跌。
麥狄文
(徐狄怡‧證監會持牌人)
沒有留言:
張貼留言