敢衝也要識走人
農曆新年長假過去，北水亦重投港股市場，昨天仍然保持淨買入142億元，雖未及長假前咁多，但都不是小數目，不過整體市況就好像反映唔到百幾億北水的支持，原因係不少熱炒的股份都顯著回落，再細看北水十大成交，主力買入騰訊(0700)、中海油(0883)及中移動(0941)，但保利協鑫(3800)、恒騰網絡(0136)及心動(2400)都錄得淨流出。
以上三隻淨流出的股，都在北水休假期間狂炒兼創新高，北水返來就立即起筷食糊，人之常情也，如果仲一廂情願諗，北水假期後還會高位幫你接貨，事實證明係有點天真了。昨天的回吐，令雄心壯志的散戶們迎來一盤冷水，見過股災的已經嚷著要清倉離場，未見過的新手就應該未識驚嘅，跌完始終都會上返嘛，至於後市往那邊走，青冰沒有水晶球，凡事只會摸著石頭過河，睇數做人，如果倉位跌至某些警戒線，必然會減倉，若情況未有好轉就會進一步減持，直至一個令自己舒服的水平。
過去的一個半月，市況由火熱變狂熱，贏錢的人應佔絕大多數，但當贏錢成為一個習慣，慢慢就會嫌贏得少，多與少其實都係比較，可能跟上星期比較，又或者跟隔離戰友比較，逐漸地對升市麻目，認為任何調整都會升返上去。最近跟戰友傾開，青冰指出現時要贏錢的技術含量不需太高，最重要都是勇快狠，勇者，見到大升都敢追，快者，當你聽到消息時要鬥快落盤去搶，狠者，就係大大力的去掃。雖然聽落好易，但去到執行時，冇咁勇冇咁快冇咁狠，結果隨時就相距千里。
若自己身手一般，止蝕時未必能雷厲地斬頭，那現在就要開始適當地減倉，尤其是一些純粹跟風買入，自問認識唔深的股，切忌短炒變長揸，須知道爆煲時係唔會有一個push提醒你，喂現在要爆了，往往都係愈跌愈深時才醒覺，那個時候你仲有冇逃生的膽量，就要考自己的功夫了，大牛市有邊個唔識贏吖，水退時有褲著，才是真正的贏家呀。
--
沒有留言:
張貼留言