牛市股神體驗難得 禍福一念間

 信報 英眼狙擊

牛市股神體驗難得 禍福一念間

年輕時也曾經是牛市股神，當時本少，用年幾時間炒出逾10倍回報，結果一夜之間利潤悉數化為烏有，繼續苦戰一年戶口結果歸零，沮喪豹隱一段日子才能夠重新上路。

可能天性好賭，慘敗之後得出的結論，竟然是股市原來真的存在致富機遇，本身亦有能力去把握，可惜學藝未精，不懂得尊重市場控制風險，才導致最後一敗塗地，只要肯改善，一定有所作為。再戰江湖轉眼已經超過20年，收穫遠超當年所能想像，期間經歷過幾次熊市，過程雖然驚心動魄，但沒有再犯上當初的錯誤。

投資其實好難教，甚至是無得教，升市唔使聽，跌市唔想聽，控制注碼分散投資分段入市等老生常談，不及畀個冧巴醒神和實際。

未被市場教訓之前，個個自以為是索羅斯二世，筆者只不過一個豆泥香港基金經理兼廢老，根本沒有任何參考價值。

不可一世是人之常情，想當日筆者投資之路亦是靠自己盲衝直撞摸索出來，所以即使是朋友甚至同事，也不會老氣橫秋硬要訓練灌輸什麼概念，有心問就切磋切磋，無心的話便無謂尷尬。

最近新經濟股大跌市，應該有不少新手慘敗而回。無意指指點點，純粹想鼓勵大家不要絕望及放棄，曾經大勝，將來就必然有機會再來一次，唯一欠缺是如何保持住勝果的絕招，痛定思痛之後可以再次上陣，當然如果你是陳奕迅，就無謂花心思在市場之上。一定要堅持，否則別人個個用投資畀首期，你還是想用工資去應付的話，恐怕只會長期心理不平衡，一味大叫泡沫，甚至望住大埔比華利山就以為樓市已經爆咗。

失手之後，另一個正常反應是自以為曾經滄海，然後無了期口水Put，為騰訊（00700）回落打氣喝采，以為我無你亦唔應該要有。看淡無問題，至少要學識捕捉睇淡的時機，以及肯落場造淡。當騰訊由300蚊開始睇淡，終於會有一鋪回落超過一成，咁就當做精神勝利，怪不之一世無運行。曾經牛市股神是難得的體驗，至於之後是禍是福，真的完全視乎一念之間。

基金持有騰訊

豐盛金融資產管理董事

#英sir #英眼狙擊 #黃國英