"貓奴" 的生活札記: 做好碳達峰、碳中和工作」係2021年重點任務 ( 比亞迪)

2020年12月21日星期一

【Turbo話開就開】比亞迪(1211)悶咗差唔多成個月，今日(12月21日)終於突破悶局，大陽燭抽升逾12%高見$207.6，創近一個月新高！

比亞迪A股(002594.SZ)更升停板，報193.6元人民幣，成交逾120億人民幣，喺滬深兩市最大成交嘅股份！

究竟咩事令比亞迪股價咁亢奮呢？當然又關國策扶持事啦！

上周五(18日)閉幕嘅中央經濟工作會議，除咗例牌嘅「擴大內需」之外，喺減排方面都有所著墨，會議提到「做好碳達峰、碳中和工作」係2021年重點任務。

內需+減排，咪等於新能源汽車受惠囉！(係呀，又係咁，升咗先嚟講！)

「碳達峰」係指中國承諾2030年前碳排放量唔再增長，即係2030年前碳排放量會見頂，再慢慢回落。

至於「碳中和」，就係話，透過節能減排、植樹等，抵消碳排放量，實現二氧化碳「零排放」。

簡單啲嚟講，內地未來一年會以減排做首要目標，自自然然新能源行業會受惠，解釋到光伏股、風電股點解炒到㷫烚烚！比亞迪做電動車當然都受惠啦！

連生產電動車電池嘅贛鋒鋰業(1772)同樣熱炒，越升越有，再創歷史新高，高見$87.85，暫時最多升逾6%！

揸住比亞迪同贛鋒嘅朋友，不如睇埋Tesla今晚正式晉身標指成份股，先再作部署啦，可能仲有得升！