港股上周五失守25000關，並創下自去年11 月以嚟新低，幸而上周五美股表現唔錯，似乎市場都預咗聯儲局隨時收水，亦會喺Jackson Hole釋出收水訊號，三大指數上升，帶動港股ADR重返25000大關。今日港股回升，上星期恒指累跌1541點後，今早一度反彈逾600點。
恒指高開319點，開升幅曾收窄至211點，見25061點半日低位，25000關守得住，其後再發力，一度升608點，見25458點半日高。恒指中午收報25299點，升449點；國企指數報8890點，升147點；恒科指彈3.1%或183點，報6078點。半日成交額939.69億元唔算特別多，都預咗上月底資金大逃亡後，唔會咁快重返港股市場，暫時都係買賣兩閒。
藍籌方面，本港10月推A股指數期貨，到時期貨炒鬼又多咗款產品玩，港交所(00388)生意應該有增無減，股價半日升5.8%，重返490元水平，留意490至500元阻力較大，上周五有膽撈貨博反彈，都要睇位食糊。至於公布業績後開始回購嘅騰訊(00700)半日彈2.9%，450元由之前支持變阻力，博反彈唔好太貪心。小米(01810)跟美團(03690)分別彈4.9%及2.6%，ATMX四大科網股之中，只有阿里(09988)繼續底創上市新低，半日再跌2%，望就望150元呢啲位有支持。
電力股今日爆炒，仲要係傳統電力股威威，整個板塊嘅股份，閒閒地升一成或以上。不過阿Man一向唔主張高追，尤其今日呢個板塊升得咁急，買盤略為收一收掣，隨時回返5%以上。無貨都係食下花生，做觀眾算數。生物科技股亦有反彈，上周五阿Man講到明要撈藥明生物(02269)，股價插到100元近50周線，大特價博反彈夠晒值博率，果然半日彈逾7%，雖然相對其他生物科技股唔算升得特別多，板塊內唔少股份閒閒地彈8%至15%，但藍籌兼龍頭，撈咗貨過周末都瞓得安安樂樂。
上周五恒指服務公司喺收市後公布季檢結果，恒指成分股納入信義玻璃(00868)、李寧(02331)及招商銀行(03968)，半日分別升7.2%、3.9%和3.4%。信義系兩股份入恒指，仲要係連續兩次季檢先後加入，睇嚟恒指服務公司好鬼鍾意信義呢間公司。至於李寜(02331)大熱倒灶咗幾次，今次終於入圍，跟安踏(02020)平起平坐，同為藍籌股。至於招銀入交銀(3328)無乜驚喜，藍籌股總數增至60隻。比較特別係恒科指納入攜程(09961)，剔除新東方綫(01797)，反映阿爺政策影響力，仲勁過疫情威力。
麥狄文
(徐狄怡‧證監會持牌人)
沒有留言:
張貼留言