美國10年期債息急跌，避險情緒升溫，增長型股份有明顯回調，美股個別發展。雖然通脹仍然持續高企，但預計美國聯儲局短期內唔會縮表，股市氣氛未至太差。A股今早偏軟，不過港股喺小米(01810)跟港交所(00388)帶領下，恒指重上二萬八關，不過周末前夕，星期五成交唔算多，只有758.7億元。恒指低開23點，開市無耐曾跌117點，見27878點半日低位，其後喺10日線(27807)見支持，大市回勇重上二萬八，一度升151點，見28147點半日高位。恒指中午報收28121點，升124點；國指升19點，報收28121點；恒科指跌17點，報收7644點。
中國網信辦早前公布，掌握超過100萬用戶個人信息的營運者赴國外上市，必須向網絡安全審查辦公室申報網絡安全審查。然而，外媒引述消息報道，中國計劃免除喺香港上市嘅內地企業需尋求中國網信辦批准。報道指出，近日相關監管部門官員跟銀行家嘅會議上，曾討論赴港上市的內地企業可否獲得豁免權，無需進行審查程序，只有前往美國上市嘅公司先要正式接受審查。受消息刺激，港交所一度抽升4.7%，高見529元，中午收報524.5元，升3.8%。
除咗港交所，推升大市嘅仲有小米，中午收報28.25元，升4.8%，藍籌之中今日表現排第一。公司次季手機銷量急升83%，全球市佔率升上第二位，超越蘋果。董事長雷軍表示，今年研發投入超過130億元人民幣，將招募超過5000名工程師。小米跟港交所合力為恒指貢獻99點。其他藍籌股個別發展，比亞迪(01211)反彈2%，不過唔知李褖仲會唔會減持，暫時都係咪手多。暫時要揀汽車股，阿Man首選係長城汽車(02333)，睇走勢同成交長汽要升穿頂無乜難度。
至於騰訊(00700)、美團(03690)跟阿里(09988)表現平平，話咗平台股短期都係無乜運行，區間內上落，經過反彈，依家呢啲位唔係入貨，係有貨要諗諗減唔減持。而越南疫情嚴峻，申洲國際(02313)半日跌3.8%，成為表現最差藍籌。
鋼鐵股跟煤炭股有資金追捧，鋼鐵股升幅由1.5%至5%不等。而國家發改委公布，國家正推進煤炭儲備能力建設，總目標係喺全國形成相當於年煤炭消費量15%、約6億噸嘅煤炭儲備能力。呢個消息帶動板塊內煤炭股升1%至6.5%不等。
不過阿Man都係睇好消費股多啲，之前推介嘅體品龍頭李寧(02331)同安踏(02020)繼續攻頂，除咗體品股，阿Man留意返隻農夫山泉(09633)，公司銷售增長優於預期， 雖然原材料成本面對挑戰，但集團嘅毛利率仍有防守性，主要係受惠於策略性採購新措施，及更好嘅產品類別組合。45元水平附近買，博佢企返穩45元，再向上挑戰50元，跌穿42元止蝕。
麥狄文
(徐狄怡‧證監會持牌人)
沒有留言:
張貼留言