6月27日，周日。美股於短短八個交易日由「緊縮恐慌」變為「再通脹翻生」，許多投資者剛急急腳拆倉又拿拿臨建倉，重點已不在通脹是否強勢回歸，而是宏觀環境轉變如幻似真，決策者回應甚難捉摸，如是者，前周集體reflation off，上周齊齊reflation on，但股民改變主意永遠唔夠市場快，貼市炒作粒粒皆辛苦，奔波勞碌之餘，執埋執埋未必夠一次急轉向輸。
美國利率點陣圖發表後，長短債息差急劇收窄就是一例，聯儲局嚇完炒家再派定心丸，拆倉、建倉輸咗再賭，勝負難料，但可以肯定的是，宏觀大環境一天未見明確趨勢，個個禮拜彷彿都是Game-changer，結果次次得啖笑，跟過大海買大細所差無幾。
買市又贏一鋪
反觀標普500指數，唔覺唔覺四千三在望，哪怕外面人聲鼎沸，慢升破頂格局始終未變，不管那是拜科網龍頭重振雄風所𧶽，抑或再通脹交易未死得住，簡單買市又贏一鋪。
過去十餘年持有標指基金，慳水慳力長賺長有，聽起來好像是美股「專利」，但唔睇好就唔會買股票，一旦落疊，對回報自然有期望，分別只在高低，這令老畢想起近日一項調查。香港投資基金公會訪問居於大灣區的內地民眾，發現受訪者多達百分之九十五有興趣透過「跨境理財通」投資香港基金產品，平均期望年賺13%。
本報社評話齋，以「七二法則」計算，回報若達標，本金每5.5年便可翻上一番，今時今日，橫看豎看都有點一廂情願。然而，大家若看過法國外貿銀行（Natixis）新鮮滾熱辣的2021年環球散戶調查報告，便知什麼叫沒有最離地，只有更離地！
Natixis在24個國家/地區訪問了8550名散戶，發現他們對今年實質（real）投資回報的平均預期不僅高達13%，且過去八年大體上一年高於一年【圖】。單以2021年而論，美國受訪者期望扣除通脹後能賺17.5%。
有得賺也嫌少
美股宇宙最強，不足為奇，可是香港散戶居然也把目標定在13.6%水平【表】，高於環球平均預期。須知道，大灣區訪問顯示的13%乃名義（nominal）回報，未經通脹調整；Natixis調查的13%已扣除通脹，相比之下，豈非更加獅子開大口？
要麼散戶天性樂觀，要麼環球股市近年波動性減低，每次調整都被視為吸納機會，散戶膽子大起來之餘，漸漸還養成有得賺也嫌少的心態。
新舊經濟輪流領軍，周期與增長板塊時優時劣，惟標指年初以來仍錄得約一成半升幅，本月餘下三個交易日只要冇穿冇爛，今年上半年美股表現將為23年來次佳，指數基金持有人當然樂得笑看風雲。
華爾街天下無敵，美國散戶不單與環球股民一起「堅離地」，回報預期也明顯高於其他國家投資者。這個倒不意外，美國剛公布的5月個人消費支出平減指數（PCE，聯儲局最重視的通脹指標）按年上升3.9%，就以這個數字為準，通脹不必回落，大市只須徘徊於目前水平，標指也可鎖定一成的實質回報，雖不如散戶期望般誇張，惟大幅跑贏通脹，夫復何求？
個個禮拜Game-changer
這一切當然僅立足於假設，無人能肯定通脹是否已見頂，美股下半年會否由龍變蟲更難說準，惟半年結未到，環球股票基金便錄得接近6000億美元資金淨流入，全年破萬億應無懸念，可見散戶並非口頭吹吹想賺幾多便算，確是真金白銀押下去。
美國本周五將公布最新6月份非農新增職位，正如前述，又是一項所謂的Game-changer數據，炒家買定離手，睇吓呢鋪開大定開細。
（編者按：畢老林最新著作《我的投資日記》現已發售）
歡迎訂購：實體書、電子書
沒有留言:
張貼留言