過去的周末為北水新貴做了個小統計，截至9月16日的CCASS數字，共有8個交易日，以持股百分比計，買得最狠的是天立教育（1773）、信達生物（1801）及九毛九（9922），北水分別買咗6.26%、3.75%及3.68%，跟住就係永升生活（1995）及海吉亞（6078），各有2.78%及2.73%。
咁成為了北水新寵，有冇刺激到股價呢，以9月4日生效前的收市價計，至上周五收市的兩個星期，這廿四隻新貴，升得最多的是信達生物及寶龍商業（9909），各升21%。青冰會在專頁貼個小統計出來，有興趣的戰友可以望吓。
真空期市況添變數
用事後mode睇，如你在生效日前以收市競價盤平均注買入，拉勻就冇乜肉食的，只得2%回報，如你能剔除一些北水擺明都唔會買的股，回報率應會大大提高。至於北水買邊幾隻股份，其實睇頭幾日就知，你見某些股份，全日都冇乜北水牌，而本身的業務在近期都唔似會有催化劑的，實在應該先行走人，而事實證明，佢哋頭兩日唔買的，之後個十日八日都係一樣。
國慶長假期，亦是對北水股的一大考驗，按港交所的交易日曆，北水將於9月29日開始休假，至10月9日才回歸，換言之有六個港股交易日，係唔會有北水的，對於近日買得狠的股來說，未必係好消息。按以往的經驗，北水面對長假期，都習慣先行計數，戰友要留意返，下星期一係假前最後交易日，不要坐到最後一刻啊。
這個真空期，對大盤股及整體市況來說也不好受，回顧過去兩年，貿易戰及中美交惡，每當侵侵出招時，港股都首當其衝，每次北水都撈底頂吓大盤股，有時市底強甚至倒升添。隨着美國總統競選愈來愈近，疫情、美股及中國牌，都是侵侵的主要戰場，抗疫雞手鴨腳，似乎都難以翻身，美股so far仲頂得住，至於中國牌呢，在tiktok交易完成後，或會再有新招，咁有咩時候係可以令對手無還擊之力呢，就梗係對手放假之時，會否是危言聳聽，往後便知，但來到第三季末段，真的沒必要博至最後一刻，輕倉上陣抽吓新股，從容面對未來兩個月吧。
青冰
沒有留言:
張貼留言