【盤房來料】市場觀望美債市發展 買賣兩閒

 https://www2.hkej.com/instantnews/market/article/2743851/%E3%80%90%E7%9B%A4%E6%88%BF%E4%BE%86%E6%96%99%E3%80%91%E5%B8%82%E5%A0%B4%E8%A7%80%E6%9C%9B%E7%BE%8E%E5%82%B5%E5%B8%82%E7%99%BC%E5%B1%95+%E8%B2%B7%E8%B3%A3%E5%85%A9%E9%96%92

美國呢個星期有財長講話，仲有聯儲局主席同官員出庸聽證會，市場觀望債會否因此而再見波動，港股呢個星期唔少重磅股排住隊派成績表，今早表現較為反覆，恒指喺二萬大關爭持。

恒指低開189點，報28801點已屬半日低，開市後一度升148點，見29139點半日高，但重返二萬九及10日線(約29002)後又見沽壓，又再倒跌逾百點。恒指中午收報28939點，跌51點；國指中午報收11331點，升47點；恒科指跌45點，報收8505點，暫守8400關鍵水平。半日大市成交額785.43億元，繼續縮水，買賣兩閒。

呢排個市真係無乜好炒，舊經濟股又怕短癮，炒炒吓行路打倒褪，新濟股受制於美國債息高企，雖然早排殺估值已令唔少股份估值都回落至合理水平，但始終市場仍有戒心，擔心債息一抽升，呢批股份又要捱沽，暫時都係上上落落，仲要單日波幅開始收窄，連短炒難度都大大提高。今日就唔講有乜股好炒住，阿Man反而想提吓一單私有化，提醒有貨嘅股東，最好接受私有化要約。

開元酒店(01158)主要喺中國從事中高檔連鎖酒店嘅經營及管理，並建立咗「開元」品牌系列，主要針對高檔休閒及商旅市場，提供結合中國本土元素嘅國際標準酒店服務。眾所周知，舊年受疫情影響，全球旅遊產業鏈嘅經營都陷入困局，雖然疫苗誔生後，疫情可望受控，但旅遊業要回復疫情前正常水平，至少仍要一兩年時間。而疫情下酒店行業受到重創，行業前景仍然唔明朗，難得開元開咗條件私有化，為H股股東大開逃生方便之門，有貨嘅股東真係要好好把握機會，舉手兼舉埋腳投贊成票，令私有化可以順利通過。

睇返今次嘅私有化邀約，每股作價18.15元，為開元酒店上市以嚟嘅歷史高位，要約人表明唔再提價都係正常。而呢個私有化要約價，亦較集團2019年IPO價16.5元溢價約一成，更較提出私有化前180個交易日平均價約14.21元溢價約27.7%，實在係為H股股東提供一個具吸引力嘅溢價變現機會。

除咗要約價較市場H股現價及綜合資產淨值有溢價，而公司H股一向流通量較低，要約為H股股東提供溢價變現機會，公司嘅幾個佔H股62.73%股權嘅獨立H股主要股東，包括格林酒店集團 、 融通基金管理有限公司 、 GEM Holdings Ltd. 及Rex Top Global Investments Ltd. 都已同意接納H股私有化要約及支持退市。幾個大孖沙都贊成私有化，作為小股東，唔係仲要諗呀，梗係投票贊成，袋袋平安啦…….

麥狄文

(徐狄怡‧證監會持牌人)