美股上周五喺憧憬疫情受控下，經濟活動全面回復正常，加上市場開始接受較高水平嘅10年期美債息率，甚至有心理準備，今年內10年期債息率或高見2厘，美股上周五晚三大指數齊齊升逾1%，道指跟標指更再創新高。雖然納指亦升逾1%，但有對沖基金孖展爆煲被強制平倉，唔少中概股慘被拖累，盤中跌幅顯著，即使唔少中概股尾市低位回升，跌幅大大收窄，但市場仍擔心類似基金孖展爆煲事件陸續有嚟，對相關股份起咗戒心。
今早恒指受中概股陰霾所拖累，早段恒指低開19點後，一度跌204點，見28132點半日低位，其後內地A股帶動港股回升，恒指最多升148點，見半日高位28484點。恒指中午收市報28431點，升94點；國指報收10988點，升22點；恒科指半日報收8051點，跌78點。
A股半日反覆做好，中國財政部公布，今年首兩個月國有企業利潤總額5489.4億元(人民幣．下同)，按年增長1.5倍，扣除低基數因素後，增長率為10.2%。港股呢邊受惠嘅係內銀、內房同物管股呢啲板塊，其他中科企未見受惠，半日表現偏軟。當中以內房及物管股表現較佳，閒閒地升幅都超過4%，當中藍籌新貴龍湖(00960)半日升6.1%，係今日表現最好藍籌股。不過阿Man就唔建議升嗰日嚟追貨，資金都係喺不同板塊之間輪動，轉過頭可能又流出呢兩個板塊，高追值博率有限。
美團(03690) 去年第四季經調整業績由盈轉虧，半日插7.4%為跌幅最大藍籌。雖然美團外賣業務龍頭地位已難動搖，如果美團能不斷蠶食餓了麼嘅市場份額，三至五年要完成日均一億單目標唔難。以一單2元利潤，一天就是2億利潤，呢部份業務無疑是美團市值最大支撐。不過剛大量投放資源嘅社區團購，先係未來業績亮點，社區團購業務成敗將決定美團未來命運，亦係目前集團前景嘅最大風險因素。美團業績後股價再顯著下跌，暫時又重返上周低位附近，暫時未知到底與否，未建倉嘅建議睇定啲，未使咁心急上車。
新華社發表《這些毛病，得治！——聚焦新能源汽車行業發展隱憂》文章，點名批恒大汽車(00708)「紙上造車」，拖累新能源車股受壓。阿Man都講過恒大系好難炒，家下仲畀阿爺點晒名批評，阿Man繼續食花生，睇下恒大呢次點拆招。
新股嗶哩嗶哩(09626)今早首掛，半日報收709元，較招股價808元低2.2%，會否步百度(09888)後塵，阿Man無水晶球不得而知，暫時咪多手接飛刀。中概股因為有基金爆煲而被大洗太平地，最擔心係類似事件陸續有嚟，缸邊友有炒開美股嘅中概股，要密切關注事情發展。
麥狄文
(徐狄怡‧證監會持牌人)
沒有留言:
張貼留言