鮑爺向市場派定心丸，話唔會輕易收水；耶媽又幫手安撫，指通脹可控，華爾街鬆一口氣。，美股隔晚做好，納指跟標指雙雙破頂創收市新高；A股今日做好，帶動港股亦做好，恒指半日升逾300點，重上100日線(28957)；恒科指更升逾2%。恒指高開120點，甫開市已重返29000大關，雖然早段升幅曾縮水得返89點，見28971半日低位。其後A股走高，推動恒指升幅擴大至354點，高見29236點，最終恒指半日揚327點，半日收29210；國指半日報收10846，升168點；恒科指半日升177點，半日報收8217。
藍籌股大部份表現唔錯，港交所(00388)半日升2.7%，暫時剛好升抵100日線前受阻，要再睇有冇本事繼續向上突破。創科(00669)半日彈2.7%，總算守住條100日線，再睇有冇機會上返去140元之上。藥明生物(02269)不愧為阿Man愛股，半日創新高再升1.2%。納指再創新高，本港科技股做好，科網巨頭帶動恒科指跑贏上市。美團(03690)創逾兩個半月新高，半日升近4%。有消息指騰訊(00700)快將落實被重罰100億元人民幣，雖然罰款數目唔嘢少，但總算計清楚條數，陰霾盡除反而令股價有機會翻生，暫時半日升1.8%，仍未重返之前595元配股價之上。阿里(09988)半日升2.2%，小米(01810)反而較落後，但能企穩27元之上都唔錯。快手(01024)獲奧運轉播權，終能止住跌勢，半日升7%，但要重返50日線，即225元水平之上，恐怕唔係咁容易，始終上面太多蟹貨。
內需股今日做好，百威亞太(01876)半日升4.7%，成份股中做得最好，其他內需股升幅至少有2%或以上，而阿Man睇好嘅華潤啤洒(00291)今日升做好，早兩日喺70樓下上車，時間啱啱好。至於醫療股個別發展，藥明創新高，但信達生物(01801)見回吐，不過88-89元又可以一試，大方向都係向好，暫時仍守於多條移動平均線上，20日線即89元有爭持。平安好醫生(01833)早幾日再得到連登契媽旗下基金增持，股價拾級而上，留意阻力為100日線約98.5元，希望呢次靠契媽助力，可重返紅底股之列。
話咁快又一個星期，嚟到星期五都係少做少錯，除非喺觀察名單嘅股份有特價抵買，否則周末前夕都以減倉套現為主，尤其大市已逼近29500點大阻力位，仲要又係臨近結算嚟挾倉，小心期指結算及半年結過後，大市又繼續回復反覆上落悶局。
麥狄文
(徐狄怡‧證監會持牌人)
沒有留言:
張貼留言