螞蟻集團（6688）上周五截止認購，消息指今次打破史上的凍資額及認購人數紀錄，凍資萬三億港元，約超購390倍，認購人數逾150萬。萬三億是甚麼概念呢，如這是一間上市公司，在港股裡將排名第六，亦足以買起兩間滙豐（005）。
在過去的周末，青冰整理過以往最火爆的新股數字，凍資額首五位分別是螞蟻集團、農夫山泉（9633）、中國鐵建（1186）、閱文（772）及國藥（1099），上月農夫招股都凍資6,700億，其餘三間就約5,000億。只要戰友心水清，其實不難發現，螞蟻係同佢哋不同級數，先講集資額，只計H股部分，今次在香港集資近1,300億元，H股市值已逾5,500億元，以上幾間拍埋去，完全唔入流，而螞蟻只係比你哋凍資多一倍，其實真係唔算瘋狂了。再睇返今年的新股熱潮，嘉和生物（6998）、康基醫療（9997）及歐康維視（1477），都凍資3,000億以上，雖然三隻都幫青冰賺過錢，但平心而論，咁嘅質素都3,000億，這才叫瘋狂吧。
人均認購額僅83萬
有報道指今次認購人數逾155萬人，話超過20%港人有份認購，這也令人不禁失笑，青冰只能說一句你懂的，數人頭就一定沒有百五萬的，若要數香港身份證就恐怕更少，但螞蟻上市乃係國家級大事，相信港交所（388）仍會維持隻眼開隻眼閉嘅。
凍資萬三億，155萬人認購，聽落就好誇張，但若換算為人均認購額，原來並不是太多，睇返手頭上的資料，凍資逾2,000億的16隻新股，人均認購額最高的是眾安在線（6060），12萬人凍資2,336億元，即係平均194萬元，其次就是平安好醫生（1833），22萬人凍資3,729億元，平均165萬元，其餘人均認購過百萬元的，仲有易鑫（2858）、閱文及國藥。螞蟻呢？原來只有83萬元。這個人均認購額亦反映了一件事，就是參與者入飛的份量，戰友應該都知，公開認購部分係會分A、B組，最後的分配亦會是等分的，舉一個極端的例子，假設公開發售100股，如有50人認購A組，只有1個在B組，這B組的仁兄就會獨攬50股，而A組就每人一股。由於今次大部分評論都叫人唔好用孖展抽，要用人海戰術現金入場，所以人均認購額較低，也是意料中事。
過，申了B組的戰友亦唔好太開心住，因為唔少上市公司都發了通告，話自己斥資一千幾百萬元去認購螞蟻，因為本身市值細，相對於這認購額，都係逼不得已而要申報的，而不用申報的上市公司，無一百都應該有幾十間吧，戰友們如最後分得少，應該要向這些不務正業的公司投訴啦。
青冰
http://www.fb.com/chingbing888
沒有留言:
張貼留言