牛年首個交易日，港股果然牛氣沖天，喺農曆年假期間，外圍股市做好，美股三大指數再創收市新高，港股又點可以執輸?? 今日港股紅盤高開，半日升逾500點，創超過兩年半新高。恒指高開502點報30675，開市升幅曾收窄至323點，見30497半日低位，但買盤再度湧現，推動恒指最多升572點，高見30745，再創2018年6月中高位。其後略為回順，半日仍升逾五百點收市。恒指半日收報30717，升543點；國企指數升201點，報12081；恒科指中午收10760，升349點。
藍籌股只有騰訊(00700)、美團(03690)跟銀娛(00027)半日逆市跌，呢三隻股假期前都急升咗一浸，今日抖氣都唔出奇，加上騰訊假前有高管捲入貪污案被問話，呢個成為沽貨藉口好正常。不過睇返圖表，騰訊一日唔跌穿680元，上升形態未被破壞，有貨坐定定，冇貨嘅話唔定係上車好機會，尤其接近10日線738元，值得一試。今日恒指有一百點升幅來自大笨象(00005)，下周二派成績表，好大機會宣布重新派息，市場又有好息之徒追入，不過阿Man買股目的為資本增值，唔稀罕利息收入，加上45-50元呢一段阻力大，有貨可以守，冇貨唔建議追。
美滙指數走弱，加上市場憧憬喺疫苗全球普及使用下，有望盡快全球通關，經濟重啟復甦，推動資源價格上升。貴賤金屬價格上揚，油價亦向上，「三桶油」及一眾資源股上升。不過呢個板塊一向唔係阿Man杯茶，暫時亦未能吸引阿Man入場。
疫情喺過年期間未有失控，確診數字更回落至單位數，有消息指初七起放寬部份社交限制措施，本地地產及收租股上升，升幅由1.6%至太古A(00019)半日升12.3%最多。不過對於收租股，同實體經濟關係密切，即使初七後放寬社交限制，晚市堂食恢復，但已有唔少零售及餐飲業捱唔住，早於過年前結業。預期實體經濟要回復至疫情前嘅情況，至少仲有一年半載要捱，呢段時間收租股收入難以回升，尤其係商用寫字樓物業，喺疫情爆發一來以嚟，唔少跨國企業已大幅增加WFH比例，唔少職位更轉為永久田WFH，減低寫字樓租用樓面以減低租金支出，收租佬好難再回復過往風光，資訊發達拉近人嘅距離，同時亦令人與人之間減少正面接觸。
平安好醫生(01833)獲美國科技女股神Catherine Wood，旗下主打金融科技嘅交易所買賣基金(ETF)ARKF開始建倉，今日股價再升逾一成，今日更有大行報告將其目標價調高至211元，報告更指最樂觀情況可見295元，而最悲觀情況則為80元。以此報告作參考，最好與最壞情況攞個中間位，剛好係187.5元，追唔追貨自己決定，若然跟搭連登契媽順風車，無論乜嘢價追貨都好，自己搵個可承受嘅位做止蝕，通常最盡係輸一成要投降。
麥狄文
(徐狄怡‧證監會持牌人)
沒有留言:
張貼留言