美股喺美企陸續公布季績之際愈戰愈勇，隔晚道指跟標指齊創新高，而納指再升逾百點，升幅接近1%。數據顯示，目前已公布財報嘅117家標指成分公司中，84%盈利超出預期。市場普遍預計標指成分股第三季度嘅利潤增長率將達35%。而嚟緊將有大型科技企業公布業績，有分析預期標指中嘅科技公司三季度營收增速約19%左右，跑贏該指數成分股平均水平，不過市場預期呢啲企業嘅收入增速，將會喺第四季開始放緩。阿Man預期喺科技企業公布業績後表現理想嘅話，可支持美股更上一層樓。
至於港股亦步入業績期，目前大市喺二萬六水平爭持。恒指高開102點，報26234點，創9月8日以嚟高位，不過開市後掉頭向下，至中午臨收市前一度跌138點，見25993點半日低位。恒指中午收報26028點，跌103點；國指收報9251點，跌71點；恒科指則跌97點，收報6646點。半日成交縮水至615億，靜過太空，成交愈玩愈縮。
美股點計都係熱鬧過港股，Tesla隔晚股價狂升12.7%，股價升逾1000美元，市值突破1萬億美元(7.8萬億美元)，帶動港股呢邊嘅電動車股炒上。龍頭比亞迪(01211)除咗跟住大圍炒上，公司宣布旗下產品加價兩成，今日裂口高開後再創上市後新高324.6元，之後升幅回順，半日升3.6%。理想汽車(02015)再創本港上市新高，半日升6.8%；小鵬(09868)急升11.4%。除咗電動車股造好，成條Tesla產業鏈亦造好，其中力勁科技(00558)半日升16.4%。不過，上述股份唔少都裂口高開，點都要唞唞氣，有貨嘅不妨拎部份出嚟食糊，鎖定利潤幾時都無壞。
至於啤酒股今日亦有資金追捧，因為有券商報告指啤酒業在本季或明年初，會有加價潮，主要係因為成本上升。不過幾隻啤酒股抽高之後，都喺阻力位前停步，要買貨似乎唔使急。煤炭股跌勢未止，內地動力煤期貨持續下跌，已跌第五個交易日。阿Man講過煤炭股難炒，睇嚟都要等煤炭價格調整一下。內房股講咗暫時仍要捱沽，始終房產稅實行呢個消息都較為負面，暫時都要時間消化呢個負面消息，即使內房股調整到呢啲位都幾吸引，但板塊氣氛唔理想，眼看手勿動。
麥狄文
(徐狄怡‧證監會持牌人)
沒有留言:
張貼留言