【盤房來料】比亞迪現價未反映增長潛力

 https://www2.hkej.com/instantnews/market/article/2897278/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%AF%94%E4%BA%9E%E8%BF%AA%E7%8F%BE%E5%83%B9%E6%9C%AA%E5%8F%8D%E6%98%A0%E5%A2%9E%E9%95%B7%E6%BD%9B%E5%8A%9B

鮑爺上周五喺Jackson Hole放鴿，表示就算今年稍後時間開始縮表，減少買債唔等於要加息，而且美國就業市場雖復甦，但難充分就業仲有段距離，佢亦表示通脹只屬短暫現象，美股投資氣氛仍然向好，標指跟納指再創收市新高，道指亦升逾200點。至於港股就繼續落後，今日期指結算日表現反覆。

恒指低開1點，早段曾升過百點，但缸邊友無乜買貨意欲，大市又反覆回落，恒指倒跌188點，見25219點半日低位，25200點有支持，恒指又掉頭向上，升144點見半日高位25552點。中午恒指報收25495點，升88點；國指升12點，報收8970點；恒科技報收6370點，升48點。

藍籌股個別發展，新能源股落鑊，信義光能(00968)升8.1%，係最大升幅藍籌股，板塊內其他股份升幅普遍超過半成，反而創新高嘅東岳(00189)半日升3.3%算升得少。阿Man愛股之一嘅藥明生物(02269)半日升3.4%，另一阿Man喜愛嘅藍籌安踏(02020)半日升逾2%。但金融股今日就回軟，大笨象(00005)、友邦(01299)同內銀內險股都升唔起，限制咗大市升幅。

內地監管停不了，今次輪到對券商出招，官媒《證券時報》旗下的《券中社》報道，監管部門促券商強化兩融套現監管，個別券商股半日跌逾5%，其他券商股普遍下跌。廣發証券(01776)跟東方證券(03958)今日A股更曾經跌停。

比亞迪(01211)公布中期純利按年倒退近三成，毛利率亦跌近7%，不過毛利率下降主要是產品結構變化所致，而盈利倒退主要係年口罩銷售錄得盈利。其實扣除比亞迪電子(00285)條數，本身比亞迪嘅核心業務表現唔錯，仍有強勁增長潛力，而且包括電動車銷售增長、刀片電池獲其他品牌採用，多項因素推動，核心盈利仍有強勁增長潛力。受惠新車推出及電池廠產能樽頸紓緩，估計旗下新能源車銷量於今年下半年可翻倍，現價仍未反映其增長潛力及估值，唔少大行將其目價價調高，大部份都睇300元過外，有貨可以放心持有，股價唔跌穿240元，上升趨勢持續。