全球大派銀紙 港美股市現低吸良機

https://invest.hket.com/article/2610662?lcc=ai

重點

1.黃國英預期，疫情持續及環球放水，將加速在家經濟的大趨勢，相關企業具重估價值。

2.續看好騰訊（00700）、阿里巴巴（09988），近期增持香港電訊（06823）等股票。

3.看淡油股、銀行股、衣服股，以及寧買個股及黃金，不買ETF。

---------------------------------

新冠肺炎在歐美大爆發，美國聯儲局無限量寬（QE）救市。本刊「封面故事」請來豐盛金融資產管理董事黃國英，他直言：「今次全球唔係大印銀紙，而是大派銀紙」，港美股市同現低吸良機，在家經濟（Home Economy）浪潮勢將顛覆傳統。

「疫情爆發、股市急跌之後，市場已經換了一批人，高槓桿嗰批已經出局，鍾意短炒嗰批仍然喺度，而且好集中炒指數，相信未來一段時間指數仍會大幅波動，可以好恐怖。大市較大波動下，如果投資者要打反擊，一點也不容易，我寧願揀股票去打，相信個股表現會穩定一點。」

實戰經驗豐富的基金經理黃國英，上周接受本刊專訪時侃侃而談最新部署。他坦言，環球股市特別是自美股急瀉後，他3月份亦有失手，故今季將更專心作戰，並率先跟本刊讀者分析後市形勢、美無限QE及疫情下的反擊主題。

抗疫之選：政策股+科技股

黃國英表示：「經此一役後，得嘅主題已經跑出來，而家股市已經有herd immunity（群體免疫）主題，好似是無乜實物的輕資產公司，例如物管股已集體上升。至於傳統經濟如海螺水泥（00914）、內房股好似係龍湖（00960）亦守得好穩，環球央行放水穩經濟，相信可以受惠政策。」

「另一方面，Home Economy會取代Social Economy的年代，我們長期看好的股票，如騰訊（00700）、阿里巴巴（09988）已成Home Economy必需品，也是中國雲計算市場的必選股；至於在香港經營電話、網絡及數據中心者，如香港電訊（06823）、香港寬頻（01310）及新意網（01686）亦一樣，特別經過滙豐（00005）取消派息一事之後，真偽高息股更要分清楚，真高息股經重估後，日後估值可能更貴。」（個股分析，詳見相關文章）

新冠肺炎蔓延全球，對環球經濟造成打擊，多國中央銀行聯手救市。美國聯儲局主席鮑威爾（Jerome Powell）強調，聯儲局未用盡彈藥，當局將續動用所有工具，以應對疫情帶來的經濟放緩。由於當局新一輪量寬（QE）的買債規模，由原本合共買債7,000億美元，改為不設上限，等同無限QE，市場料最終規模將超越過去10年的近4萬億美元。

股市不反映經濟

黃國英表示：「無限QE之後，你會發現好多嘢都好貴，因為製造了另一個問題，貧富懸殊會愈來愈勁。好多美國公司都發債，最新有Disney（美：DIS）等，因為QE買埋企業債（corporate bond），最終真係借到平錢的，其實都係嗰班人。這對於股市來講都幾好，因為股市並不反映經濟，而係反映首100間公司的形勢。」

他續道：「好股繼續好，衰股繼續衰。衰股有甚麼？我覺得石油、化粧品、衣物服裝公司，可能有排都唔返來，因為大家在家抗疫時間愈長，愈會養成新的習慣，簡約主義下，其實對好多行業都不利，相關公司市值亦會愈來愈小。相反，科技股、新經濟嗰批，好似蘋果（美：AAPL）、facebook（美：FB）、亞馬遜（美：AMZN）、微軟（美：MSFT），我相信無限QE之後都會繼續之前的情況，而且好公司更可以借到長期的平錢，待疫情過後，就會強者愈強。」

黃國英認為：「如果你無買過股票，或者買得唔夠貨，其實呢個時刻都不錯，可能要趁而家入市，因為個市錢多咗，今次唔係大印銀紙，而是大派銀紙，派出來的錢會去返中下階層，佢哋一收到錢，轉手就掉出街嘅機會都好高，其實即係代出糧。」

「你想想，當成條街突然多了幾萬億，而股市好多都係幾10萬億嘅嘢，成條數就會好誇張，但聰明嘅人收到錢之後，會揀好嘢買，而唔係買殘嘢，殘股反彈暫時已經結束，無人會再買油股、銀行股，這些過氣股大家係夠膽一股都無，所以最終只有少數公司跑出，我相信會是Home Economy的一批公司，這批公司本身已是一個趨勢，只是疫情加速了他們的發展步伐。」

三個原因 買貨好時機

「所以我覺得，而家其實係一個幾好嘅時間。首先，因為跌落嚟嗰下已清走咗最弱的一批槓桿玩家；第二，因為仍然有好多人覺得個市好危險，唔會好進取咁買股票，市場會健康咗；第三，而家全世界等緊買股票的人，手上的錢可能是以萬億美元計，當他們有信念開始重新入市時，可以想像到，當中有部分股票係會比以前更勁，因為錢多咗係事實。」

「你話cash is king（現金為王）啫，但最近有幾萬億king都係印出來，都係派出來，而家全人類都有，也會引起不少經濟問題，有可能會形成局部通脹，如食物；也有局部通縮，如衣物等。」

黃國英不時作情境思考，他提出：「大派銀紙之後，大家要去諗一諗，如果呢刻你手上無貨，假設明日大市就上返25000點，你會唔會追呢？如果唔追，咁升到26000、27000點時，你更加唔會追。又好似騰訊，假設佢升上380元，你都唔想買，咁之後升到400元你就更加唔會買。」

相比港股，他認為美股今季機會更多。「港股唔夠低，譬如我們好鍾意騰訊、阿里巴巴，睇好谷基建，我鍾意海螺水泥，但將佢哋同美股同業比，估值上都未係好平，騰訊仲係高於facebook，香港的情況係好股守得好穩，作為風眼的美股就洗得勁啲。」

雲計算超級牛市將至

「未來疫情有兩個情況可能發生，一係突然發現某些治療有效，一係社會隔離措施有效，咁確診數字就會下降，想入市嗰批人就開始嚟，美股跌得多機會自然亦大一點。Home Economy的出現，是因為一大批人被迫留在家中，夾住你留屋企娛樂，不去戲院，其他綫上消費亦然，並衍生出可能係雲計算的超級牛市，如此情況下，微軟、亞馬遜都係好吸引。」至於香港數據中心、5G之選，黃國英認為香港電訊、新意網均具重估價值。

作者、責任編輯：鄭耀宗、陳紫瑩、楊玉燕