話咗淡定有錢剩，雖然上周五美股三大指數顯著向下，但港股早已經唔係由美資同外資主導，只要港股有北水繼續撐腰，港股都唔需要跟住美股走。其實近呢兩年，港股跟美股嘅相關系數要減少，港股有時更加走先過美股一步，又或者唔多跟隨美股步伐，舊年美股屢創新高，恒指落後幾十條街，但個別新經濟股則升到飄皮，主要係內地及本地資金嘅功勞。
上周港股累計跌超過1800點，今早亞太區股市跟道指期貨向好，港股亦展開反彈，喺重磅科網股帶動下，半日反彈逾500點。恒指高開174點，升幅曾收窄至98點，見28382點半日低位，其後再發力，至半場休市前愈升愈有，最多升553點，見28837點半日高位。恒指中午報收28822點，成功收復20日線(28730)，半日升538點；國指半日報收11433點，升224點；恒科技半日升337點，報9695點，跑贏大市升3.6%。
話咗大行永遠遲半拍，騰訊(00700)跟美團(03690)舊年早早坐咗火箭 飛咗上天，大行先跟住車尾調高目標價，今年啲大行反應快咗，至少唔會等到個價到咗先嚟做嘢，多間大行先後調高兩者目標價，帶動騰訊跟美團半日升5.1%及7%，仲係半日最大成交額兩大股份。阿里(09988)早段唔精神，內地繼續有整頓業內貸款業務消息，當然會影響到阿里旗下嘅螞蟻集團，不過相關消息市場早已消化，資金見阿里仍然落後，尤其相對其他重磅科網巨頭，自然會入場執平貨，帶動其半日先低後高，反彈1.5%。小米(01810)半日彈近1%，股價仍未重返30元水平，但阿Man有信心，小米唔單亦會變大米，仲會煮成熟飯，呢啲位上車作中線投資，肯定可以食得飽。
話咗銀行股點反彈都好，大環境都係不利其經營，即使 反彈逃生。到家下仲攬住呢啲股份，真係唔好再問可以點做，打靶就兩個字，繼續坐就三個字，自己執生。
美國網民散戶跟大戶喺股市惡鬥未完，有美國連登之稱嘅Reddit投資討論區，已有美國連登仔呼籲轉戰白銀市場，一個二個加入成為白銀戰隊成員，令白銀期貨急升。中國白銀(00815)及金貓銀貓(01815)借勢熱炒，半日急升42.2%及60%；不過阿Man提一提大家，平時呢股份交投淡靜，小心熱炒一兩日無晒影，到時想走都逃生無門。
美國嘅GME挾倉事件尚未解決，要留意呢一類散戶跟大戶對決，會否形成風氣，一旦挾淡倉行動愈演愈烈，所涉股份數目增加，次數變得頻繁及規模愈來愈大的話，對於整體金融市場秩序係會構成重大影響，甚至演變為一場金融災難。希望各位參與之前要三思，而無份參與但又有炒開美股嘅缸邊友，亦要密切注意事情發展，若然沽空機構被大挾淡倉，錄得巨額虧損或會令呢啲金融機構陷於倒閉，影響可能涉及相關嘅券商及提供貸款嘅銀行。
麥狄文
(徐狄怡‧證監會持牌人)
沒有留言:
張貼留言