7月9日，周四。政府全民派錢一萬元，本意是趁疫情放緩振興消費，但人算不如天算，第三波話爆就爆，本地感染個案周圍都有，防疫措施鬆完又要再收緊，食物及衞生局局長陳肇始便奉勸市民減少外出聚餐，盡量買外賣醫肚。
美國新增確診個案上升速度驚人，道指試過一日跌近2000點（以百分率計其實芝麻綠豆）叫做畀吓面，但之後不論疫情如何惡化，美股彷彿乜都睇唔到，淡友你一句「泡沫之母」、我一句「火藥桶」，比內地官媒什麼「慢牛」、「健康牛」硬淨百倍，道指固然唱唔落，科技股主導的納指更加當佢哋發噏風。
煲幾時爆冇人知
老畢並非否定淡友的論據，好像沽空機構渾水（Muddy Waters）肥仔創辦人Carson Block接受內地官媒訪問時所言，資本市場已失去定價功能，股市與經濟脫節只因投資者仍然相信聯儲局。我只想講，這句話現在講正確，十年前講亦啱，但煲幾時爆冇人知，乾坐着呆等「世界末日」並無意義。同十年相比，唯一可以肯定的是，安全資產無息甚至「罰息」更加普遍，睇【圖】便一清二楚。今時今日，孳息率為負數的發達國政府債券比率接近四成，零至一厘約佔五成，而高於一厘的僅一成。換句話說，90%發達國家的債息處於一厘或以下水平！
對投資者來說，道理人人識講，今天比十年前是否更危險我不知，老畢看到的是，在今天的利率環境下，投資者尋求回報較十年前更難，要有息又要安全，根本不可能。
內地官媒「用心良苦」，勸喻股民放棄一朝暴富的心態，切勿重蹈五年前「大時代」覆轍，可是不少內地科技股IPO首日掛牌即瘋漲數倍，勸人腳踏實地安分守己，跟吳楚帆說人人為我、我為人人一樣唔化。「健康牛」一詞本來就尷尷尬尬，當孖展炒股遇上新經濟狂潮，除非人類轉性，否則一夜發達心態豈是想放棄便能放棄？
今時唔同往日
若說今天跟以往有什麼不同，老畢認為，當年唔「賭」，手上資金仍有出路，今天想唔「賭」都唔得。愈來愈多人拿二十年前科網泡沫跟現在比較，惟大家可曾想過，即使以當時美股史上最高估值為準，美國十年期國債孳息率仍有五六厘，唔同人癲大不了穩穩陣陣買債收息，今天是同一回事嗎？
大家原先也許丈八金剛摸不着頭腦，何以美國新冠疫情不斷惡化，股市尤其科網板塊竟能「百毒不侵」？如今眼見本港上市新經濟龍頭集體破頂，便不難明白在美股早已發生的事，隨着本地疫潮再起而於港股上演，就連恒指服務公司亦不得不與時並進，籌備推出港版FANG或類似NASDAQ的科技股主題指數。
淡友可以滔滔不絕告訴你股市為何「不應」上升，但沒有一個夠膽實牙實齒叫Short。渾水以沽空得享大名，看家本領雖是踢爆公司賬目出手造淡，但以其本色，創辦人肥卡既然講到美股隨時「爆煲」，何不建議投資者沽空，反而浪費時間大談資本市場失去應有功能，而論及華爾街後向時，又鬼鬼祟祟咁話股市跟實體經濟「唔係唔可以」脫節？由此可見， 不論名氣多大，根本冇人敢瞓身同個勢對着幹。
Slowflation長期化
如果你問老畢，新舊經濟分開來跑意味什麼，我會說科技股等所謂長期增長（secular growth）類別與代表舊經濟的能源、銀行、物料一類周期股（cyclical stocks）差距愈來愈大，反映的正正就是市場並不相信經濟V形反彈，與利率長期低企實為一體兩面，投資者樂於押注slowflation趨勢經歷疫患後長期化。
沒有留言:
張貼留言