隔晚美股個別發展，納指先跌後回升，收市升20點，但道指跟標指則再跌，但尾市跌幅收窄。至於港股連跌四日，恒指累跌1500點後，今早先低後反彈。恒指低開78點，開市曾挫243點，見24424點，再創去年11月2日以來新低，之後反彈。半日最多升176點，見24843點半日新高。中午恒指報收24765點，升97點；國指半日反彈79點，報收8885點；恒科指半日升182點，報收6415點。
重磅科網股支撐大市，剛獲高盛首次給予買入評級嘅阿里健康(00241)半日反彈超過6%，藍籌之中表現最佳。ATMX亦全部反彈，小米(01810)又見回購消息，小米近幾個月總會喺股價跌穿23元水平出手回購，今次亦唔例外，換句話講，有心收集小米，23元樓下呢啲位就可以試一試。至於騰訊(00700)、美團(03690)跟阿里巴巴(09988)分別反彈2.2%、3.7%及1.6%。相反金融股表現較差，平保(02318)跌至超過四年低位，半日跌7.4%，係表現最差藍籌股，瑞銀發表報告，指平保8月壽險保費收入跌2.5%，估計當月代理旗下新業務銷售按年錄雙位數跌幅。國壽(02628)亦受連累，半日跌2.2%。至於內銀股亦未有隨大市反彈，市場憂慮恒大(03333)債務問題，或拖累內銀貨款質素變差，內銀股即使目前估值低迷，亦難有運行。當中民生銀行(01988)半日跌逾4%，皆因市場憂慮民生銀行要為恒大債務作出巨額撇賬，加上細摩下調其目標價及評級，民生銀行股價跌穿2015年低位。
至於呢兩日受恒大拖累而跌到一仆一碌嘅內房股跟物管股，今日反彈。碧桂園服務(06098)承認曾跟恒大物業(06666)接觸，但價錢方面未講掂數，但唔排除未來有深度合作，恒大物業或者有得救，半日反彈8%，至於碧服半日彈近2%，若能以一個筍價收購恒大物業，對其業務擴展係正面嘅。其他物管股半日反彈超過2%至8%不等。
不過恒大半日彈都唔識彈，皆因有消息指海外債券持有人，已為債券重組做準備，意味住恒大好大機會GG，恒大半日再跌11.8%，恒大汽車(00708)半日再插13.3%，完全係失救咁款。恒騰(00136)半日跌0.8%，始終有騰訊作為主要股東之一，恒大出事都仲有騰訊做靠山。阿Man已提咗千祈咪再對恒大系存有任何希望，亦唔好多手接飛刀，恒大嘅命數已絕，目前係睇債務重組點樣執行。
麥狄文
(徐狄怡‧證監會持牌人)
沒有留言:
張貼留言