上周五美股造好，港股當晚喺ADR及夜期均走高，港股今早順理成章高開，可惜內地第三季GDP增長差過預期，港股高開低走，50日線得而復失。恒指高開94點，見25425點已經見咗半日高位，50日線收復一下子又再失，最多倒跌189點，見25141點半日低位，中午收市前跌幅收窄。恒指中午報收25253點，跌77點；國指報收8894點，跌71點；恒科指報收6241點，跌77點。
內地第三季GDP按年增長4.9%，略遜於市場預期增長5%，拖累港股高開低走，不過回吐壓力唔算大。而第三季嘅GDP數字，仍未充份反映限電限產對整體經濟帶來嘅影響，估計第四季數字可能更不濟，不過講緊都係三個月後嘅事，暫時都唔理得咁多。
藍籌股個別發展，上星期較為疲弱嘅安踏(02020)同藥明生物(02269)今日反而起勁，半日反而分別升4.5%及2.6%。今日輪到ATMX抖抖氣，騰訊(00700)跟美團(03690)半日分別跌1.5%及1.8%；阿里(09988)半日跌0.5%，但仍守住160元水平。
汽車股今日續有資金追捧，比亞迪(01211)曾升至一個月高位278元，半日升1.3%，報收276.6元；其他汽車股上升，但升幅不及比亞迪，普遍升幅喺1%之下，但已成功扭轉之前弱勢，呢個板塊可以從新關注。
動力煤價持續攀升，今日內地動力煤期貨更升破1800元人仔，煤炭股逆市造好。升幅由3%至8%不等。相反受累煤價上升，火力發電股全線向下，甚至拖累其他電力股，以風力發電為主嘅龍源電力(00916)亦無啦啦跌逾2%，至16元水平，阿Man認為呢個係上車好機會，始終清潔能源受惠政策傾斜，加上龍源電力由20元水平調整至16元，高位下調兩成，現水平再現值博率。
雖然澳門疫情反覆下，未能跟內地通關，但濠賭股今日繼續反彈，市場憧憬澳門疫情可防可控下，跟內地免檢通關指日可待，加上之前受到賭牌續期諮詢一事，整個板塊已大幅調整，現水平嘅濠賭股再大跌風險有限，開始有資金收集。不過阿Man認為濠賭股仍需要較長時間恢復元氣，暫時都係低位橫行，難以向上作出較大突破，都係先列入觀察名單，暫唔急住要上車。
麥狄文
(徐狄怡‧證監會持牌人)
沒有留言:
張貼留言