美股隔晚個別發展，大型零售企業季績優於預期，道指升逾200點，連升五個交易日。至於悶極嘅港股，連續兩日走軟，共跌345點後，今早略為回升，可惜兩萬點關得而復失。恒指高開165點，跟着隨A股回軟倒跌29點，見19800，其後有買盤支持，大市止跌回升，一度升179點，見20009半日高位，可惜二萬大關得而復失，未能企穩。恒指半日升167點，報19997；國指升55點，報6783；恒科指升40點，報4261。港股半日成交額446.5億元，繼續悶局。
藍籌股個別發展，大笨象(00005)半日升0.7%，中移動(00941)半日升0.8%；創科實業(00669)旗下客戶Home Depot業績優於預期，創科半日升近6%，藍籌之中表現最好。至於噚日有外媒報道騰訊(00700)計劃出售美團(03690)股份，美團噚日股價急挫一成，其後騰訊內部人士指有關減持傳聞不實，美團半日反彈4.6%，為恒指貢獻61點升幅，不過都無法完全收復噚日失地。騰訊今日公布季績，股價偏軟，半日跌0.1%。另外兩隻重磅股，港交所(00388)跟友邦(01299)亦分別跌0.4%及0.1%。
港股無乜方向，市場就跟住消息炒作，之前有傳股神要減持比亞迪(01211)股份，比亞迪股份就由320元水平急挫，噚日就輪到美團，仲有騰訊被南非股東減持；阿里(09988)主要股東軟銀，亦透過出售遠期合約減持阿里。無論點都好，暫時反映呢啲已經由高位調整至合理水平嘅重磅股，大股東亦因為種種原因，喺現水平都仲想減持，試問咁嘅情況下，港股點會有運行。
電力股今日保持升勢，又係趁個別消息炒住先，板塊內股份大多維持上升，只有華電(01071)半日回吐近1%。近日內地股市有轉好趨勢，內地券商股造好，不過券商股難炒都唔係今日先知，今日追貨唔知聽日事，呢啲情況都係靠邊站，食花生算數。
整體港股繼續喺二萬水平窄幅上落，乜嘢水盡鵝飛、乏善可陳，呢類說話再講都多餘，港股廢到一個點，被股民遺棄都好正常。
麥狄文
(徐狄怡‧證監會持牌人)
沒有留言:
張貼留言