https://www2.hkej.com/instantnews/market/article/2627429/%E3%80%90%E7%9B%A4%E6%88%BF%E4%BE%86%E6%96%99%E3%80%91%E6%80%A5%E5%8D%87%E5%A5%97%E5%88%A9%E9%A0%90%E7%95%99%E8%B3%87%E9%87%91%E9%9C%87%E7%9B%AA%E6%99%82%E6%92%88%E8%B2%A8

【盤房來料】急升套利預留資金震盪時撈貨

美國總統大選點票仍在進行中，不過拜登入主白宮幾乎無懸念，聽聞連個別博彩公司都已派彩，即使侵侵之後提出訴訟，都係之後嘅事。市場則憧憬拜登上場，一直崩緊嘅中美關係得以緩和，隔晚美股已顯著上升，今日港股拍住上，恒指更重上250日線(25408點)之上，恒科指更首次升越8000大關。

恒指裂口高開614點，開市已重上250日線，早段升幅曾收窄至457點，低見25343點半日低位，但買盤資金再度流入，推動恒指最多升721點，創8月31日後高位，臨近午市回順。半日恒指升676點，收25562；國企指數收報10405，升306點；恒科指收報8133，升375點，半日大市成交963.3億元，總算配合升勢。

藍籌股全線向上，只有工行(01398)半日無進帳，已經要跑第尾，友邦(01299)升1.9%；滙控(00005)漲1.1%；中移動(00941)升3.1%；建行(00939)漲2%；平保(02318)升2.1%；長和(00001)計劃出售歐洲電訊塔套100億歐羅，半日急升8.8%，真係無乜幾可。

隔晚科技股勁升，當侵侵領先之際，市場擔心社交媒體股份或遭其清算，皆因競選期間，不僅傳統媒體，社交媒體均出現偏頗情況，尤其刻意阻止不利拜登選情消息發布，有利侵侵選情嘅消息則遭到限制。但當拜登反超前兼入宮有望，美國重磅科技股勁升，中概科技股升勢更為凌厲，今日相關股份當然做好。騰訊(00700)跟美團(03690)齊創上市新高，螞蟻上市計劃被刹停後，資金從阿里流入JTMX，京東(09618)接受阿里資金情況更為顯著，除咗因為同屬電商股受惠雙十一購物節外，集團旗下京東健康快將通過上市詅訊，最快可於下月上市，雙重利好消息下，半日升7.6%，亦創上市後新高。金山軟件(03888)於美國上市金山雲隔晚勁升12%，金山軟件今日亦升逾8%，其他科技股大大小小都做好。

汽車股繼續熱炒，市場相信拜登入主白宮後，有利內地製車輛進口美國，加上新能源汽車概念續受資金追捧，比亞迪(01211)創189.2元新高，半日升一成，旗下比亞迪電子(00285)亦升9%。其他汽車股普遍上揚，吉利汽車(00175)再升6.7%，企穩20元水平後，即管睇下能否衝破蟹貨陣，向25元目標進發。

拜登支持綠色能源，加上「十四五」規劃，光伏風電等綠色能源股份又落鑊，之前阿Man推介嘅福萊特(06865)上過25元短線目標價後急回，今日勁彈一成，重上廿皮樓上，調整結束與否，要睇其股價能否收復10日(21.85)及20日線(22.85)。

今日港股唔單止指數向上，個別重磅個股升幅更超越5%，今日咁嘅走勢，醒目資金理應沽出部份持倉套現獲利，皆因未知侵侵敗選會採取乜嘢行動，唔排除大市急升過後隨時見震盪，呢個時候唔應該追貨，反而係減倉套現好機會，預留資金待震盪時撈貨。

麥狄文