https://eastweek.my-magazine.me/main/48405
2015 年 12 月 14 日
「刁王」鍾楚義○三年離開電盈後，翌年買入資本策略﹙0497），十一年來醉心地產發展項目。從一開始買舊物業改頭換面出售，到今日有足夠資金投地，他說是憑着靈敏的觸覺，聞到deal的「味道」。 今期Mico再娓娓向陸叔道出如何憑着這份觸覺，將資本策略做大做強。
陸：你喺電盈做得好地地，點解轉去做地產？
鍾：收購咗香港電訊之後，公司決定唔再做高增長科網股，而做重資產、派息、含科網元素嘅電訊公司。既然已經完成咗光榮富歷史性嘅任務，再留落去做都唔啱我。我係鍾意做併購、打江山嘅人，你叫我坐喺度收息我唔得﹗○三年離開電盈外闖，李生仍然繼續支持我，就係咁我開始做地產。
陸：因為爸爸做地產，令你有份情意結？
鍾：可能係，聽佢講得多，發覺做地產好有挑戰性。爸爸成日教我哋要坐言起行，有地盤要快過人哋去睇，有時夜晚我着住睡衣都跟佢去睇。佢比較性急，做嘢要快人一步，我性格好似佢。人哋睇到嘅可能只係一嚿磚頭，我會睇到同聞到「錢」。
陸：咁多年嚟你做過幾多單deal？
鍾：我諗起碼做過三、四十單。香港有好多樓齡達幾十年嘅優質物業，我睇到件物業就會知有無修改空間。收購咗，我哋會因應嗰區調節用途，為物業增值。社會嘅改變造就咗好多機會，我喜歡接受挑戰，如果你早人半步睇到個筍盤咪搵到錢囉。
陸：咁你係幾時開始部署做埋地產發展商？
鍾：開始做時不過係間細公司，無話咩策略唔策略，淨係知要搵錢。到○五、○六年我哋成立咗商業部同住宅發展部。我覺得要雙線發展，商業物業銀碼大，唔係想賣就得。住宅就唔同，可以化整為零，起幾多間都可以慢慢賣，又可以賣樓花。你見我哋呢幾年拍地進取，細項目自己做，做得好成功，大項目就聯同其他合夥人一齊做。我有個項目Queen's Gate喺上海，已經賣咗四十六間，一個上海項目推出三個月套現七、八億算好好。
陸：咁你又係點樣開始發展到大陸？
鍾：一直好支持我哋嘅股東Lehman Brothers﹙雷曼兄弟）喺○六年買咗中國一個物業，搵咗我做，就係咁我哋開始發展到國內，o依家上海團隊差唔多有二十人。香港係好，但長遠嚟講上海未必跑輸，呢個動感城市增長空間大。不過如果純粹講回報，暫時仲係香港好啲。
陸：雷曼兄弟喺○八年出事，對你哋嘅打擊係咪好大？
鍾：係呀，我哋最大嘅金主係雷曼兄弟。其實我喺○九年時好驚，因為唔止雷曼出事，幾乎所有銀行都話未來會無錢借。當時我唯有節衣縮食，撻咗舂坎角一項物業嘅訂，諗住留得青山在。無人知呢個風浪要捱幾耐，我寧願將現金放喺公司。
陸：有無襯升浪之前，喺香港猛「執嘢」？
鍾：我哋有買嘢，但講唔上「執嘢」。無人會叻晒，運氣都好重要。○三年公司剛起步無負債，無嘢驚，嗰陣係黃金時期我哋積極好多。○九年手上有物業亦有負債，我哋就唔夠膽咁進取。
鍾楚義喜歡挑戰，故選擇富挑戰性的地產發展為他的事業。
喜歡接受挑戰
陸：自己做生意，同幫人打工有咩唔同？
鍾：我鍾意做deal，亦鍾意喺前面衝。我嘅直覺都幾好，聞deal嘅嗅覺又幾敏銳，我亦好勤力去睇好多樓，一見到個盤，好短時間就知道值唔值得做。我覺得最叻嘅生意人，係識用其他人去幫佢哋搵錢，好似啲老虎基金咁，訓練啲小老虎出嚟，如果我哋都做得到，就可以得閒去打波喇。
陸：經營資本策略十一年，中間有咩得失呢？
鍾：我得咗一班好同事、股東，公司增長都唔錯，亦賺咗好多合作夥伴。失嘅係少咗時間陪屋企人，因為公司係我心中首選嘅使命，佔我每日嘅時間都幾長，如果攞到平衡會好啲。不過太太話我係一直跑嘅人，所以我想搵多啲「將軍」幫手。
陸：近期好似好多國內人想嚟香港買嘢，好似恒大（3333）嗰單deal，係咪陸續有嚟？
鍾：唔止商廈項目，仲有住宅、地皮。我覺得國內落嚟嘅資金只會越嚟越多，呢個會係持續嘅趨勢。喺中國做住宅發展稅好重，回報亦只得十幾個巴仙，同一筆錢不如投資香港。投資香港都係投資自己人，國家無問題。用國企資金投資發展項目，肯定唔止恒大想做，恒大呢單只係開始，所以我睇好香港嘅商廈。
陸：你嘅閱歷咁豐富，有咩建議畀年輕人？
鍾：有時際遇嘅嘢好難講，不過你喺市場唔勤力就一定無機會。如果係我嘅仔女，我肯定叫佢哋北闖，識班朋友先，因為大錢同機會都喺嗰度。當然唔係個個北上都有機會，但唔多啲去曝光就一定少好多機會。我認為先要學好中文、普通話，充實好自己，唔好對大陸有歧視同偏見。
陸：十年前就話北上啫，o依家國內已經發展得好成熟，香港嘅年青人想北上都可能唔夠國內嘅年輕人嚟喎？
鍾：香港其實好着數，好多嘢香港都行喺中國嘅前面，好似幼兒園、補習社咁，喺香港做得好成熟，又有好多成功例子，我哋咪可以用嚟借鏡返大陸做。你睇味千拉麵，八十年代已經喺香港起飛，北上發展就做得更好，因為呢樣嘢對當時國內消費者有新鮮感，呢啲咪就係有發展機會囉。我覺得凡事鍾意做，就會有興趣、有熱誠，加埋勤力，成功機率就再大啲添。
沒有留言:
張貼留言