【盤房來料】內地資金對港股後市睇法仍樂觀 趁印花稅加價前，要靈活走位多幾轉

 https://www2.hkej.com/instantnews/market/article/2720146/%E3%80%90%E7%9B%A4%E6%88%BF%E4%BE%86%E6%96%99%E3%80%91%E5%85%A7%E5%9C%B0%E8%B3%87%E9%87%91%E5%B0%8D%E6%B8%AF%E8%82%A1%E5%BE%8C%E5%B8%82%E7%9D%87%E6%B3%95%E4%BB%8D%E6%A8%82%E8%A7%80

隔晚美股喺通脹憂慮漸除下低開高收，道指更創收市新高，總算畀港股一個反彈藉口。恒指高開455點，順利收復20日線(29751點)後，升幅一度收窄至114點，其後再回勇，最多升688點，見30407點半日高位，但10日線(30431點)有阻力，未能成功收復10日線失地。中午恒指報收30356點，升638點；國指半日升302點，中午報收11812點；恒科指半日升253點，報收9614點。

噚日激到阿Man連市都唔想再睇嘅財政預算案，果然係劣評如潮，唔再講增加股票交易印花稅對港股有幾深遠影響，單係派錢呢吓已經令市民怨聲載道，5000元電子券仲要分五期發放，麻煩又幫唔到等錢使嘅基層，難怪阿Man老友話人哋澳門派錢現兜兜，我哋香港派錢戇XX，來生唔做香港人。

增加交易印花稅對港股實際影響有幾大，暫時仲係未知數，但大行分析普遍認為喺加稅後，港股成交增幅無預期咁多，港交所(00388)唔多夠力水反彈，亦已反映咗市場睇法。至於今日港股反彈，隨咗由外圍股市做好帶動，另一個原因係噚日午後急跌超賣都幾嚴重，鐘擺效應下，反彈亦好正常。預期短線港股表現將較反覆，缸邊友好趁印花稅喺8月1日實施加價前，要靈活走位多幾轉，好難再可以好似之前咁坐定定。

由於北水主導港股，阿Man問咗唔少內地基金經理同炒家對加印花稅睇法，佢哋不約而同話短線當然係負面，尤其影響心理因素同市場氣氛，但係港股仍然係北水重點配置嘅市場，等呢個負面消息逐步消化，市場信心回復，港股後市仍然向好嘅。至於呢期舊經濟股威威，新經濟股疲弱，主要係內地資金暫時短炒緊估值偏低嘅傳統股，但佢哋仍然相信成長股，即係我哋所指嘅新經濟股，先係主菜，先係可以延續牛市行情嘅核心股份。而增加印花稅對港股帶嚟嘅短線衝擊，令估值略高嘅新經濟股進一步調整，正好提供機會畀內地資金從容入場。阿Man聽完佢哋嘅意見同睇法，暫時放下咗心頭大石，只要中長線港股仍然向好，短線震盪就係趁低吸納嘅機會。

而今無啦啦急升嘅內房股，正正係內地投資者喺資金輪動下，認為目前估值偏低嘅股份，不過唔少內房股今日閒閒地升一成以上，阿Man當然唔建議高追，反而有貨喺手，尤其係陳年蟹貨嘅缸邊友，好趁呢一浪反彈，考慮下要唔要把握逃生機會，始終阿爺唔贊成炒樓炒房，呢個板塊並非政策受惠股，而喺三條紅線之下，內房股受到制肘，呢一刻反彈不過係短炒資金所推動。

狄文

(徐狄怡‧證監會持牌人)