雖然美國10年期債息回落至1.7厘水平之下，美股隔晚做好，但土耳其爆煲，令新興市場波動，累港股高開低走，更一度跌逾400點，回落至兩星期低位。早段恒指曾隨美股做好高開升122點，報29008，可惜10日線(28975)得而復失，沽壓唔細。除咗土耳其嗰邊危危乎，A股又因為季結水頭較緊而下跌，拖累港股愈跌愈多，半日最多跌457點，低見28428點，創3月9日後最低位。午市跌幅略為收窄，恒指作守28500水平，跌339點，半日收28545，國指半日跌176點，報收11129；恒科技跌204點，報收8304，失守8400點要留意，若然進一步跌穿8000，都咪話唔大鑊。
藍籌股全面受壓，大笨象(00005)計劃將法規部搬上廣州，香港呢邊大刀闊斧裁員過百人，喺內地嘅法規部仲合唔合規，阿Man不願置評，但咁嘅做法絕對符合國情，股價半日跌1.5%。
至於內銀今日亦企唔住腳，建行(00939)跟工行(01398)半日分別跌0.9%及0.7%。
吉利(00175)中午派成績表，上半場股價已跌3.9%，舊年賺少咗同削減咗派息都唔係重點，重點係回A上科創板遇阻，被嫌唔夠業務高科。公司同時公布跟母公司斥資20億人仔打造電動汽車品牌，呢個消息尚算抵銷咗未能回A嘅負面消息，股價守到22元都要收貨。
騰訊(00700)，美團(03690)，小米(01810)排住隊出業績，暫時要博業績，610-630嘅騰訊，24-25嘅小米可以諗諗，美團喺科技龍頭當中估值最貴，想買都係忍忍手。
資源股跌勢顯著，主要係市場再度擔心土耳其形勢惡劣，全球經濟復甦或受阻，拖累資源價格急挫，倫敦期鋁跌逾3%，拖累相關股份受壓，整個板塊內股份，跌3%至12%不等。唐山限產令鋼坯價格創14年新高，但鋼鐵股隨其他資源股重挫。
工信部網站稱，計劃將內地電子煙或按捲煙納監管，思摩爾(06969)半日急挫27%，盤中曾低見40元，跌逾三成，其實早於三星期前，已有相關規管電子煙消息流出，當時阿Man已呼籲有貨要全數跳車，當時股價仲有60-70，若然當刻猶豫唔肯放手，今日自食其果。
麥狄文
(徐狄怡‧證監會持牌人)
沒有留言:
張貼留言